Ka jingialang jong ki trai bad ki nongniah kali kamai na Shillong sha Nongjri kan long ha ka 12 tarik mynta u bnai ha Youh Hostel. Ha kane ka sngi la kyntu ia baroh ki trai bad ki nongniah, khamtam ia ki trai shnong kiba dei na ka shnong Nongjri bad Umsur ba kin ia poi khnang ha kane ka jingialang ban ia kren ia ka khia ka shon jong katei ka thain.
Ha kane ka jingialang yn ia kren ruh ha kaba ia dei bad ka jingsniew palat jong ka surok kaba la buh ia ki paidbah ha pdeng ka jing kaba khraw ha ka leit ka wan, khamtam eh kaba kit ia ki ba pang ba shitom ban pynpoi sha Shillong ban ioh ia ki jingsumar la ong u Bah R. Marwein Secretary. (SP News Agency)
Ka IOA kaba la ia soi ha u snem 1947 bad ka sorkar India ka im
Shillong, Naitung 03: Ha ka jingiakynduh hapdeng ki nongthoh khubor bad u Bah John F Kharshiing nongai ktien jong ka seng Federation of Khasi State u la ong ba ka Instrument of Accession (IAO) kaba la ia soi hapdeng ki syiem jong ki hima khasi bd ka sorkar India ha u snem 1947 ka im haduh mynta myn ne bad ka sorkar pdeng ka dang burom haduh kine ki sngi, ki leh klet ia kane ka kam dei ka sorkar jylla, u la ong.
Ha kane ka jingiaphylliew jingmud hapdeng ki nongthoh khubor bad u tei u nongai ktien jong ka FKS, la iathuh ba na ka liang jong ka sorkar pdeng lyngba ka tnad kaba dei peit kyrpang ia ki rit paid ha kane ka Ri India ka la buh ia ka Commission ban peit ia kane ka kam bad na ka liang jong ka FKS ka la ia kynduh ia ki heh sorkar ha Delhi ban pynsngew halor jong katei ka IOA. Kumba ka long mynta ka don ka jingkyrmen ba ka sorkar ka la pdeng ka la kyndit bynriew ban tip ba kane ka jingiateh kular ka dang sah haduh kineki sngi.
Kumba long mynta ki paidbah nongshnong shnong jong kane ka jylla Meghalaya ki ioh ban kam trai, ia ka khyndew ka shyiap, ki lum ki kwah bad ia ki marpoh khyndew dei halor ka nongrim ba ka don kane ka IOA kaba la ia soi hapdeng ka sorkar pdeng bad ki Syiem Khasi. U Bah John u la ong hooid ka dei kaba la slem hynrei ka jingslem kam dei ba ki la sangeh ia ka jingialeh ka jong ki hynrei na ki ba bun ki daw kaba ki hap iaid suki jai.
Ha ka jingkren jong u Syiem barim jong ka Hima Mylliem u Paim, Laborious Manik Syiem, u la ong ba na ka liang jong ki syiem kiba la leit noh jong ka hima ki la ia khun da ka mukotduma ha Federal Court ia kaba mynta la tip kum ka Supream Court ban wad ia ka jingshai, hynrei na ka liang jong u Syiem ba la bam kwai ha dwar u blei u Paim Sati Raja na ka daw jong ka jingleh jong ki briew kiba don ha ka sain pyrthei u la hap ban weng noh ia kane ka mukot duma ha u snem 1949.
Ha ka jingkren jong u Syiem jong ka Hima Nongkhlaw u Paim, P M Syiem u la ong ba ha kitei ki snem na ka liang jong ki hima khasi wat la ki la ia soi ia ka IOA hynrei kim shym la ia soi pat ia ka soskular ban rung sha ka Ri India bad kane ka sah haduh kine ki sngi. Na ka liang jong ki haduh mynta ki dang ialeh ban ioh ia kaei kaba la ia soi bad ka sorkar pdeng ha kitei ki snem.
Ha kane ka sngi la don ruh kiwei kiwei ki nongkren ha kaba ki la pynpaw ba kane ka jingiatehkular hadpeng ki hima khasi bad ka sorkar pdeng ka dang im haduh kine ki sngi. Na ka liang jong ka FKS kan dang iai bteng ia kane ka jingialeh ka jong ki ban pynsngewthuh ia ka sorkar pdeng ba ia pynbeitnoh ia kane ka kam. La pynsngewthuh ba kane kan long ia kiwei ruh ki jaidbynriew rit paidbah jong kane ka Ri India.
Halor ka jingkylli kaba la buh da u SP News Agency, ha kaba ia dei bad ka Hima Nongstoin, na ka liang jong u nongai ktien jong ka FKS, u la ong ba ka dei ka jingshisha ba ha ka 13 tarik jong u bnai Jylliew 1947 u la pynbna ia ka hima Nongstoin kum ka Ri ba laitluid bad ia kane u Syiem ka hima Nongstoin u Wiklief Syiem u la pyntip sha ka dorbar bah jong ka pyrhtei ka United nation Organization (UNO) hynrei kane ka hima ruh ha dien ka la ia soi ia ka IOA bad ka sorkar India.
