Shillong, Rymphang 23: U myntri ka tnad pule puhti ka jylla u Rakkam A Sangma haba jubab ia ka jingkylli jong u bah Brightstarwell Marbaniang haba ia dei bad ki skul EMRS la ong ban a ki 38 tylli ki skul kiba la mang ia ka jylla Meghalaya kiba la dep ban tei ia ki iing dei ar tylli kawei ha Pahamsyiem Nongpoh bad ha Samanda ha Garo Hills District.
U Myntri ba dei peit ia ka tnad pule u la ong ba ia kitei ki ar tylli ki skul yn sdang noh ia ka jingsdang skul naduh ka 1/ Iaiong /2024 bad ka jingkhot ban thungkam ha kitei ki skul kala iaid ia kaba la leh da ka sorkar pdeng lyngba ka kynhun ba laitluid.
Kine ki skul ki dei jong ka sorkar pdeng bad ka jingpyniaid baroh dei na ka sorkar pdeng bad ia kine ki skul la ioh ia ki lyngba ka tnad pynneh pynnsah ia ki riewlum ha u snem 1998.
Ka jingeh kaba ia kynduh ka dei ha kaba ia dei bad ka jaka, ka sorkar pdeng ka kwah ban ioh ei ia ka jaka bad kane kala buh ia ka jingeh namar ha kane ka jylla ka jaka kam dei jong ka sorkar.
Haba iarap ban jubab na ka liang jong u myntri rangbah ka jylla u la ong ba, na ki 38 tylli ki EMRS skul la lah ban pyndep tang ar tylli, ka jingeh ka dei ka jaka, na ka liang jong ka sorkar ka ialeh ban pynioh ia ki jaka na ki paidbah.
U myntri rangbah ka jylla u la pynshai ba ia kine ki skul la bei pisa 100% na ka sorkar pdeng, haba ia dei bad ka thungkam thungjam ka polisi bhah kam jong ka jylla kam trei kam ha kine ki skul namar ki dei jong ka sorkar pdeng.
U myntri rangbah ka jylla u la ong ba ka jingiakren ka dang iaid ba lada long kaba lah ban pynpeit noh ka sorkar jylla ban pyntrei ia kine ki skul wat la ka jingjied ia ki kompnei la leh katkum ki kyndon jong ka sorkar pdeng, ka jingpan ka long ba lada dei na ka sorkar jylla kam kham suk ban pyntrei.
