Shillong, Risaw 17: U Bah John F Kharshiing, uba dei u wei napdeng 8 ngut ki Vice President jong ka National Rifle Association of India (NRAI) u la ïashimbyntalang ha ka jingïasyllok halor ka Draft National Sports Governance Bill, 2024 kaba la khot da ka tnad Ministry of Youth Affairs and Sports, Govt of India, ha ka 17 tarik October 2024 ha New Delhi.
Ha katei ka jingïalang la ïoh ban pynsngew ba ka long kaba donkam ïa katei ka bill ban ithuh ïa ki State Olympic Association kaba long kum ka shatri ïa kiba bun ki kynhun ïalehkai Olympic hapoh jylla.
La pynsngew ruh ha ka jingïakren bad u Dr Mansukh Mandaviya, Minister, Union Ministry of Youth Affairs and Sports, Govt of India ba kam long kaba suk ban pyntreikam ïa ki aiñ ha man ki District kumjuh ha kaba ïadei khamtam bad ka jingïalehkai ïa siat namar tang ki Shooting Range ruh kim don bad kumta ka lah ban ktah kylla ïa ki jingialehkai.
Ka juh ka sur la mih na ka kynhun Gymnastics, Golf kiba la pynpaw ka jingeh namar ka jingbym biang ki jaka ïalehkai ha ki District kumta ka jingkyrpad ka la long ban kyntu ïa ka sorkar India ban pyrkhat bha kumno ban leh haba kum kine ki jingeh ki don.
U Bah John F Kharshiing, u la pynpaw ruh ba katei ka bill ka dei ban don ka jingbatai shaphang ki State Olympic kiba long ki tnad ka IOA hapoh ki jylla namar khamtam baroh kiba ïoh leit sha ka National Games ki hap ban thep kyrteng lyngba ka State Olympic Association bad ki long kiba ïa trei jan bad ki sorkar jylla ha kaba kyntiew ïa ka Sports ha ki jylla.
Ka Dr P T Usha, President, IOA ruh ka la pynsngew ba ka long kaba donkam ban pynpaw shai ka hok jong ki State Olympic bad ka la pynpaw ïa ka jingdonkam ban ïoh jing ithuh ïa ka Bill kaba mynjur da ka International Olympic Committee.
Kiwei kiwei ki nongkren ba bun na ki National Sports Federation ki la ia pynpaw ia la ki jingaijingmut. Ia katei ka jingiasyllok la pyniïid da u Dr Mansukh Mandaviya, Minister, Union Ministry of Youth Affairs and Sports, Govt of India, ha ka jingiadon lang ki officer long heh na ka tnad Sports.
U Myntri u la pynpaw ïa ka jingdonkam ïa katei ka Bill ban pynbeit ïa ki jingklumar ki mukotduma, ha kiba bun ki kynhun ia lehkai ka Ri India bad u la ai jingmut ba la donkam ruh ban wanrah da ki rukom kiba kham pyhlla kumno ban wad ïa ki sap ki samla.
Kane ka long khnang ban ïoh ïa kiba kynsai bad ban pyrkhat hangno ban buh ïa ki lada lap ïa kum kita ki samla, kum shi bynta ban ïoh pynkhreh ïaka Ri India na ka bynta ka thong ban pynlong ïa ka Olympics ha u snem 2036 hapoh ri India.
