Shillong, Nailar 22: Yn khot u CEM JHADC ia baroh ki 19 Dolloi bad 1 Sirdarship – Pdiang u Bah John F Kharshiing ban ai jingmut ia ki bor Jaintia Hills Autonomous District Council
Ka kynhun nongkitkam ba hynniew ngut na ka Dorbar ki Dolloi ha ka jingialam u Bah John F Kharshiing, Co-Chairman, Meghalaya State Planning Board bad Chairman, Ka Dorbar ki Khlieh Nongsynshar Ka Ri Hynniewtrep, Spokesperson, Federation of Khasi States, ki la ia kynduh ia u Ma Thombor Shiwat, MDC, Chief Executive Member, JHADC, ha ka sngi 21 tarik August 2014, por 11.30 mynstep, hapoh office jong u CEM, JHADC ha Jowai, halor katto katne ki kam kiba kyrkieh kiba ktah ia ka synshar khadar jong ki Hima/Elaka hapoh Jaintia Hills District.
Ka jingialang ka la long kaba sei soh kaba la neh kumba jan lai kynta ha kaba la ia kren ia kine ki kam harum:-
ka jingdonkam ia ki bor JHADC ban thaw lad ban wanrah noh kyrkieh ia ki ‘Act’ ki ‘Rule’ jong baroh (19 Dolloi bad 1 Sirdarship) 20 tylli ki Elaka kiba don hapoh Jaintia Hills District. Ha kane ka liang u Bah John F Kharshiing, kum ka nuksa u la ai ha u CEM-JHADC ia ka copy jong ka Act bad Rule jong ki Hima Nongstoin, Maharam, Mylliem, Bhowal, Syiemship, bad u la pyntip ba haduh kine ki sngi wat ha Khasi Hills Autonomous District Council ki dang bun ki Hima bad ki Sirdarship ki bym pat don ka Act bad ka Rule la ka jong, bad ka jingbym don ia ka Riti ka Dustur ha ka Act bad Rule ka wanrah bunsien ka kynrum kynram ha ka synshar khadar bad ka poi ruh shaduh sha High Court bad la don ka khep ba ia ka Riti ka Dustur la leit pan jingshai shaduh sha ka iing kashari kaba ha Khlieh duh jong ka Ri India kaba la khot ka Supreme Court.
Ban thung thymmai ia ka JHADC Boundary Commission kaba la don teng mynshwa ban pynbeit ia u pud u sam hapdeng ki Elaka Dolloi hapoh Jaintia Hills District. Na ka liang ki Dolloi ki la ong ba ki la ai bun ki jingthoh mynshwa sha ka Boundary Commission hynrei namar ka jingkylla ki Executive Committtee hapoh JHADC kitei ki kam ki la sah teng.
ka jingdonkam ba ki District Council Jaintia bad ha Khasi Hills kin wanrah ia ka JHADC Clan (Dorbar Kur) Act/ Rule kaban long ka jingiarap ia ki 3367 tylli ki jait Khasi Pnar bad khamtam ban wanrah ia ka Ain ha kaba ki bor Sorkar Jylla ki dei ban ioh ia ka NOC na ki bor District Council bad khamtam na ka ‘Dorbar Kur’ ne ‘Seng Kur’ ha shwa ban ai Schedule Tribe Certificate
La ia kren ruh ia ka jingdonkam ba ka Jaintia, Khasi, bad Garo Hills District Council ki la dei ban wanrah ia ka ain kaba ryntih halor ka jingshim jait haba don ka jingshong khleh kum ba la don ka KHADC ia ka The KHAD (Khasi Social Custom Lineage) Act, 1997, kaba batai shai kumno ban ‘tang jait’ katba ha Jaintia Hills ym pat don kano kano ka Act ne Rule ha kaba iadei bad kane ka phang bad u la ioh jingtip ba ki don ki kur kiba ym pat pdiang ia ka ‘tang jait’.
La pynsngew ia u CEM – JHADC ia ka jingdonkam ban pynbna ‘notify’ ia ka list bad ka kyrteng jong baroh ki jait kur katba lah ban pynbna ia ka jingspel (spelling) kyrteng jong ka Kur namar la iohi mynta ba la bun kiba pynkylla hi kiba leh stad ban ai jait ha kaba la bakla ka rukom spell ia ka kyrteng jong ka jaid kur. La don kam ruh ban pyrkhat la yn ithuh ne em ia kito ki Khasi –Pnar kiba ai jait kpa da ka Ain
La kyrpad ia u CEM ban shim khia ban kyrshan ia ki Dolloi kiba don ki Law Kyntang namar ki long kiba lah ban khring ia ki kam jngoh kai (tourism), bad la kyrpad ban iarap ia ki Elaka ban pynmih ia ka Map Law Kyntang hapoh Jaintia Hills District,
La kyntu jur ia u Chief Executive Member, JHADC, ban wanrah ia ka resolution na ka Council JHADC ban kyntu ia ka Sorkar Jylla ban pynbeit thymmai (Amend) ia ka ain India kaba kyrteng The Indian Registration Act 1908 kaba ithuh tang ia ki dulir kiba mih na ka office u Registrar, Deputy Commissioner, bad kane ka la pynmih ka jingkulmar ha kaba ki don kiba shim kabu ban leit register ia ki dulir sha office u Deputy Commissioner khlem da iaid lyngba ka office u Dolloi/ Syiem bad District Council. Ki la kyntu ia u CEM ban shim khia halor kane namar wat ki Bank ki ai ram tang ia kito kiba wanrah da ka Dulir kaba la registar hapoh office Deputy Commissioner. Kane ka ktah jur ia ki khun ki hajar kiba hap ban lut bun lak tyngka ha kaban register ia ka khyndew hapoh ar bad lai jaka, kane ka ktah ia ka synshar khadar jong ka Hima/Elaka bad jong ka District Council.
La ai copy hakhmat u CEM JHADC ia ka ‘The Coal Mines (Nationalisation) Act 1973, bad 1976; The Mines and Minerals (Development and Regulation) Act 1957; bad la kyrpad ia u CEM ban la kyrpad jur ia u CEM ban wanrah da ka resolution hapoh Council ban kyntu jur ia ka Sorkar Meghalaya ba kan wanrah da ka Resolution hapoh Assembly ban dawa na ka Sorkar India ban amend ia katei ka Ain jong ka Ri India namar ka Section 3, ka knieh ia ka jinglong trai ia ki par dew iong bad ka ktah jur ia ka jinglong trai halor ka khyndew ka shiap, kum shibynta ban plie lynti ia ka jingpynbeit ia ka kynrum kynram kaba mih na kane ka jingkhang ia ka jingtih mawiong na ka NGT.
Ka kyrpad ia u CEM JHADC ban shim khia ban ia kren hapoh ka Executive Committee, bad ka Council bad kumjuh ruh bad ha Khasi bad Garo District Council ban thaw lad ban pynbeit thymmai ia ka Assam and Meghalaya Autonomous Districts (Constitution of District Council) Rules, 1951 namar ka don bun ki jingdkoh khamtam ha kaba iadei bad ka jingdon hok bun kiwei jaidbynriew ban rung kyrteng bad ha kaba ki don ka hok ban ialeh election MDC lada ki dei ki ‘permanent resident’, ha ka juh ka por ka don ka jingdkoh bad ka jingma ha kaba iadei bad ka list ki Schedule Tribe kiba lah bad kiba don hok ban rung kyrteng hapoh ka Electoral roll District Council bad kiba lah ban ialeh MDC. U Bah John F Kharshiing, u la ai ha u CEM JHADC ia ka list jong ki MDC nongwei kiba la ialeh election bad jop bad long MDC ha u snem 1972 na ka Khasi Hills Autonomous District Council. U la pyntip ruh ba kumba long mynta ki nongwei ki la jop bad ki long ruh ki MDC hapoh Garo Hills Autonomous District Council.
Ha kaba iadei bad kitei ki mat ba la kdew haneng, hadein ka jingiakren kaba la neh jan lai kynta, u Ma Thombor Shiwat, MDC, Chief Executive Member, JHADC u la ai khublei ia u Chairman, ki Khlieh Nongsynshar uba la im sngi ban buddien ia ki kam ki jingeh jong ki Hima /Elaka ha kane ka bri hynniewtrep, ha kane ka jingialang u CEM u la rai ban lum bad khot ia ka jingialang jong baroh ki 19 Dolloi ba uwei u Sirdar kynthup ia ki Acting Dolloi bad ki Secretary Elaka, ban iakren sani bha halor kitei ki kam, bad la rai ban khot lang ia u Bah John F Kharshiing, Co-Chairman, Meghalaya State Planning Board bad Chairman, Ka Dorbar ki Khlieh Nongsynshar Ka Ri Hynniewtrep, Spokesperson, Federation of Khasi States, ban ia don lang ha katei ka jingialang jong ki Dolloi kaban sa long ha shen. Shuh shuh ha kaba iadei ba ka jingkyrpad ban pynmih ia ka Map jong ki Law Kyntang, u CEM u la pyntip ba mynta ka Executive Committee, JHADC ki la rai ban pyndonkam ia ka jingstad Global Positioning Systems (GPS) ha kaba iadei bad ki jingdonkam jong ka office JHADC, khamtam ha kaba iadei bad ki dulir Land Holding. U la ong ba un sa rah ia kitei ki jingaijingmut sha ka Executive Committee bad u la kyrpad ia u Bah John F Kharshiing, ban iadon lang bad ban ai jingmut ia ka Jaintia Hills Autonomous District Council, ha ki jingdonkam kiba bun.
Na ka liang u Bah John F Kharshiing, u la ong ba u long uba kloi ban pdiang ban iarap ai jingmut ia ki District Council ban pynneh, pynkhlain bad ban pynjanai ia ki Riti ki Dustur bad u la kyrpad ban buh da ka Committee kaba kyrpang ban ioh ban ia phylliew jingmut ha ki bynta kiba pher bapher.
Ha katei ka jingialang kiba la kren bad ia don lang ki long u Ma Thombor Shiwat, Chief Executive Member, JHADC, ki Executive Member, JHADC u Ma Desceous Pohshna, MDC & EM, u Ma Holando Lamin, MDC & EM, u Ma Pheinshwa Nanglein, MDC & EM, u Ma Joinriwell Pyrtuh, MDC & EM, u Ma Arbor Hima Darnei, MDC & EM, u Ma Chawas Lyngdoh, Dolloi Elaka Raliang, u Ma Moon R Garod, Dolloi Elaka Nangbah, u Ma Manbha Kyndoh, Dolloi Elaka Narpuh, u Ma Je Pyrtuh, Dolloi Elaka Amwi, u Ma Chui Pohlynjar, Dolloi Elaka Nongtalang, u Ma M Bareh, Pator, Umlane- Amwi, bad u Bah John F Kharshiing, Co-Chairman, Meghalaya State Planning Board bad Chairman, Ka Dorbar ki Khlieh Nongsynshar Ka Ri Hynniewtrep, Spokesperson, Federation of Khasi States.
Ha katei ka jingialang ka kynhun ki Dolloi ha ryngkat u Bah John F Kharshiing, Chairman, Dorbar Khlieh Nongsynshar, ki la ia shong pyrkhat ia ki kam kiba mih na ka tei ka jingialang hapoh kamra office kaba kyrpang jong ki Dolloi hapoh office Jaintia Hills Autonomous District Council, bad la rai ban ia kynduh biang hashen.(SP News)
