Shillong, Naitung, 25: Ka seng samla pule ka Khasi Students’ Union (KSU) mynta ka sngi kala pynlong iaka jingialum paidbah ki samla pule jong ka skul bah University of Science and Technology, Meghalaya ha Ri- Bhoi distrik ban pynpaw pyrshah iaka jinglait tuh ki jingkylli NEET eksam.
Kane ka jingiakhih mynta ka sngi ka long ban kyrshan iaka jingiakhih ki samla pule ha ka nongbah Delhi bad ban dawa ba u Myntri ba dei peit iaka tnad pule u Dharmendra Pradhan u dei ban hiar shuki, ki samla pule kiba la iashim bynta ha kane ka jingiakhih ki kynthup na ka skul bah NEHU Shillong, USTM bad RIST Ri- Bhoi distrik NEIAH, Shillong, Mahatma Gandhi University ha Ri- Bhoi distrik.
Ha kane ka sngi, kala pynlong ruh iaka jingsngap jar ba shi minit bad thang mombati kum ka dak ban sngewlem na ka bynta kito ki arphew ngut ki samla kiba la shim ia la ka jong ka jingim tang namar ka jinglait tuh ki jingkylli eksamin NEET.
Ka seng ha ki khyndiat sngi ba la dep lyngba ka shnat treikam jong ka ba don ha ka nongbah Delhi kala leit ban iashim bynta ha kane ka jingiakhih kaba dang iaid haduh mynta ha Jantar Mantar Delhi ka seng ka pynrem jur iaka jingpyndonkam ki pulit ban bom bad tied iaki samla pule ha katei ka jingiakhih.
Ka seng ka dawa na ka sorkar pdeng ba kan pynurlong iaki jingdawa jong ki samla pule ban pynthikna ba kum kine ki jingjia ym dei ban jia shuh nangne shakhmat kum ka seng samla pule, kan bteng ban kyrshan pura iaka jingiakhih ha ka ri baroh kawei namar iaka seng la seng halor ka nongrim ban kyntiew iaka pule ki puthi.
