Shillong, Naiwieng 11: : Ka Sei La Sap FCC bad Mawkhar SC, ki la ioh ba kin khur ia ki nam jop ba nyngkong ka jong ki, ha ka lympung ialehkai jong ka SSA Champions Cup 2026, ha ki jingiakhun kiba la long mynta ka sngi Balang jong ka taiew, ha SSA Stadium, Polo bad lyngba kane ka jingjop ka jingkhang ka dang plie lad ia ki ba kin buh ialade ha ka thong ban iaknieh rung sha ka semifinal.
Na ka liang ka Sei La Sap, ka la hap ba kan kham kyntiew bha ia la ka rukom ialehkai ka jong ka hadien bakan shah tam shwa shakhmat hynrei ba kan lah pat ba kan pynliem noh ia ka Sohryngkham da 4-2.
Hynrei shwa ban sdang kane ka jingiakhun, ki bor ka mei mariang ba kynthup ia u lyer u slap bad u phria, ki la wan ban ther tyngeh shipor ia ka nongbah hi baroh kawei, kaba pynlong ia kane ka jingiakhun ban hap ban sdang shiteng kynta hadien ka por ba la buh.
Hynrei kane kam shim la pynduh mynsiem ia ka kynhun ialehkai ka Sohryngkham hadien ba ka la lap ba ka ioh ba kan pynkhih nyngkong ia ka jar lyngba u Damanglangki Makdoh (2’).
Hynrei ka Sei La Sap ka la minot bad iakhun tyngeh ha ka buit ka bor ka jong ka bad dei tad haba wan ban bteng ia ka kylla miet, ba ka la ioh ia ka kabu ba kan pynphai sha ia kane ka shi kol ba ka la shah tam shakhmat lyngba u Kennyson Khyriem (49′) bad hadien kane, ka la ioh ia ka kabu ban tam kylla pat shakhmat da ka jingioh ban thep ia ka kol kaba ar lyngba u Freestar Kharbangar (75th).
Pynban ka jinglah ban tam shakhmat kam shim la neh slem hadien ba u Bankynshew Warjri (79’) ka Sohryngkham u la ioh ban thep ia ka kol kaba ar.
Hynrei ka por ban ialehkai ka dang sah, kaba plie lad ia ka Sei La Sap ba kan sei lut ia ka buit ka bor ialehkai ka jong ka tad haduh ba kan da ioh ba kan thep sa ia ki ar kol kiba sah ki jong ka lyngba u Eddiesius Kharkongor (85’) bad u Melbertson Kharbangar (90’+6) kaba la biang pura ia ka ban khur ia ka jingjop.
Hadien kane, ka kynhun ialehkai ka Mawkhar ba kan mih madan ban iakhun pyrshah ia ka Sanmer bad ban jop ia kane ka jingiakhun da 2-1.
Ia ki kol ka Mawkhar SC, la thep ia ki lyngba u Vobisterfield Marngar (35’) bad Mackiven Shyrkon (69’) katba ia ka shi kol ka Sanmer la ioh ban thep ia ka da u Isharwer Mukhim (71’).
Naka liang ka kynhun ialehkai ka Sanmer, ka la pyrshang kat lah kat iai ban jop ia kane ka jingiakhun, hynrei ha kaba kut kam shim la lah ba kan pynurlong ia la ka jingthmu ka jong ka, hynrei ban pdiang ia ka namrem kaba ar ka jong ka ha kane ka lympung, kaba wan ba haka jingiakhun ba nyngkong ka la shah liem noh hakhmat ka Shillong Lajong FC da 1-0.
Ki jingiakhun ban wan jong kane ka lympung kan dei haduh ka sngi Saitjain bad ha ka por 11 baje mynstep ka Lajong kan iakhun pyrshah ia ka Sei La Sap ban bynrap pat da ka jingiakhun hapdeng ka Mawlai SC pyrshah ia ka Mawpdang SC kaban long ha ka por 2:30 nohphai sngi.
