Shillong, Naitung 26: ka jingpynkup burom ia ki samla pule kiba la pyndep ia ka jingshah hikai lyngba ka SPARK kala long ha Nongtalang Government Higher Secondary School, Nongtalang, bad kane ka kren ruh ia ka jingkiew ka pule ha ka jylla bad ka jingdon kam jong ka subjek Science, Technology, Engineering and Mathematics ha ki jingpule.
U myntri ba dei peit ia ka tnad pule puthi ka jylla u bah Lahkmen Rymbui ha ka jingkren ka jong u la ai ka jingiroh ia ki khynnah kiba la ia shim bynta ha ka jinghikai namar kane ka long kaba don kam ha ki snem bad ki por ban dang wan, namar ka SPARK ka long ban wanrah ia ka jingkylla ha ki jaka pule ha kaba ki ioh ban leh hi da lade.
U myntri u la ong ba ka sorkar kala kut jingmut ban pynioh ia ka jingpule kaba katkum kane ka juk kaba mynta, ban pynshlur ia ki jinghikai online, u kyntu ia ki samla pule ba kin pynleit jingmut ha ka pule puthi ka jingki khnang ba kin lah ban noh ia u syniang ha ka imlang sahlang.
Ha kane ka sngi ki samla kila pyni ia ki sap jong ki ha kaba kila shna bad batai ia ki jingshna kiba ktah ia ka jingim briew kiba man ka sngi, kine ki jingshna ki long kaba ki samla pule ki pyni ia ka jingshemphang ka jong ki kaba kila ioh na kane ka jinghikai SPARK kaba ai mynsiem ia ki ia ka jingsngewthuh ia ka saian badka jingthmu jong ka.
Ha kane ka sngi la don lang ruh District School Education Officer (DSEO), West Jaiñtia Hills, Assistant Commissioner, u CEO ka Avenues, ki nong pyniaid jong ki skul bad ki nongialam bad ki riew rangbah na ka thian Nongtlang.
