Jowai, Iaiong 02: Ka jingialang jong ka Congress Legislature party (CLP) jong ki MDC ka Jiantia Hills Autonomous District Council (JHADC) kaba la long mynta ka sngi ka la jied ia u Bah Madonbai Rymbai kum unongialam ba thymmai ban long CEM ha katei ka District Council.
U CEM ba la hiar shuki u Bah Lambok Sumer haba kren ha u SP News Agency u la ong ba u la shim ia kane ka rai ban hiar shukinoh ha dien ka jing kyrpad jong ki nongialam jong ka seng Congress na ka MPCC, kum u briew jong ka seng u la kohnguh ia kaei kaba ki la bthah ia u.
Haba jubab pat ia ki jingkylli u la ong b aka daw jong ka jingai kam ia u Bah Moonlight Parait kum u Chairman ka planning board hapoh kane ka EC kaba mynta leh se ka lah ban dei kawei na ki daw, hynrei ban pynkhyllem ia ka EC jong u ka la don ka jingpyrshang da ki 9 ngut ki MDC jong ka seng Congress ha u bnai Nohprah u snem ba la dep.
Kane ka jingle jong u Bah Lambok Sumer banhiar shuki khlem da iatynjuhbor hapoh ka iing dorbar ka la wanrah ia ka jingshna ia ka history ha katei ka JHADC ban long u CEM u ba nyngkong ban hiar shuki khlem da poi sha ka jingiatynjuh bor hapoh ka iing dorbar. U Bah Sumer u la ong ba kum u briew jong ka seng u hap ban kohnguh ia ki nongialam jong ka seng.(SP News)
