Shillong, Risaw 09: U Myntri Rangbah ka jylla u Conrad K Sangma mynta ka sngi u la leit ban jurip ia ka Chokpot Civil Sub Division kaba la sha ktah ha ka jingshah pynjulor ha ka mariang ha kine ki sngi bala jur ka jingslap.
U Myntri rangbah ka jylla u la leit ban jngoh ia ka Reni Badimagre ha kaba ka jingkieng iaid kjat ha ka wah Dareng ban leit sha Bibragre kala shah pynjot, kane ka jingkieng kala khyllem na ka daw jong ka jingjur jong u slap bad kala ktah ia ki paidbah nongshong shnong.
U myntri rangbah u la leit ban jngoh iaka skul Mount Carmel School kaba don ha jan iew Chokpot kaba la shah ktah ha ka jingshlei um, wat la ka iing skul kam shym la shah ktah hynrei ki kot, ki miet shuki kila duh.
La leit ban jngoh ruh ia ki iing kiba la shah pynkot ha ka shnong Bibragre, Chokpot ha kaba kila don 20 tylli kiba la shah pynjot ha kaba la sam ia ki tin sop iing na ka bynta kiei ki iing.
Ha ka shnong Rongrakgre kila don 38 tylli kiba la shah ktah bad 24 tylli kiba la julor ha kane ka shnong ruh la sam ia ki tip sop iing, la leit ruh ban jngoh ia ka shnong Gonganggre ha kaba 27 tylli ki iing kila shah ktah bad 10 tylli kila julor bad ia ki ruh la ai ia ki tin sop iing.
Ha ka shnong Daramgre ki iing kiba la shah ktah ki don 7 tylli bad lai tylli kila julor, la leit ban jngoh ia ka madan ialehkai kaba la dap da ka ktieh na ka daw jong ka jingshlei um bad u la leit ban jngoh ruh ia ka jingkieng ha ka wah Dareng kaba pyniasoh bad ka shnong Rongrikkimgre kum juh sha ka shnong Dikronggre.
