New Delhi, Lber 17: Kane ka long ka jingiakren u myntri rangbah duh jong ka Ri India u Narendra Modi bad u U Lex Fridman u la shah jingit 45 kynta na ka bynta ka jingïakren bad u Modi; U Myntri Rangbah duh Modi u la iathuh ia ka jingshem jong u ha kaba ia dei bad ka jingshah jingit.
U Lex Fridman, u la pynpaw ba u la shah jingit haduh 45 kynta, da kaba dih tang da ka um, kum ka jingburom ia ka jingiakren jongu bad u myntri rangbah duh jong ka ri, u Narendra Modi. U Modi u la ïasam ruh ïa ka jingshem jong u halor ka jingleh niam, da kaba pynksan ïa ki jingmyntoi jong ka ha kaba pynjanai ïa ki jingsngew, pynbha ïa ka jingshai jingmut jingpyrkhat, bad pynrung ïa ka jinglong ryntih.
U la batai ba ka jingleh niam ka dei ka rukom stad saian ym kaba shu kiar ia kabam bad ka don ka jingïadei kaba jan bha bad ki rukom leh tynrai bad ki rukom Ayurveda. U Modi u la kdew ba u dih um bha shwa ban leh niam ban iarap ha ka jingpynkhuid ia ka met. U la kdew ruh ban ïa kaba suki ha ka kam, ka jingleh niam ka pynlong ïa u ban kham ïoh bor bad ka ailad ïa u ban trei kham shitom shuh shuh.
U Myntri Rangbah duh Modi u iasam ia ki jingiathuhkhana na ka jinglong khynnah ba leh rit jong u bad kumno ka jingduk kam shym la long satia ka jingeh ia u, U Modi u la kren shaphang ka jinglong khynnah kaba leh rit jong u, da kaba ïasam ba watla u la san ha ka jingduk, um shym la sngew ïa ka jingkhia jong ka. U la kynmaw kumno wat hapdeng ki jingeh, um ju mad ia ka jingsngew ba la duna.
Da kaba kynmaw sngewtynnad, u la kdew kumno ba shisien u kni jong u, u la ai sngewbha ia u ia ki juti canvas balieh, kiba u la pynkhuid bha da kaba pyndonkam ia ka maw thoh ba la bret na skul. U Modi u la ban jur ba u pdiang ia man la ka bynta jong ka jingim da ka jingsngewnguh bad um ju shim ia ka jingduk kum ka jingeh.
U Modi u kren halor ka jingktah kaba u Swami Vivekananda u la wanrah ha ka jingim jong u, U Modi, u la iathuh ba ha ka por ba u dang khynnah, u ju leit sha ka Library jong ka shnong, ha kaba u ju pule shaphang u Swami Vivekananda, bad ba ki jinghikai jong u, ki don ka jingktah kaba khraw ha ka jingim jong u.
Na u Vivekananda, u la ïoh jinghikai ba ka jinghun kaba shisha kam wan na ki jingjop shimet hynrei na ka jingshakri khlem da pyrkhat ïalade hynrei kaba phai sha kiwei pat. U Modi u la ïathuh ïa kawei ka khana na ka jingim jong u Swami Vivekananda ha kaba u leit bad kylli ïa u Sri Ramakrishna Paramahamsa ji ba ka kmie jong u ka pang bad u donkam jingïarap.
Ha kane u Paramahamsa ji u la ai jingmut ia u ban leit sha ka Devi Kali bad ban pan jingiarap. Kane ka jingjia ka la pynlong ia u Vivekananda ji ban sngewthuh ba kumno un pan ei ei na ka jinglong blei kaba la dep ai lut ia ka pyrthei, da kaba sngewthuh ba ka jingshakri ia ka jinglong briew ka long ka rukom aiti kaba ha khlieh duh sha ka jinglong blei.
U Modi u kren shaphang ka jingiadei kaba jan jong u bad u Swami Atmasthananda ji. U Modi, u la pynkynmaw ia ka por ba u don ha Ramakrishna Paramahamsa Ashram, ha kaba u la iakynduh bad ki riewkhuid bad u la ioh ia ka jingieid kaba khraw na ki.
U la ioh ia ka jingiadei kaba jan bad u Swami Atmasthananda, uba la long ka bor kaba khraw ha ka jingim jong u. U Swami Atmasthananda u la ai jingmut ia u ba ka jingthmu bashisha jong u ka long ban shakri ia ki briew bad ban trei na ka bynta ka bha ka miat jong ka imlang sahlang.
Ka jingiadei jong u Myntri Rangbah duh Modi bad ka RSS, U Myntri Rangbahduh ka ri u Narendra Modi u la kren shaphang ka jingïadei kaba jan jong u bad kane ka seng, da kaba khot ïa ka kum ka Saubhagya (ka kabu) jong u ban long shi bynta jong kane ka kam kaba iaineh.
U la ong ba u sngew ba u long uba la shah kyrkhu ban ioh ia ka jingthmu jong ka jingim jong u bad ki jinglong ba kordor jong ka jingshakri khlem da pyrkhat ialade na ka RSS. U la iaroh ia ka bynta ba ka RSS ka leh ha kum kane ka jingheh ha ka pyrthei. U Myntri Rangbahduh u la pynpaw kumno ka RSS ka ai jingshakri ha ka pule puthi bad ka koit ka khiah ha ka rukom kaba heh ha kylleng ka ri.
U la kdew ia ka jingiapher hapdeng ki seng leftist bad ka seng RSS. “Ki seng treikam leftist ki ong ‘Ki nongtrei jong ka pyrthei, to iatylli,’ hynrei ka seng RSS ka ong ‘Ki nongtrei, to iatylli na ka bynta ka pyrthei.’ Kane ka pyni kumno ka RSS ka pynrung ia ki jinglong jong ka ha ka rukom treikam jong ka.”
U Modi u la iathuh shaphang ka jingiadei paralok jong u bad u Donald Trump, U Modi, u la ïaroh ïa u Donald Trump, halor ka jingshemphang jong u, ha ka por jong ka jingïalang Howdy Modi, ha kaba u la sngap bha ïa ka jingkren baroh kawei bad, wat hapdeng ki kyndon kiba iadei bad ka jingshngain, u la ïasnohkti lang bad u bad ïaid kylleng ka madan ban ai khublei ïa ki nongpeitkai.
U la sngewnguh ruh ia ka jingshaniah kaba u Trump u don ha u. Haba kren halor ka jingïadei kaba bha hapdeng jong u bad u Trump, u Modi u la pynpaw ba ka rukom treikam jong u Trump ka America First ka ïahap bad ka jingmut jingpyrkhat jong u kaba long Nation First bad ka Bharat First, kaba kyntiew ïa ka jingïatreilang kaba skhem hapdeng kine ki arngut ki nongïalam.
Jubab u Modi ia u Donald Trump uba khot ia u, u nongiasaid uba tbit, U Modi u la pynpaw ba ka dei ka jinglong ba khraw jong u Trump ban khot ïa u, u nongiasaid uba tbit bad ban ai khublei ïa u ha ki rynsan bapher bapher. Na ka bynta u Trump, ka dei ka America nyngkong, bad na ka bynta u Modi, ka dei beit ka Bharat nyngkong.
U Modi u la ong ba ha baroh ki rynsan u ieng skhem na ka bynta ka ka jingmyntoi jong ka India ha khlieh duh, khlem da thmu ban pynmynsaw ia kiwei pat. U Modi u la ong ba da kaba buh hakhmat eh ïa ki jingmyntoi jong ka jaitbynriew u shu pyndep ïa ka jingkhmih lynti jong ki 140 klur ngut ki nong India kiba la aiti ïa kane ka jingkitkhlieh ha u.
U Modi u kynmaw ia ka jingiakynduh jong u bad ka kynhun jong u Trump, U Modi u la kdew ba u Trump u dei uba pynleit jingmut bha ha ka samoi treikam jong u kaba mynta bad u la tei ïa ka kynhun kaba khlaiñ kaba u la ïoh ruh ïa ka lad ban ïakynduh.
Ha ka jingkren shaphang ka jingïadei kaba la slem jong u bad u Elon Musk naduh ba u long Myntri Rangbah ka Jylla, u Modi u la batai ïa ka jingïakynduh jong ki dang shen kum ka jingïakynduh kaba sngewtynnad bad kaba sngew jan, ha kaba la ïakren halor ka jingsngew shitrhem jong u Musk shaphang ka DOGE.
U Modi u pynpaw kumno ka jinglong jong ka DOGE ka la iahap bad ka jingpyniaid kam hapoh ka jingsynshar jong u, Haba kren shaphang ki jingpynkylla ba kongsan ha ka rukom synshar, u Modi u la ong ba hadien ba u la shimti ïa ka kam, ka sorkar jong u ka la ithuh bad weng noh ïa ki 10 klur ngut ki nongïoh jingmyntoi thok na ki skhim ai jingïarap.
La leh ia kane da kaba pynthikna ba ki jingmyntoi kin poi sha ki briew kiba dei lyngba ka Direct Benefit Transfer (DBT), kaba la pynduna ïa ka jingsepei pisa kaba ₹3 lak klur. Nalor kata, ka jingsynshar jong u ka la pynduh noh ïa ki 1,500 tylli ki aiñ kiba la rim bad palat 45000 tylli ki kam ba hap ban pyndep ban pynbeit ïa ka jingsynshar.
Pynshai u Modi balei ka pyrthei ka sngap ia ka ri India, U Modi u la pynskhem ba ka India, ka ri jong u Buddha bad u Gandhi, ka iasaid na ka bynta ka jingsuk ha ki jingiakynat. U la ban jur ba ka pyrthei ka sngap ia ka India namar ba ka ieng na ka bynta ka jingiatylli.
Haba kren shaphang ka jingïadei kaba bha jong u bad baroh arngut u Putin bad u Zelenskyy, u la pynpaw ba u lah ban kyntu ïa ka Russia ba ka thma kam dei ka jingpynbeit katba u pynkynmaw ïa ka Ukraine ba ki madan thma kim wanrah ïa ki jingpynbeit ba shisha. U Modi u la pynshai ba ka India kam dei kaba ym iashah iano iano hynrei ka ieng skhem na ka bynta ka jingsuk.
Ka jingai jingmut jong u Modi sha ka Pyrthei; Iehnoh ia ka jingialeh bad pdiang ia ka jingiatreilang, Ha ka podcast bad u Lex Fridman, u Modi u la ong ba hadien ka COVID-19, ka long kumba ka pyrthei kan sa ïatylli, hynrei ha ka jaka kata, ka la nang ïapra, ha kaba ki jingïakynat kiba bun jait ki la mih ha ka pyrthei baroh kawei.
U Modi u la ong ba ki kynhun jong ki ri ki la kylla long ki bym don jingmut shuh, bad ki seng kum ka UN kim lah ban pyndep ia ka jingthmu jong ki namar ba kim shym la iaid lyngba ia ki jingpynkylla kiba donkam. Ka pyrthei ka dei ban kynriah noh na ka jingialeh bad pdiang ia ka jingiatreilang. U la pynpaw biang ba ka roi ka parkan wan lyngba ka jingpynroi ym lyngba ka jingpyniar ia ki ri.
Kren u Modi shaphang ki jingkulmar ha Godhra ha u snem 2002, U Modi u la ong ba la pynsaphriang ia ka khana thok ha kaba iadei bad ka mukotduma Godhra. Shwa u snem 2002, ka Gujarat ka la sakhi palat 250 tylli ki jingkulmar, bad ki jingïakynat hapdeng ki jaitbynriew ki ju jia man ka por.
Kumjuh ruh u la iathuh kumno ka pyrthei ka dang sakhi ia ka jingkiew jong ki kam lehnoh bad ki kam thombor ha kito ki por. Hynrei naduh u snem 2002, ym pat don wat tang kawei ruh ka jingkulmar kaba kum kane ha ka jylla Gujarat.
U Modi u la ban jur ba ka sorkar jong u kam ju ïashim bynta ha ka kam saiñ hima sima da kaba leh shiliang iano inao hynrei ka bud ïa ka nongrim kaba ong “Sabka Saath, Sabka Vikas, Sabka Vishwas, Sabka Prayas.” U la pynpaw ruh ia ka jingshisha ba kumno ki briew ki la pyrshang ban pynjah burom ia u hadien ki jingkulmar hynrei khatduh ka hok ka la jop bad ki iingbishar ki la pyllait ia u na ki jingkynnoh ha kane ka jingjia.
Haba kylli shaphang ka jingsngew kynjah, u Modi u jubab ba um ju long marwei, U Modi u la ong, “Ngam ju sngew kynjah. Nga ngeit ha ka jingmut 1+1—uwei u dei u Modi, bad uwei pat u dei uba kynja Blei. Ngam ju sngew marwei shisha namar ba U Blei u don ryngkat bad nga man ka por.” U Modi u la bynrap ba na ka bynta jong u, ‘Jan Seva Hi Prabhu Seva’. U don ka jingkyrshan jong ki blei bad 140 klur ki nong India.
U Modi u kren shaphang kumno ka jingïohi jngai jong u Mahatma Gandhi ïa ka Jan Andolan ka ai mynsiem ïa man ka jingthmu jong u,U Modi u la kren shaphang ka jinglah jong u Mahatma Gandhi ban pynkylla ïa ka jingïaleh laitluid jong ka ri India sha ka Jan Andolan da kaba ithuh ïa ka bor jong ka Jan Shakti.
U la ong ba ha la ka jong ka rukom treikam, u ju ïaleh ban pynïasoh katba lah ïa kiba bun ki briew ha man la ki jingthmu, da kaba pynkylla ïa ka sha ka jingïakhih paidbah ryngkat bad ka Jan Bhagidari.
U Modi u la ban jur ba ka bor jong ka imlang sahlang ka long kaba khlem pud. U Modi u la ong ba u Mahatma Gandhi u dei u nongialam uba khraw tam ym tang jong ka spah snem kaba 20 hynrei wat jong ka spah snem kaba 21 bad ki spah snem ban wan ruh kumjuh.
U PM Modi u bataiia ka jingshem nyngkong jong u ha kaba iadei bad ka jingiadei bad kiwei kiwei ki ri ha ka por ba u long Myntri Rangbahduh, U Modi u la pynpaw ba ka bor kaba khraw tam jong u ka wan na ki 140 klur ngut ki briew jong ka ri India, kiba ieng kum ka bor ba wanrah ia ka jingkiew kyrdan ha ka pyrthei.
Haba pynkynmaw ïa ki sngi ba nyngkong jong u ha ka kam, u Modi u la ong ba ki briew ki ju artatien ïa u ba kumno u briew uba la pynïaid tang ïa kawei ka jylla u lah ban pynïaid ïa ki kam bar ri jong ka India kum u Myntri Rangbahduh. Ha kane, ka jubab jong u ka long kaba skhem bad kaba khlem jingartatien: “Ka India kan ym nguh ne byrngem ia kiwei pat. Ngin iakynduh bad ka pyrthei da ka jingshaniah, da kaba peit markhmat.”
U Modi u la ban biang ba ka rukom treikam jong ka India ha ka pyrthei ka dei kaba la ïalam da ka burom, ka jingburom ïalade bad ka jingburom markylliang. U la pynpaw ba hapdeng jong kane ka don ka saiñ pyrkhat hyndai jong ka ri India jong ka Vasudhaiva Kutumbakam—ka jingngeit ba ka pyrthei ka long kawei ka longïing bad ba ka jingaiti jong ngi ka long ka jingbha jingmiat jong ka jinglong briew baroh kawei.
U Modi u kren shaphang ka kam sain pyrthei kaba khlem shah rem bad ka jingjop jong ka BJP, U Modi u la ong ba um pyniaid ia ka jingsynshar kaba pynshong nongrim ha ka elekshon hynrei u pyniaid ia ka jingsynshar kaba pynshong nongrim ha ki briew. U la bynrap ba ka sorkar jong u ka bud ia ka polisi jong ka jingpyndap—ha kaba ki jingmyntoi ki poi sha baroh khlem da leh shiliang khmat.
Haba kren shaphang ka jingjop jong ka BJP, u la ai khublei ia ki million ngut ki nongtrei jong ka seng kiba trei khlem shongthait bad khlem da pyrkhat ialade, kiba aiti lut shisha na ka bynta ka roi ka par jong ka ri. U la ong ba u sngew sarong ban long u dkhot jong ka seng sain pyrthei kaba heh tam ha ka pyrthei kaba pynsaphriang ia ka jingkongsan jong ka jingai sha kiwei pat.
Ka jingai jingmut ba tyngeh jong u Modi ïa ka Pakistan, U Modi, da ka sur kaba skhem, u la kren shaphang ka bynta ba la slem jong ka Pakistan ha ka jingpynroi ïa ki kam lehnoh, da kaba pynksan ba ka pyrthei kam don shuh ha ka jingartatien shaphang shano ki tynrai jong ka kam lehnoh ki don.
U Modi u la pynpaw da ka jingsngewkhia kaba jur ba man ka por, ka Pakistan ka la kylla long ka jaka pdeng jong ka jingleh donbor, kaba la wanrah ïa ka jingjynjar kaba khraw ym tang ïa ka India hynrei ïa ka pyrthei baroh kawei. Da kaba pynpaw ïa ka jingsngewsih, u Modi u la pynpaw ïa ki jingpyrshang ba bun bad ba shisha jong ka India ban wanrah ïa ka jingsuk.
Naduh ka jingleit jong u sha Lahore haduh ka jingkhot ia ka Pakistan sha ka jingbamsmai jong u, man la ka jingpyrshang ban pyniasuk la iakynduh da ka jingshun. U Modi u la kynthoh ba ki paidbah ka Pakistan ki dei hok ban ioh ia ka lawei kaba lait na ka jingshah thombor bad jingtieng bad u la kitbok kitrwiang ba ka Pakistan kan ioh jinghikai na ki jingbakla jong ka bad kan jied ia ka lynti kaba dei.
U Modi u don ia ka jubab kaba kyrpang ha kaba jied mano ba kham tbit napdeng ki kynhun kriket jong ka ri India bad Pakistan. Haba kylli hato ka India ne ka Pakistan ka don ïa ka kynhun ïalehkai kriket kaba kham khlain, u Modi u la jubab ba um dei u riew shemphang ban bishar hynrei u la ai jingmut ba ka jingmih na ka jingïalehkai ba dang shen hapdeng kine ki ar tylli ki kynhun ka lah ban ai ïa ka jubab. (katba u kdew ba ka India ka la pynliem ia ka Pakistan ha ka ICC Champions trophy)
U Modi u jied ïa u Maradona kum u nongïalehkai phutbol ba ieid tam, u ïaroh ïa ka ‘Mini Brazil’ jong ka India, U Myntri Rangbahduh ka ri, u Narendra Modi, da ka jingsngewtynnad bad jingkynmaw, u la jer kyrteng ïa u Diego Maradona kum u nongïalehkai phutbol ba u ieid eh, da kaba pynkynmaw ïa ka jingtbit bym lah ban ïanujor jong une u rangbah, ka jingshitrhem kaba aibor, bad ka jingktah kaba jur ïa ka jingïalehkai.
Haba kren shaphang kawei ka jingjia kaba pynsngew um mynsiem kyrpang, u Myntri Rangbahduh u la kren shaphang ka jingleit jong u sha Shahdol ha Madhya Pradesh, ha kaba u la sakhi ïa ka jingieit ba phylla ïa ka phutbol hapdeng ki riewlum.U la batai kumno ki nongshong shnong ki ju khot sngew sarong ïa ka thaiñ jong ki kum ka ‘Mini Brazil’—ka dak jong ki tynrai ba jylliew jong ka jingïalehkai ha ka kolshor jong ki.
U Modi u ong ba ka spah snem kaba 21 ka dei ka spah snem jong ka Asia, U Narendra Modi, myntri rangbah duh, u la pynpaw ia ka jingiadei kaba jylliew jong ka kolshor hapdeng ka India bad ka China, da kaba kam ba ki jingiapher ki don, kumba long hapoh kawei ka longiing. Hynrei u Modi u la ban jur ba la pyrshang ban pynthikna ba kine ki jingïapher kim dei ban nang kiew sha ki jingïakynat.
U Modi u la ong ba ka jingiakren ka dang long ka lad ba kongsan ha kaba iadei bad ka jingiadei hapdeng ki ar tylli ki ri. U Modi u la kdew ruh ba ki jinglong jingman ha khappud ki la long kiba thikna.
U Myntri Rangbahduh u la ong shuh shuh ba watla ka jingïakhun hapdeng ki ri ka long kaba ju don, hynrei dei ban kiar na ka jingïakynat khnang ban pynneh ïa ka jingsuk bad ka jingkiew shaphrang.
U la ong ba ka spah snem kaba 21 ka dei ka spah snem jong ka Asia bad ka jingiadei kaba bha hapdeng ka India bad ka China kam dei tang kaba myntoi hynrei ka long kaba kongsan na ka bynta ka shongsuk shongsain bad ka roi ka par ha ka pyrthei.
Ka jubab jong u Modi ia kito kiba kren pyrshah ia ka jingmyntoi jong ka Ri, U Myntri Rangbahduh ka ri u Narendra Modi u la pynpaw ïa ka jingsngewkhia halor ka jinghiar jong ki jingïakren paidbah, da kaba ong ba ïa ka jingïatai kaba don jingmut la bujli noh da ki jingkynnoh ba khlem nongrim ba la leh khlem ka jingwad bniah ne ki jingshisha.
U Modi u la ban jur ba ka jingkynthoh, haba la kyrshan da ka jingmut bad ki sakhi, ka don ka bynta kaba kongsan ha kaba thaw ia ki polisi bad pynkhlain ia ka synshar paidbah. Hynrei u la ong ba ha ka jaka ban ïashim bynta ha ka jingbishar bniah, bun ki pyndonkam da ki lad lyngkot da kaba kynnoh lypa khlem kano kano ka jingpyrshang ban pynshisha ïa ka jingshisha.
U Modi u la ban jur ba ka jingkynthoh kaba la pynbeit bha bad kaba kyrpang ka don ka bynta kaba kongsan ha kaba thaw ia ki polisi kiba treikam. Hynrei u la kdew ba don ki riew shimet kiba treikam da ki jingthmu ba pher bad ka jingthmu kaba bakla, da kaba pyndonkam ïa ki jingtip kiba bakla kum ka atiar ban ïalam bakla ïa ki briew.
U Modi u batai kumno ki jingpyrshang jong ka pyrthei ban kyntiew ia ka AI kim long kiba pura khlem ka India, U Modi u la ban jur ba wat la ka pyrthei ka kiew katno katno ruh ha ka AI, hynrei kan ym pat biang khlem ka India. U la pynpaw ba ka AI ka dei shaphang ka jingiatreilang, bad ka India ka ai ka jingnoh synniang kaba khraw ha ka jingkyntiew jong ka.
Ka India kam dei tang ba ka noh synniang sha ka jingpynmih ia ka AI hynrei ka thaw ruh ia ki lad AI kiba iadei bad ki jingpyndonkam ba kyrpang. U la ong ba ka jingtbit jong ka India ban pynbeit ïa ki jingeh bad ka jinglah ban pyrkhat bniah ka long kaba lah ban iaid bha ha ka pyrthei, kaba pynlong ïa ka ri kum ka bynta kaba kongsan ha ka jingkylla ha ka AI.
U Modi u jubab ia ka jingkylli shaphang ka Artificial Intelligence pyrshah ia ka jingstad briew, U Modi u la pynpaw ba ha ka histori baroh kawei, la ju pyni ïa ka teknoloji kum ka jingeh kaba khraw tam jong ka jinglong briew. Hynrei man la ka por, ka teknoloji bad ka jinglong briew ki la nang kiew, ha kaba ki briew ki ju don shi sienjam hakhmat. U la ban jur ba watla ka AI ka long kaba donbor, hynrei ka lah ban ym ïahap satia bad ka jingjylliew jong ka jingmut jingpyrkhat jong u briew.
U Modi u krenshaphang ka jingaiti lut jong u sha ka kam paidbah, U Myntri Rangbahduh Narendra Modi u la kren shaphang ka jingsngew kitkhlieh kaba jylliew jong u ïa ki paidbah, da kaba pynksan ba ka jingshaniah paidbah ka la long ka bor kaba khraw tam jong u ha baroh kawei ka jingïaid lynti jong u ha ka saiñ hima sima. U Modi u la ong ba naduh ka sngi ba u rung ha ka kam saiñ pyrthei, u la kheiñ ïa ki paidbah kum ki kynja blei bad u la trei da ka jingaiti lut ban pynthikna ba ka jingngeit jong ki ha u kan ym duh satia.
Da kaba batai ha ka rukom kaba phylla, u la ianujor ia ka jingshakri jong u bad ka jingshakri jong u nongmane uba pyndep ia ki kam kyntang, da kaba ong ba kumba u lyngdoh u mane ia ka jinglong blei da ka jingaiti kaba khlem artatien, u sah hapdeng ki briew, u shakri ia ki da kajuh ka jinglong ba shisha bad ba aiti lut.
U Modi u jubab haba la khot ia u kum u nongialam ba donbor tam ha ka pyrthei, U Narendra Modi, myntri rangbah duh, ula ban biangia ka jingshimkhia jongu, ha kaba u iohi ialade, kum u ‘Pradhan Sevak’. U Modi u la ban jur ba ka bor kam ju long ka jingthmu jong u, bad um ju pynleit jingmut ha ki kynjnit kynjnat jong ka kam sain pyrthei. Ha ka jaka kata, ka jingpyrkhat jong u ka long beit tang ha ki kam kiba don jingmut kiba ai jingmyntoi beit beit ia ki paidbah.
Da ka jingthmu kaba shai na ka bynta ka jingsynshar, u Myntri Rangbahduh u la pynpaw ba ka thong jong u ka long ban long uba kyrshan ïa ka kam, ym uba donbor. U la ban jur ba ka jinglong nongialam kaba shisha kam dei shaphang ka bor hynrei ka dei shaphang ka jingaiti lut ha ka jingshakri, ban pynthikna ba man la ka jingleh kan noh synniang sha ka jingkiew jong ka ri bad ka jingbha jingmiat jong ki nongshong shnong jong ka.
U Modi u batai shaphang ki lai tylli ki kyndon na ka bynta ka jingbishar bniah ialade, U Modi u la batai shaphang ki lai tylli ki kyndon ha kaba u bishar bniah ialade. Nyngkong eh, un ym kynran dien satia na kaba leh ia ki kam kiba eh. Kaba ar, un ym leh ei ei da ka jingthmu kaba bakla.
U lah ban bakla, hynrei ym ju bakla da ka jingthmu kaba bakla. Bad kaba lai, un ym leh ei ei tang na ka bynta lade. U la bynrap ba ka jingsngewhun kaba shisha ka wan na kaei kaba phi ai sha ka imlang sahlang ban ïa kaei kaba phi ïoh bad pynurlong.
Hato u Myntri Rangbah u sngew jynjar? U MyntriRangbah duh u iathuh ia ka jingioh mynsiem na ka bynta ka jingpyrshang ba khlem sangeh jong u, U Myntri Rangbahduh ka ri u Narendra Modi u la ban jur ba ïa ka jinglong nongïalam ba shisha la tei halor ka jingtrei shitom bad ka jingkitkhlieh.
U Modi u la kdew ïa ka jingpyrshang ba khlem sangeh jong ki nongrep, ki kynthei, bad ki nongtrei ha kylleng ka ri, da kaba ong ba kum u nongïalam, ma u ruh u dei ban ïai bteng ban aiti pura. U Modi u la ïasam ba ka jingshaniah ba la buh ha u da ki paidbah ka pynshlur beit ïa u ban ai ïa kaba bha tam.
U Modi u pynpaw ia ki nongrim jong ka rukom shim rai jong u, U Myntri Rangbahduh ka ri u Narendra Modi u la kren shaphang ka rukom treikam jong u ha ka kam nongialam, da kaba pynksan ba u kloi ban bahkhlieh ia ki jingma na ka bynta ka ri khlem da khuslai ia ka jingduhnong shimet.
U la pynpaw ba haba ka rai ka long kaba dei na ka bynta ka ri India, u iaid shakhmat da ka jingsngewskhem kaba pura, khlem da artatien. U Modi u la pynpaw ba ka jinglong nongialam ba shisha ka shong ha kaba shim ia ka jingkitkhlieh. U la batai ba haba u nongialam u long trai ia ka kam, ka wanrah ia ka jingaiti lut hapdeng kito kiba trei ryngkat bad ki.
U Myntri Rangbahduh ruh u dei u briew; U lah ruh ban bakla hynrei ym ju leh da ka jingthmu kaba bakla, Da kaba ong ba ki jingbakla ki lah ban jia, u Modi u la kren shai ba watla u lah ban bakla, hynrei un ym leh satia da ka jingthmu kaba bakla. Kawei pa kawei ka jingleh jong u, u la ong, ka long kaba la ialam da ka jingkwah kaba shisha ban shakri ia ka ri.
U Modi u la ai jingmut ia ki samla pule ba ki eksamin kim batai ia ka bor ba shisha jong ki, U Myntri Rangbahduh ka ri u Narendra Modi u la ban jur ba ym dei ban shim ïa ki eksamin kum ka jingtynjuh kaba khatduh ïa ka bor jong u khynnah skul. U Modi u la ong ba lyngba ka Pariksha Pe Charcha, u la ioh ia ka kabu ban iakynduh bad ki samla pule, ban sngap ia ki jingeh jong ki, bad ban sngewthuh ia ki jingmut jong ki halor ka pule puthi.
U Myntri Rangbahduh u la ban jur ba tang ki mark ha ki jingpulekim lah ban batai ia ka bor ba shisha jong u samla pule. Ha ka jaka kata, u la pynshlur ia ka rukom hikai kaba kham jylliew — kaba pynroi ia ka jingstad, ka jingkwah tip bniah bad ki jingtbit bashisha.
U Modi u la pynkynmaw ia ki samla pule ba watla ki eksamin ki long kiba kongsan, hynrei ki dei tang ka bynta kaba rit jong ka jingiaid lynti kaba kham heh jong ka jingnang jingstad bad ka jingkyntiew ialade.
Jubab u Modi ia ka jingkylli hato u tieng ne em ia ka jingiap, U Myntri Rangbahduh ka ri, u Narendra Modi, u la kren shaphang ka jingthikna jong ka jingiap, da kaba pynksan ba ha ka jaka ban sheptieng ia ka, dei ban pynleit jingmut ha kaba pynlong ia ka jingim kaba don jingmut. U Modi u la ong ba watla ka jingiap ka long kaba ym lah ban kiar, hynrei kaba kongsan shisha ka long kumno ban im ia ka jingim.
U la kyntu ia ki briew ba kim dei ban pynlut por ha ka jingkhuslai hynrei ban pyndonkam ia ka bor jong ki ban pynseisoh ia ka jingim jong ki bad ban noh synniang bha sha ka pyrthei. U Myntri Rangbahduh u la ban jur ba namar ba ka jingim kam long kaba thikna, man la ka khyllipmat dei ban pynlut da ka jingthmu, ka jingpule, bad ka jingpynkylla.
U Lex Fridman bad u Modi ki ïakren halor ka jingmut ba kham jylliew jong ka Gayatri mantra, Ha katei ka podcast, u Lex Fridman u la kren shaphang ka Gayatri Mantra bad u la phai sha u Myntri Rangbahduh ka ri u Narendra Modi ban pynthikna ba ka jingkynnoh jong u ka dei kaba dei.
Ha ka jingkynthoh, u Myntri Rangbahduh u la pule hi ia ka mantra, da kaba iasam ia ka jingmut kaba kham jylliew jong ka. U Modi u la pynshai ba ka Gayatri Mantra ka don tynrai bha ha ka Surya Upasana bad ka don ka jinglong kaba jylliew.
U Myntri Rangbahduh u la pynpaw shuh shuh ba man la ka mantra kam dei tang ki kyntien hynrei ka don ka jingïadei ha ka saian, kaba pynpaw ïa ki bynta bapher bapher jong ka jingim bad ka pyrthei. U la pynksan ba ki riti dustur jong ka ri India hyndai ki pyniasoh lang khlem jingeh ia ka jingngeit bad ka saian, da kaba ai ia ka jingstad kaba shirta ia ka jinglong briew.
