Shillong, Naiwieng 11: Ki dkhot ka Joint Action Committee ba pyrshah ia ka Shillong Ropeway Project kila kynnoh ba u bah Sanbor u la mih jyndat na ka jingialang kaba u la khot mynta ka sngi 11/ Naiwieng/2026 ha State Convention Centre.
Kawei na ki longkmie kala iathuh ba ha ba sdang jong ka jingialang u nongmihkhmat ka South Shillong u bah Sanbor Shullai u la ong ba to kin ia kren kum shi iing shi sem bad u la pule ruh ia ka jingthoh bad hadien ba la pule ia ka jingthoh u la ong ba u buh ia kane ka mat jingiakren ha khmat jong ka jingialang hynrei kiba la ioh kren ki long tang ar ngut.
Ha kane ka jingialang la khot lang ia baroh ki nongkitkam shnong jong ki hynniew tylli ki dorbar, kumjuh ia ki seng samla jong ki hynniew dorbar, ia ka Seng Khasi na Laban hynrei u khlem ai lad ban kren bad u la phet jyndat na ka jingialang.
Kawei na ki longkmie kala ong hato kane ka jingkhot ka long ban niew bein ia ki bad kane ka jinglong ka jong u bah Sanbor ki khein u long u ba la rem lypa ha khmat jong ki lada u leh ha kato ka rukom um don hok ban khot ialade u nongmihkhmat kumno u phet haba ka jingialang kam pat sdang bha.
Haba u bah Sanbor Shullai u myntri ka sorkar bad u MLA jong ka Shillong South u la mih na ka jingialang kala don ka jingpyrshang ban ker ia u sawdong da ki riew paidbah hynrei na ka liang jong ki PSO kila synran ia u ban poi sha ka kali ban mih na katei ka jaka.
