Shillong, Naitung 10: Mynta ka sngi ki dkhot jong ka KSU kila bteng ia ka jingkhynra la ki nongtrei kiba wan ba bar ka jylla ki don ne em ia ka wor permit ha ki jaka ba pyntrei ia ki jingtrei, ha ki bynta ka jong ka thain Malki bad Laitumkhrah.
U samla Iashanborlang Mukhim President jong ka KSU shnat Malki u la ong ba ka seng mynta ka sngi kala pynlong ia ka jingkhynra kiba shnong hapoh ka shnong Malki bad la lap ba ki don 62 ngut ki briew ki bym don ia ka Work Permit.
U President ka KSU la ong ba napdeng ki 62 ngut ka seng kala lap ba ki don 13 ngut ki bymdon wat tang ia ka dur thep vote, ka jingkhynra jong ka seng ia ka work permit ka long ban dawa na ka sorkar pdeng ba ka dei ban pyntrei kam noh ia ka ILP ha kane ka jylla Meghalaya.
Katba ym pat ioh ia ka ILP ka long ban dawa ruh na ka sorkar jylla ba kan pyntrei kam noh ia ka MRSSA, 2016, ka seng ka maham ia baroh ki kontraktor kiba pyntrei kam ba kim don ban wan ialam ia ki briew na bar ka jylla khlem biang ki kot ki sla khamtam khlem ka Work Permit.
Haba ki dkhot ka seng KSU ki la leit ban jurip ia ka jingpyntrei ia ka Iew Laitumkhrah, ki pulit kiba la pahara ha katei ka jaka ryngkat ki pulit jong ka Laitumkhrah ki khlem ailat ia ki dkhot ka KSU ba kin rung sha katei ka jaka ba tei ia ka Iew Laitumkhrah.
