Tura Nailur 27: Ka Tura Govt. College Students Union (TGCSU) mynta ka sngi ka la ong ba u Deputy Commissioner jong ka West Garo Hills yn nym lah ban pynwai noh ia ka seng namar ka trei na ka bynta ki samla pule jong ka Garo Hills bad ka jingialeh ka jong ki ka long ban dawa na ka sorkar ba ka dei ban pynbiang ia ki jongdon kam jong ka College.
Kaba sngewsih ka long ba ka sorkar kam juh leh ei ei haba ki dawa da kaba jai jai ka sdang ban pyndit bynriew tang ynda ki la shim ia ki lad ki lynti jingiakhih. Kumba ka long mynta kane ka jaka ai jinghikai jong ka sorkar ka don bun ki jingduna na ka liang jong ki nonghikai bad ki nongtrei ha ka ophis hapoh jong kane ka College.
Kane ka College mynta kam don ia u principal u ba pura bad ia u Vice Principal ruh kum juh, ki nonghikai ki duna ka iing kam biang bad ka jingai ia ka bai bam na ka bynta ki samla pule ha kane ka college ka duna haba ia nujor bad kiwei ki college ha ka jylla. Kane ka College ka don palat ia ka 5000 ngut ki samla pule hynrei ka sorkar kam shym la leh ei ei ia ka jingdawa jong kin a ka bynta ka jingbha ki samla pule.
Na ka liang jong ka TGCSU la ong ba kim kwah ban don ka jingiakhih hynrei dei ka sorkar kaba pynbor ia ki ban shim ia ki lynti jingiakhih. La ong ba kane ka sorkar kaba mynta ka kwah ban pynduh noh ia ka TGCSU ym tang kata hynrei wat ia ki seng bhalang baroh kidon ha kane ka jylla Meghalaya la kynnoh katei ka seng samla pule.
Ka TGCSU ka la iohi ha ki lad pathai khubor ba u Deputy Commissioner jong ka West Garo Hills u la btah ban pynwai noh ia ka seng samla pule hapoh jong ka Tura Government College bad ban nym shah ia ki dkhot ba mynta ba kin ia shim bynta ha ka jingjied thymmai ia ki nongkit kam.
Haba ia dei bad kane na ka liang jong u Asst. General Secretary jong ka TGCSU u Balrang Raka Ch. Momin u la pynrem jur ia kane ka jingkren lap lah jong u Deputy Commissioner. U tei u nongialam jong ka seng u la ong ba ka TGCSU ka dei ka seng kaba lajied da ki samla pule kam dei kaba la thung da ka sorkar lane da u DC. Ka TGSU ka ong ba u DC yn nym lah ban pynwai noh ia ka TGCSU.(SP News)
