Shillong, Naitung 27: Ka Nongkseh SSCC ka la sdang ia ka jingiakun ka jong ka ha ka Shillong Premier League da ka jingjop kaba long da 1-0 ia ka Mylliem SC, ha ka jingiakhun kaba ar jong kane ka lympung ba la long hynne ka janmiet ha SSA Stadium, Polo.
Ia kane ka shi kol ka Nongkseh SSCC la thep ha ka mnit ba la pynjlan ia ka kylla step (45+5) da u Aibiangmame Nongneng.
Ha kane ka jingiakhun, u referee u bah G Marwein u la hap ban pyndonkam ia ka bor bad ka iktiar ka jong u kum u nong pyniaid kum shi bynta ban maham ia ki player bad ba la don ruh ki khep ba ki rang ialehkai na baroh ar kynhun ki la shah sei syndon shabar ka madan iakhun.
Ha kaba sdang ka jingiakhun, ka Mylliem SC, ka la pyrshang katba lah ban ialehkai beit tang ha la ka jong ka kut ialehkai, da ka jingthmu ban shu nion kynsan shakhmat ia ka Nongkseh, kaba hangne ka la mih paw lyngba u Remark Kharmalki bad kumjuh ia u rang ialehkai ba la soi thymmai u Kevizakie Ciesotsu, hynrei kum kine ki buit ka long pat kaba kham niar ban lap ne ban shem khah khah, ia kaba bunsien I kumba ka Mylliem ka iakhun shwa tang da kumno ban nym shah thep kol.
Ha kum kane ka sur ialehkai, ka kylla step I kumba kan jan lah ban pynurlong ia kane ka rukom ialehkai ka jong ka, pynban ha ka khyllipmat ban nym ailad ia ka bol ban nym poi shabar ban lait na ka corner, bad hapdeng ka jingiakhyrwit kaba jam bha ia ka bol nyngkong ka la dei beit dain ia ka diengkol, bad kane ka bol ka la poi hajan u Aibaing, uba khlem pynlehnohei shuh ia ka bad khyrwit jam biang sa shisien ban pynkhih ir ia ka jar.
Haba wan ban bteng ia ka kylla miet, ka Mylliem, ka pyni ia ka mynsiem iakhun ka jong ka, hynrei sniew bok ba uwei na ki rang ialehkai u Shaibor Nongrum u la ioh ban pdiang ia ka yellow card kaba ar kaba pynlong ia u ban shah sei beit beit shabar ka madan iakhun, kaba ym slem hadien jong kane, u Arlangky Nongsiej ka Nongskeh ruh u la shah sei shabar ka madan iakhun hadien ka jingioh pdiang ia ka yellow card kaba ar.
Hadien ba la kham skhem bha ka rukom ialehkai, ka Nongkseh SSCC ka la sdang ban tehlakam noh pat ia ka jingiakhun kaba nangne hi shakhmat ka la nion katlah katiai iaka kut ialehkai ka Mylliem, kaba pynlong ia u rang ap kol u jong ka u Rihoklang Khongjoh ba un kham bunkam bha, katno tam lei lei ba un da lah ruh wat ban kyrda ia ki artylli ki bol ba la khyrwit jam da u Hardy Cliff Nongbri bad u Sheen Sohktung.
Katba na ka ling ka Myllliem , u Istarbor Marngar u la ioh ia kawei ka kabu ksiar ia kaba la lah ban tem ia ka da u rangap kol ka Nongkseh u Guidle Syiemlieh.
Haba shu ia shim kyllum ia kane ka jingiakhun, lah ban ong ba wat lada ka Nongkseh SSCC ka la lah ba kan khur ia ka jingjop, kadei kaba kum ka kynhun ka da hap ba kan iakhun tyngeh, katba naka liang ka Mylliem SC, kane ka namrem, kam dei kaba kut ia ka, hynrei ka dang lah ba kan kham pynbha ia la ka rukom ialehkai ha ki jingiakhun kiban wan.
Lashai ka sngi ka jingiakhun kan long hapdeng ka Rangdajied United FC pyrshah ia ka Meghalaya Police FT kaban long ha ka por 6:30 janmiet.
