Shillong, Naitung 18: Ka Pt. Deen Dayal Upadhyay Community and Skill Development Center, Wahiajer hapoh ka jingpyniaid jong ka shulbah NEHU ka la pynlong da kaba jop ia ka prokram ai jinghikai kaba hynrniewsngi halor ka phang “Ka jingpyndonkam ia ka jingtip jongki trai-ri trai-muluk ha ka ban shna khiew ranei” ha ka DDUCC Hall na ka bynta ki dkhot ka imlang sahlang ka shnong Wahiajer ba la ai sngewbha da ka Jaintia Hills Cement Manufacturer’s Association (JHCMA) ryngkat bad ki jaka shong ba la ai sngewbha da ka TopCem Cement.
Ka prokram ka la ioh ia ka jingkynthoh kaba bha naki 30 ngut ki nongiashimbynta kham bun na ki ki long ki dkhot kiba dei na ki kynhun bapher bapher jong ka imlang sahlang naWahiajer bad na kiwei kiwei ki bynta jong ka Ri lum Jaintia. Ha ki hynniewsngi, la ai jinghikai lyngba ka jingpyni kaba trei kamda ki kti da ka Kong Roilin Pyrtuh, ka nonghikai bapawnam ban shna khiew ranei na ka shnong Larnai, Ri lum Jaintia.
Ki nongiashim bynta ki la ioh ia ki jingshemphang bad jingtip kiba kordor ha ki jingtbit kiba kongsan kibaiadei bad ka kam khaii pateng jong kane ka jaid kam bad ka jingpynlong jong ka.
Kane ka jinghikai kaba hynniewsngi ka la poi sha kaba kut da ka jingjop da kaba la pynlongia ka Valedictory function ha ka 18 July 2025 ha ka jaka ba don ka kolej. U Prof. S. Umdor, Pro-Vice-Chancellor, NEHU, Shillong u la long u Kongsan ha ka jingiadon ryngkat U Ma Lukas Jat, na ka shnong Wahiajer kum u Symbud Kongsan, U Dr. F. R. Sumer, Principal ba dei peit ia ka, DDUCC, NEHU, U Ma Latu Nartiang, u Branch Manager ka Meghalaya Co-op. Apex Bank Ltd. Ummulong Branch bad kiwei kiwei ba shah ba shah invite, ki nonghikai, ki nongtrei bad ki khynnanh katei ka Kolej.
Ha kaba pdiang sngewbha u Dr. F.R.Sumer, Principal In-Charge, DDUCC, Wahiajer u la pynpaw ia ka jingsngewnguh kaba khraw ia baroh kiba la pyllait por khnang ban poi sha ka jingialang.
Nangta la bud da ki jingkren ba ai mynsiem na u Ma Lukas Jat, u Ma Latu Nartiang bad na ki nongiashim bynta bad kiba ai jinghikai ruh. Ha la ki jong ki jong ki jingkren jong ki, ki la pynksan ia ka jingkordor jong ka DDUCC bad ka jingdonkam bad ka dor jong ka jingpynphriang ia ka jingtip shaphang ki kam bad ki rukom shna khiewranei ha ki thain Ri lum Jaintia jong ke jylla Meghalaya kaba wanrah ia ka jingmyntoi ia ki nongshong shong jong ka Wahiajer naduh ki khynnah haduh kiba la rangbah kumjuh.
Prof. S. Umdor, Pro Vice-Chancellor, NEHU, Shillong ha ka jingkren jong U kum u Kongsan u la ai khublei ia ka DDUCC kaba la shim ia ka jingkit khlieh ban pynlong ia kum kane ka training kaba donkam ha kum kine ki por mynta bad u la ai ka jingiaroh ia ki nongtrei ka DDUCC kiba la pynlong ia kane ka training . U la ai jingkhublei ruh khamtam ia ki nongiashimbynta bad ki nonghikai kiba la pynlut bad bor bad sor ban pynlong ia kane ka prokram kaba jop.
U la kdew lynti ruh ia ki nogshimbynta bad kumjuh ia ki nongshongshnong ka Wahiajer ban sngewthuh bad ri kyndong ia ki jinghikai ba kyrpang kiba ka DDUCC ka ai na ka por sha ka por kiba lah ban wanrah ia bun ki jingmyntoi khamtam ia ka shnong baroh kawei ha ki por ban nang wan.
U la bet ruh ia ki symboh jingstad hapdeng ki nongshim bynta ban shim kabu ia ka jingroi jingpar ha ka phang peitkai pyrthei ka la bsuh thied sha Ri Lum Jaintia bad ban pyndonkam hok ia ki jingtip ba ioh lyngba kine ki jinghikai kiba ki ioh na DDUCC na ki por sha ki por khnang ba kin ioh ka lad ban kyrshan ia ka kamai kajih jong ki.
Ki nongkren ki la kyntu iaki nongiashim bynta bad khamtam eh ia ki samla ban buh kyrpangia kane ka rukom jingtip tynrai kaba ki la ioh na ka prokram ai jinghikai ban pynkhlainia ka jinglahjongki kum ki briew bad ki dkhot jong ka imlang sahlang ha ka kam shna khiewranei.
Kane ka rukom shna da kaba pyndonkam da ki kti ka la pynskhem ia ki shimet shimet kum ka jingkhaii kaba kyrpang bad kaba tbit bha hapdeng ki jaitbynriew bapher bapher ym tang h a ka jylla hynrei kylleng jong ka ri India. Ha kaba kut, kane ka jingkhaii ka la don ka bynta kaba kongsan ban pyni iaki jingthmu bapher bapher kiba la pynmih shibun ka jingsngewtynnat khamtam eh hapdeng ki samla.
Lyngba ki jingkren jong ki ki la iohi ia ka jingsngewtynnat bad ka jingaiti kaba la pyni da ki nongiashimbynta ha kane ka prokram hikai jingtbit bad ka jingkwah ban long kiba tbit ha kane ka rukom shna jingshna.
Ka prokram kum kane ka la pynlong ia ki dkhot jong ka imlang-sahlang kaba kynthup iaki nongrep bad ki samla ban sngewthuh ia ka jingmyntoi kaba ka wanrah lyngba ki lad kamai ban pynneh ia ka jingim jong ki bad ban roi ha ka iew ka hat ha ka thain bad ban kyntiew I ia lade kat kum ka jingdawa ka iew ka hat ha ka jylla Meghalaya bad ha satlak ka pyrthei lyngba ki jingshna thymmai jong ki mar tynrai ha ki rukom bapher bapher bad ba itynnad.
Ki riewrangbah ki la ai khublei ia ki nongiashimbynta bad ki la kyntu ia ki ba kin trei shitom katba ki dang iakynduh ia ki jingeh da ka jingshaniah bad ban burom ia ka dor jong ka por. Kane ka prokram ka dei ka bynta jong ka jingpyrshang kaba kham heh jong ka DDUCC ban kyntiew ia ka jingnang jingstad bad ka jinghikai ha ka kam kat kum ka National Education Policy 2020 jong ka sorkar India.
Ban pynpawia ka jingpynkutkabajopjong ka prokram, la samiaki Certificate sha kinongiashimbynta da U Prof. S. Umdor kum U Kongsan. U Programme Coordinator, u Ma Wolnish Rymbai, katba u dang tyrwa ia ka jingaikhublei da kaba la pynpaw ia ka jingsngewnguh kaba khraw iaki riewpawkhmat bad baroh kiba don hangta.
U la pynpaw ïa ka jingpdiangsngewbha khamtam eh ïaki nongiashim bynta baroh bad ka nonghikai Kong Roilin Pyrtuh kiba la iohsngew is ka jingkhot jongka DDUCC ban ïashim bynta na ka bynta ka ban ai jingmyntoi iaki ryngkat bad jingsngewthuh ia ka jingkordor eh jongkane ka lad ha ki snem ban wan namar ka long sa kawei pat na ki prokram jingpyntbit ba dang ïaid shakhmat jong ka DDUCC.
U la pynkynmaw ruh ba ka jingthmu jong ka DUCC ka dei ban tyrwa khamtam ia ki samla da ki jingpyntbit kiba donkam kat kum ka pyrthei mynta ym ban kyrshan tang ia lade shimet hynrei ban iarap ban pynkupbor ia ki dkhot ka imlang ka sahlang.
