New Delhi, Naitung 27: Ha ka jingjop kaba khraw jong ka India kaba iadei bad ka deiriti, “Ki Moidam – Ki rukom tep briew jong ki syiem Ahom” na Assam ki la poi sha ka thup UNESCO World Heritage.
La pynbna ia kane mynta ka sngi, ka 26 tarik u Naitung, 2024 ha ka bynta kaba 46 kaba dang long jong ka World Heritage Committee ha New Delhi. Lyngba kane, kane ka dei ka jaka kaba 43 kaba rung ha kane ka thup.
Kane ka dei ka jaka World Heritage ba lai na Assam, hadien ka Kaziranga National Park bad Manas Wildlife Sanctuary, kiba la rung hapoh ka thup Natural ha u snem 1985.
Ki Moidam jong Choraideo, kiba rakhe bad pynneh ia ka hiar pateng ki syiem lyngba ki jingtei ba heh bha ki iasyriem bad ki pyramid jong ki pharaoh na Egypt bad ki jaka tep ia ki syiem hyndai ha China.
Ka jingthmu ban buh ia kine ki jaka heritage hapoh ka thup jong ka UNESCO ka dei ban pynneh bad kyntiew ia ka deiriti katkum ki OUV (Outstanding Universal Value) kiba iohi ha ki jaka kiba iadei bad ka deiriti, ki jaka natural bad ki jaka ba iakhleh ha 195 tylli ki ri.
Ka India ka la long dkhot jong ka World Heritage Committee naduh u snem 2021-25 bad dang pynlong nyngkong ia ka bynta ha ka ri naduh ba la rung hapoh ka World Heritage Convention jong u 1972 jong ka UNESCO.
Ka bynta kaba 46 jong ka World Heritage Committee ka la sdang ha ka 21 tarik u Naitung bad kan bteng haduh ka 31 tarik u Naitung ha Bharat Mandapam ha New Delhi.
Ha kane ka jingialang ba long man u snem, la wan iashim bynta da palat 150 ki kynhun na ki ri kiba la soi ia ka UNESCO World Heritage Convention bad kane ka peit ia ki kam kiba iadei bad ka World Heritage, ba kynthup ia ka jingpynrung ia ki jaka ba thymmai.
Ha ka jingiakren bad ki lad pathai khubor hadien kane ka jingpynbna, u Myntri Sorkar Pdeng ba dei khmih ia ka Tnad Kam Deiriti, Gajendra Singh Shekhawat u la ong ba kane ka jingioh jingithuh ka khring ia ka jingpeit ka pyrthei ia kane ka rukom tep ia ki syiem Ahom ha Charaideo kaba la 700 snem kaba pyni ia ka deiriti jong ka Assam bad Bharat.
Ka jingiaid lynti jong ki Moidam sha kane ka jingioh jingithuh ka dei kaba la ialam da u Myntri Rangbah Duh, Narendra Modi, uba la ai jingtyrwa ban pynrung ia kine ki jingtei ba hyndai kum ka jingrung jong ka India ha u 2023.
Kane ka jingtyrwa ka ban jur halor ka jingkongsan jong ki Moidam ha kaba iadei bad ka deiriti bad ka histori, ha kaba ki dei ki jaka jong ka deiriti ba nyngkong na ka thain shatei lammihngi ban rung ha ka thup World Heritage, u la bynrap.
U Myntri u la pyntip ba ka India ka la ioh pynrung 13 tylli ki jaka World heritage ha kine ki 10 snem ba la dep bad ba mynta ka don ha ka kyrdan kaba 6 ha ka pyrthei ha kaba iadei bad ka jingbun ki jaka World Heritage. Kane ka jingioh jingithuh na ka pyrthei ka dei ka dak jong ka jingbuddien ka India ba thymmai ban pyni ia ka hiar pateng jong ka Bharat sha ka pyrthei.
U Myntri u la ong ba ka jingrung ki Moidam ha ka thup World Heritage jong ka UNESCO ka dei ka dak jong ka jingkongsan jong ki. Ka Council on Monuments and Sites (ICOMOS) ka pyni ia ka bynta kaba khraw jong ki Moidam ha kaba iadei bad ka deiriti bad ka jingpyni ia ki bynta bapher bapher jong ka histori.
Kane ka jingithuh ka pyni ia ki sienjam jong ka Archaeological Survey of India (ASI) bad ka Sorkar Assam ban pynneh ia kine ki jaka ba kongsan ha kaba iadei bad ka histori, la ong u Myntri.
U Shekhawat u la ban jur ha ka jingkongsan ban pynneh ia kum kine ki jingtei ba hyndai kiba bun ha India. Ka jingithuh ia ki Moidam kum ka jaka World Heritage jong ka UNESCO ka pyni ia ka jingkongsan ban pynneh ia ka deiriti na ka bynta ki pateng ban wan. Da kaba leit bad kyrshan ia kine ki jait jaka, ngi shim ia ka bynta ban pynneh ia ki bad ban pyni ia ka deiriti ba riewspah jong ka India, u la ong.
Ki Moidam, jaka tep ia ki syiem kidei kiba la shna da ki Tai –Ahom ha ka thain shatei lammihngi jong ka ri, ki don ha ki kjat jong ki lum Patkai ha ka phang mihngi jong ka Assam. Ki Tai Ahom ki khein ba kine ki jaka tep kilong kiba kyntang bad ka pyni ia ki rukom tep briew ba kham pher jong ki.
Ki Tai-Ahom ki la wan poi ha Assam ha ka spah snem kaba 13, da kaba seng ia ka Charaideo kum ka nongbah kaba nyngkong jong ki bad ka jaka na ka bynta ka jingtep ia ki syiem.
Haduh 600 snem, naduh ka spah snem kaba 19 CE, ki Ta-i Ahom ki la shna ia ki moidam, lane “ka iing na ka bynta ki mynsiem,” da kaba pyndonkam ia ki lum, ki khlaw bad ka um ban tei ia ki jaka ba kyntang.
Ki jaitbynriew Tai- Ahom ki ngeit ba ki syiem jong ki kilong kiba riewblei, kaba ialam sha ka jingseng ia ka dustur tep briew kaba kyrpang: ka jingshna ia ki Moidam, lane ki lum ba rit ban tep ia ki syiem.
La shna ia ki Moidam ki dieng, bad hadien da ki maw bad ki maw-it, ka jingshna ia ki Moidam kalong kaba bniah bha ia kaba la batai ha ka Changrung Phukan, ka jingthoh jong ki Ahom. La pynlon gia ki jinglehniam kiba pyni ia ka jinglong jingman jong ka imlang sahlang ki Tai – Ahom.
Ka Archaeological Survey of India bad ka Assam State Department of Archaeology ki la iatreilang ban pynneh pynsah ia ka burom jong ka Choraideo, wat hapdeng ki jingeh na ki nongwad ksiar ha kaba sdang jong ka spah snem ba 20. La iada hapoh ki ain jong ka ri bad ka jylla, la bteng ban pynneh pynsah ia kane ka jaka ban iada ia ka jingtei ia kine ki jaka bad ruh ia ka deiriti.
Ka jingialang ba 46 jong ka World Heritage Committee ha u 2024 ka peit bniah ia 27 tylli ki jingthep kyrteng na kylleng ka pyrthei, kynthup 19 tylli ki jaka ba iadei bad ka Deiriti, 4 tylli ki kiba la long lypa, 2 tylli ki jaka ba iakhleh bad 2 tylli ki jingpynkylla ia u pud u sam. Ki Moidam jong ka India- jaka tep briew ha ka por synshar Ahom ka la rung mynta u snem na India hapoh ka thup Cultural Property.
Ia ka jingplie paidbah ia ka jingialang kaba 46 jong ka World Heritage Committee la plie da u Myntri Rangbah duh Narendra Modi, ha ka jingiadonlang ka Audrey Azoulay, Director-General jong ka UNESCO, Dr. S. Jaishankar, Myntri ka Tnat External Affairs bad u Gajendra Singh Shekhawat, Myntri ka Tnat Deiriti bad Kam jngoh kai.
Ha kane ka jingialang la shim bynta ruh da ki Myntri ka Tnat Deiriti, ki Nongrah ktien na ki ri bapher bapher bad ki Myntri ka Tnat Deiriti na ki sorkar jylla.
