Shillong, Iaiong 26: Ka Hynniewtrep Youths’Council HYC Mawpait Tlongpleng unit mynta ka Sngi ka la pynlong ia ka Awareness cum Free Medical Health Camp ha ka Shnong Mawpait Tlongpleng ha kaba ki paitbah nongshong shnong kumba laispah ngut ei ei ki la ioh jingmyntoi na kane ka prokram.La pyniaid ia ka Jingialang da u President Ka HYC Mawpait Tlongpleng unit Bah Marius Nongsiej, la ioh jingkren Lyngkot na u Myntri jong ka shnong Bah Donboklang Kharlyngdoh, na ki Doctors kiba la wan ba ai jinghikai shaphang lai tylli ki mat (a) ka jinglehkhuid (b) ka jingsniew na ka jingdih buaid (k) ka jingktah na ka shongkha khynnah bad na u Bah John Lyngdoh Assistant Organising secretary uba dei ruh u incharge ka HYC South West Khasi Hills.
Ka Doktor Irene Wanniang RBSK MO Ranikor CHC haba ai jingkren shaphang ka jinglehkhuid i la ong ba ka ka jinglehkhuid ka long kaba donkam tam ha ka jingim jong ngi kaba man la ka sngi, haba ngi leh khuid ngi lait na ki jingpang jingshitom.
Kala ong ruh ba haba lehkhuid kam dei ban long tang ha kyrpong iing lajong bad sa bret kulmar sha ki iing jong ki para marjan ne ha ki Lynti shnong ia ki niut ki nier. I la hikai ruh ia ki kmie ki kpa ban pynsum pynsait man ka sngi ia la ki khun, kumjuh ruh ban pynmlien ia ki khun ban shut bniat mar sien khie thiah.
I Doctor D.Kharbhih MHO Mawkyrwat CHC haba ai jingkren shaphang ka jingktah na ka jingdih buaid i la ong ba kaba nyngkong ka ktah ia ka koit ka khiah, kaba ar, ka jingdih buaid ka pynkyrni bad lada u Kpa u kyrni, ha ki jingdih buaid kamut ka iing ka sem, ki khun ki kti kin duna ka bam ka dih, ka pule ka dangle bad Hangta poi sa ka pra iing pra sem.
U Doctor Kyntiewnam Mawlong MHO Ranikor CHC haba ai jingkren shaphang ka jingktah na ka shongkha khynnah u la batai shwa ba ka arta ban shongkha ka long 18 shaneng ia ka kynthei bad 21 snem shaneng ia u Shynrang.
U la iathuh shuh shuh ba katkum ka statistics na ka tnad ka koit ka khiah, ki high risk pregnancy (mortality rate)ne kiba khlad na ka jingarmet ha ka arta khynnah ka khambun hapoh ka Jylla . U la ong shuh shuh ba ha kine ki sngi ba mynta ka ain POCSO ka Kem bad set jail ruh ia ki khynnah kiba shongkha ha ka arta kaba dangrit.
U Bah John Lyngdoh haba ai jingkren kum u Kongsan u la ong ka koit ka khiah kadei ka spah bah ba ngim lah ban thied da lei lei ruh. Shuh shuh u la ban ba ka jingshong kha khynnah kam ktah tang ia ka koit ka khiah hynrei ka ktah ruh ia ka jingangnud , kum ka nuksa lada kylli por dang khynnah aiu phi kwah ban long da la heh la San, kin jubab ba kwah long Doktor kwah long Ophisar hynrei kumno kin leit poi sha katei ka thong, lada kin ioh lok noh ha ka arta kaba dang khynnah.
Kum u nongialam u la ai ruh ka jingkyrkhu kyrdoh ia ka unit ba ka la pynlong ia kum kane ka prokram kaba tei bad ka la long shisha ka jingmyntoi ia ki paitbah jong kane ka shnong, ba ha jaka ba kin leit shim dawai na ki doctor na Ranikor ne Mawkyrwat CHC mynta phi la shim na nangne na shnong hi.
Ha kane ka Sngi ka HYC Mawpait Tlongpleng ka la pynlong ruh ia ka Clean and pick up program ha kaba 18 ngut ki khynnnah ki la wan ban iashim bynta shitrhem da kaba tam ia ki niut bad thep ha plastic, bad uba ioh ia ka jingkhia ba bun kilo u la long u nongjop.
Ka unit ka la Sam da ka certificate bad cash prize ia ki khynnah kiba la jop ha kane ka competition i ba jop ba nyngkong i long i Amrita Syiemlieh 17.8 kilo, ba ar idei i Lapynkmen Syiemlieh 13.7 kilo bad uba wan ba lai udei u Kevinson Snaitang 11.2 kilo.
Shwa ban Sam ia kane ka prize la ioh ruh ban pule ia ka jingkular shaphang ka jinglehkhuid na u General Secretary ka unit Bah Toborlin Syiemlieh ha kaba baroh ki khynnah ki la bud ia kitei ki kyntien jingkular. Kane ka long katkum ka kyrwoh ba la phah da u T. Syiemlieh General Secretary ka HYC Mawpait Tlongpleng unit.
