Shillong Naitung 18: U Bah HS Lyngdoh u President jong ka seng HSPDP u la ong ba la suit la shor ia ka seng halor ka nongrim ban iada na ka bynta ka jaidbynriew Khasi bad ki trai shnong jong ka jylla Meghalaya, kane ka party ym tang ba kan shu iakhun ha ka election hynrei ban iada ruh ia ka jaidbynriew Khasi.
U la ai jingmut ruh ia ki briew jong ka jylla ba kin kyndit bynriew bad ba ki iohi ia ka jingma jong ka jaidbynriew Khasi ba ka ia kynduh ha kine ki por mynta. Kane kam dei tang ka kamram jog ki nongshynshar hynrei ka dei ruh ka kam jong ki paidbah ban shim ia ka jingkit ban ia treilang.
U Vice president jong ka Hills State People Democratic Party (HSPDP) ha ka jingkren jong u ha ka jingialang jong ka seng kaba dei jong ka East Khasi Hills District ha Dinam Hall Shillong, u ong ba ka party ka la pynkhreh ban iakhun ia ka hok tynrai jong ka jaidbynriew hapoh bad shabar jong ka Assembly.
U la khot la wer ia baroh ki nongkyrshan jong ka party ba kin long kiba la khreh ban ialeh pyrshah lada ka sorkar kam lah ban pyntrei kam ia ka jingdawa jong ki paidbah. Ka jingdawa mynta ka long ban pyntrei kam noh ia Inner Line Permit ha ka jylla ban iada ia ka jaidbynriew Meghalaya na ki nongwei.
Ha kane ka jingialang u la pyni ba ka Congress haduh mynta kam pat pynreikam ia ka ILP ha kane ka jylla Meghalayakala. Kaei kaba ka congress ka leh ka long ba ka la pyntrei kam tang ia ki policy ba la ai da ka sorkar pdeng.
Ha kane ka jingialang u la jied ruh ia ki nongkitkam jong ka East Khasi Hills District, u nong mihkhmat jong ka Nongkrem u ba long ruh u vice president jong ka party u la shah jied kum u president jong ka East Khasi Hills District.(SP News)
