Shillong Naiwieng 15: ka jingsaphriang ka hamsaia ba yn nym don mluh ha 
iew ka la saphriang sted haduh katta katta ha kaba ki paidbah kila ia mareh ban thied mluh ha ka dor kaba heh ar shah na kaba juh thied.
U deputy Commissioner jong ka East Khasi Hills haba kren ha u SP News Agency u la ong ba kane ka dei tang ka hamsaia ki paidbah kim dei ban ngeit biej namar ka mluh ka don ha iew bad ka dor ka long kum ba juh long.
Na ka liang jong u DC u la ong ba ki paidbah ki dei ban pyntip sha ki bor jong ka District Adminstration ba lada lap ia kiba die tam ban kem ia ki bad ban pynshitom katkum ka ain. Na ka liang jong u DC u la phah ia ki magistriate ba kin leit ban wad ia ki briew kiba leh ia kane ka kam die tam dor.
Ban nym sngewthuh bakla ki paidbah la pynbna ba kam don kata ka jingduna mluh lyngba jong ki tynghung ka sorkar ha kylleng kane ka nongbah Shillong. La kyrpad ia ki paidbah ba kin ia treilang ha kane ka liang ban pyntip sha ki bor sorkar ban kem ia kiba die tam.
Mynta ka sngi ki bor sorkar ki la ioh ban kem ia u wei u nongkhaii ha Iewduh u ba la die tam ia ka mluh bad la rah ia u sha Lumdiengjri Police station, da kane ka jingkem ia u ka la pynkynjah jar.
Ki nong die lang ia ka mluh haba kren ha u SP News Agency ki la ong ba ki ruh kim tip ei ei ia kane ka jingjia, hynrei ka la pynlyngoh ia ki ba lajan baroh ki briew kiba don ha kudam jong ki ki pan mluh. Ka dor kaba ki die ka dei ka juh kumba ki juh die man ka sngi.
La ioh jigntip ba ki dukan shnong ha ki nongkyndong ki la bun kiba khang bad la wan ban ia mareh noh sha Shillong ban wan thied mluh bad kane ka long na jan baroh ki District East Khasi Hills, Ri Bhoi, South West Khasi Hills and West Khasi Hills District. (SP News)
