Shillong, Iaiong 17: Ka Elekshon kommittee ba la jied da ka Central Executive Council (CEC) jong ka Khasi Students’ Union (KSU), ban pyniaid ia ka ilekshon kaba khadhynriew (16) sha ka ophis treikam jong ka KSU CEC na ka bynta ka samoi treikam2026-2029, bad ia kane ka ilekshon la rai ban pynlong ha ka 09 tarik u Jymmang 2026 ha Dinam Hall, Jaiaw, Shillong naduh ka por 7 baje mynstep haduh 3 baje nohphai sngi.
Ka Elekshon kommittee ha ka 15 tarik u Iaiong 2026 ka la dep ban bishar lut ia baroh ki kot ki sla jong ki 38 ngut ki kyrtong ki ban ia shim bynta ha ka ilekshon kaba 16 (khadhynriew) jong ka KSU CEC bad kine harum ki long ki kyrteng jong ki kyrtong kiba la lah ban ia shim bynta ha katei ka ilekshon.
Ka elekshon kommittee, ha ka jingbishar bniah ia ki kot thep kyrteng la shem ba na ka bynta ka kam President ka don tang ka kyrteng jong u samla Raymond Kharjana kumta la jop khlem da don ba ialeh pyrshah, ia ka kam Symbut President ka don tang ka kyrteng u samla Pynkmenlang Sanmiet kumta u la jop khlem da don ba ia leh pyrshah, bad ia ka kam general Secretary kala leit sha u samla Reuben Anderson Najiar namar ym don ba ialeh pyrshah.
Ki post kiba hap ban ia thep da ka vote kin long sa hynniew tylli, kito ki long ka pot, Assistant General Secretary, Organising Secretary, Education Secretary, Information bad Publicity Secretary, Office Secretary, Sport Secretary bad Environment Secretary, kane ka long katkum ka kyrwoh kaba la phah da ki dkhot jong ka Election Committee u bah Danny Khyriem kum u Cahirman bad u bah Samuel Jyrw kum u Secretary.
