Shillong, Nailar 10: U myntri rangbah jong ka jylla u Dr Mukul Sangma u la ongba ka sorkar kan pyntrei kam noh shen ia ka Food Security Ordinance jong ka sorkar pdeng ha ka por kaba la buh.
Na ka liang jong ka sorkar ka la dep shim ia ka rai ban pyntrei kam ia kane ka skhim bad ban sam ia u khaw sha ki paidbah ha ka dor ali tyngka shikilo, katkum kane ka ordinance u wei u briew unioh san kilo u khaw bad lada ki don ki bym ioh ia u khaw kin ioh da ka pisa.
Haba kren ha ki nongthoh khubor mynta ka sngi ha Congress Bhavan u la ong ba ka sorkar ka la trei bor bah ban pynbit pynbiang naka bynta ban sdang noh ia kane ka skhimha kane ka jylla.
La ai por ia ka tnad sam marbam ba ka dei ban pyndep ha kaba jied ia ki briew hapoh ka 60 sngi bad ha dien katei yn ailad ia ki paidbah ban pynrung ne weng kyrteng shiphew sngi.
Ki paidbah ki ban ioh ia kane ka jingmyntoi kin long 76.7% ha ki nongkyndong bad 63% ha ki jaka sorkar. Ka jingshim kyrteng kan sdang na kiba duna kajingioh bad kan kiew sha jrong kat haduh ban da poi ha katei ka percentage kaba la mang.(SP News)
