Shillong, Jymmang 21: Ki nongialam jong ka Hynñiewtrep Youths Council (HYC) ryngkat ka jingsynran lang jong ki bahaing hasem ha ka sngi u Blei ki la leit ban aiti ia ki arngut ki samla kiba la im kyrni ha u drok ha Alive Again Foundation, Rehabilitation Centre kaba don hajan ka sor Guwahati, Assam.
Kine ki arngut ki samla ki dei kiba la shah bat ha ki dkhot ka HYC ha ka 17 tarik u bnai Jymmang 2024 ha ka jingkhynra ia ki nongdih drok ha Motphran. U Vice President jong ka HYC u Bah Donboklang Kharlyngdoh ha u kyrwoh ba u la phah u la ong haba ka seng ka iakhun pyrshah ia u drok.
Ka HYC ka isih ia u drok hynrei kam isih pat ia ki nongdih drok. U la ong ruh ba hadien ba ki la ioh ban iasyllok bad ki bahaing hasem ki la ioh ban ialam noh ia ki anrgut ki samla sha ka jaka sumar kaba don hajan Guwahati, Assam.
Ia ka kynhun jong ka seng HYC, la lamkhmat da u Vice President u Bah Donboklang Kharlyngdoh bad u samla Francis G. Mawlong, u Secretary u samla Isaac Basaiawmoit, u Chief Organising Secretary u samla John Lyngdoh bad kiwei kiwei.
U la ong ruh ba ka seng nalor ki jingkhynra kan pyrshang ruh ban iakren bad ban iasyllok bad kine ki khun samla ryngkat ki bahaing hasem ba kin wadlad wad lynti ban buh ia ki ha ki jaka sumar bad na ka liang ka seng kan iarap ruh kat i bor barit na ka bynta ban thawlad ba ki khun samla ka jaidbynriew ki ioh ia ki lad sumar bad kin lait na ka jingpang kyrni dih drok.
Haba kynthoh ia ka Sorkar une u nongialam ka seng u la ong, ka Sorkar ka la pynlut pisa hynrei ban iakren na ka bynta ban tei ia ka lawei jong kine kiba la ngop ha ki jingdih kiba sniew ka aidaw.
Shuh shuh u la ong ba ka Sorkar ryngkat ki MLA ki dei ban shimkhia halor kane ka kam khnang ban wanrah ia ka Rehabilitation Centre ba la pyniaid da ka Sorkar ha nongbah Shillong khnang ba kan pynduna ia ka jingjyllei jong ki samla kiba la ngop ha u drok.
