Shillong, Jylliew 13: La pynlong ia ka prokram ai jinghikai kaba shisngi halor ki Quality Standard bad ka BIS Certification na ka bynta ki Micro, Small and Medium Enterprise (MSME) ha ka 11 tarik Jylliew 2026 ha Directorate of Commerce & Industries ha Shillong.
Ka prokram ka la pynïasoh lang ia kumba 60 ngut ki nongseng kam seng jam, ki nongmihkhmat jong ki karkhana, ki heh sorkar bad ki riew shemphang ha ka liang ka teknoloji ban kyntiew ïa ka jingsngewthuh shaphang ki kyndon kiba iadei bad ka jingbha, ki rukom ai syrnot bad ki rukom pynïaid ïa ka jingbha hapdeng ki MSME.
Ia kane ka prokram la pynlong da ka jingthmu ban pynshlur ia ki MSME ban shim ia ki Indian Standard, ban sngewthuh ia ki skhim BIS Product Certification, ban pyntreikam ia ki Quality Management System bad ban pynkhlain ia ka jingbud ryntih ia ki kyndon ain.
Ka jingïalang ka la ai ruh ka rynsan ban ïakren markhmat hapdeng ki MSME bad ki riew shemphang na ki jaka kiba iadei bad ki kam jingbha jong ki jingdon jingem.
La sdang ia ka prokram da ka jingkren pdiang burom na ka Kong Aimeka Dkhar, Assistant Director ka Directorate of Commerce & Industries jong ka sorkar Meghalaya, kaba la ban jur ia ka jingdonkam jong ka jinglong kaba bha ha kaba kyntiew ia ka jinglah ban iakhun bad ka jinglah ban iaineh ki MSME.
Haba ai jingkren ha kane ka jingialang, u Bah Moonlander Wanshong, Director jong ka Commerce & Industries jong ka sorkar Meghalaya, u la ban jur ia ka bynta ba kongsan jong ki quality standard ha kaba kyntiew ia ka jingmih jong ki karkhana, ka jingpdiang jong ki iew ia ki mar, bad ka jingkiew kaba jrong samoi jong ka kam.
U la pynshlur ia ki nongseng kam seng jam ban pdiang ia ki rukom shna mar ba la pynbeit ryntih bad ki skhim pynshisha ia ka jingbha ban kyntiew ia ka jingshaniah jong ki nongthied bad ka jinglah ban iakhun.
U Shouvik Chanda, Director & Head, ka BIS Guwahati Branch Office, u la ai ka jingbatai shaphang ka Bureau of Indian Standards (BIS) bad ka bynta jong ka ha kaba kyntiew ïa ka jingbha, ka jingshngaiñ, bad ka jingïada ïa ki nongthied nongpet lyngba ka jingpynbeit ryntih, ka jingpeit bniah ïa ka jingïahap, bad ki kam pynshisha.
Haba ai jingkren halor ka jingdonkam jong ka jingbha bad jingshngain na ka bynta ka koit ka khiah jong ki paidbah, ka Dr. Wadamika Lyngdoh, Deputy Commissioner of Food Safety (Technical), ka tnad ka koit ka khiah jong ka sorkar Meghalaya, ka la ban jur ia ka jingdonkam ban bud ryntih ia ki kyndon bad ban iada ia ki nongthied lyngba ki rukom treikam ba la pynbeit ryntih.
Ia ka jinghikai halor ka BIS Product Certification Process bad ka Grant of Licence Procedure la pynlong da u Dr. Shasanka Sekhar Borkotoky, Consultant (Standardization Activities), BIS, bad u Jishnu Das, Standard Promotion Officer, BIS.
Ka jingialang ka kynthup ia ki rukom aplai, ki jingdonkam ba iadei bad ki kot ki sla, ka jingtest ia ki mar, ka jingpeit bniah ia ka jingbud ia ki kyndon, ka jingpeit bniah ia ki karkhana, bad ki rukom ai laisen bad pynthymmai.
Ia ka jingialang iamir jingmut halor ka Quality Management System (QMS) Certification la ai da u Shouvik Chanda, uba la batai bniah shaphang ki jingmyntoi jong ka jingpdiang ïa ki kam ban pynthikna ia ka jingbha na ka bynta ban kyntiew ïa ka jingtreikam, ka jingsngewhun jong ki nongthied, bad ka jingtreikam jong ka seng.
Ki nongiashim bynta ki la ioh jingmyntoi ruh na ka jingpyni ia ka teknoloji da u Dr. Harekrishna Deka, Head (In-Charge), CIPET Guwahati, uba la ban jur ia ki jaka test, ki jingshakri ba kyrshan ia ka teknoloji, ki rukom pynthikna ia ka jingbha, bad ki lad kyntiew ia ki sap kiba lah ban ioh da ki MSME.
Ka prokram ka la kut da ka jingialang kylli jingkylli bad jubab, ha kaba ki nongiashim bynta ki la pan jingshai halor ka BIS certification, Indian Standards, Quality Control Orders (QCOs), ISO certification, bad ki jingdonkam ban test.
Ki jingiakren ki la plie lad ia ka jingiakren kaba don jingmut hapdeng ki nongshim bynta ha ka kam karkhana bad ki riew shemphang ha ka teknoloji.
Ka prokram ka kyntiew ia ka jingsngewthuh hapdeng ki MSME ha kaba iadei bad ka BIS certification, Indian Standards, bad ki rukom pynthikna ia ka jingbha.
La khmih lynti ba kan pynshlur ia ka jingpdiang kham bun ia ki kyndon ba bha, ban kyntiew ia ka jingbud ryntih ia ki kyndon, bad ban pynkhlain ia ka jinglah ban iakhun jong ki MSME ha Meghalaya.
