Shillong, Naitung 25: U Superintedent ki pulit ka East Khasi Hills District u bah Vivek Syiem u la pyntip ba ka tnad pulit ba dei peit ia jingpnyiaid ia kikali ha kane ka nongbah Shillong kala thaw ia ka kynhun pulit kaba kyrpang ban pyntrei kamia ka ‘Operation Free Flow’, ban teh lakam ia ki kali ba pynieng beain.
Kane ka jingpynbna ka iadei bad ka jingsdang iaka prokram pyrshang ban pynbeit iaka rukom ieng kali ha sor Shillong. Ka Shillong Traffic Police ka la iohi ba ka jingieng kali kulmar ka pynkhapngiah bad pynwit haduh katta katta iaka iaid ka ieng ki kali bad ki briew ha ki surok sor Shillong.
Ban pynbeit ia kane, ka Shillong Traffic Police kala sdang ia kawei ka ‘Special Enforcement Drive’ ka jingleit khynra ne khmih bniah ba kyrpang hapoh ka kyrteng ‘Operation Free Flow’.
Ka Shillong Traffic Enforcement Team (STET) kala thung ia kawei ka kynhun kaba kyrpang ba la tip kum ka Shillong Traffic Enforcement Team (STET). Kane ka kynhun kan leit khynra tyngeh pyrshah ia baroh ki kali kiba ieng ha ki jaka ba la mana lane kito ki kali ki ban pynwit iaka jingiaid beit iaid ryntih ka traffic.
Ka jingkhynra kan long kaba biang khlem da shah shiliang khmat iano iano ruh. Kin map tang ia kito ki kam kiba donkam kyrkieh palat ne ki kam ba nyngkong bad ka pang ka shitom.
Ka thong jong ka ‘Operation Free Flow’ kam dei tang ban pynshitom ne dain kuna iaki nongpynkhein ain hynrei ka long ban pynshlur iaki paidbah ba kin long ki nongniah kali kiba don ka jingkitkhlieh, ban pynneh iaka rukom pyniaid iaki kali bad pynlong iaki surok kiba shngain ia baroh.
Ka Shillong Traffic Police (STP) ka kyntu ia baroh ki nongshong shnong ba kin snohktilang bad iatreilang bad kane ka sienjam da kaba bud ryntih iaki kyndon ki rukom iaid surok. Ka jingieng kali da ka jingkitkhlieh bad ka jingiaid surok ka dei ban long kaba donkam tam ban pynduna iaka jingkhapngiah ki surok sor Shillong.
