Shillong, Lber 17: Ki nongtrei bank hapoh ka shatri jong ka United Forums of Bank Unions Meghalaya State Unit ha ka janmeit jong ka 17 tarik u lber ki ka pynpaw ia ka jingiakynduh jingeh jongki namar ka jingbym patiaw jong ka sorkar pdeng halor ki jingdawa jong ki.
Haba kren ha ki lad pathai khubor u General Secretary ka kynhun u bah Devis Lyngdoh u la pynpaw ia ka jingiakynduh jingeh jong ki kum ki nongtrei bank ha kylleng ka Ri India baroh kawei.
U la pyntip ruh baka kynhun jong ki ka pynbna syndon, ba kin pynlong da ka jingiakhih hapoh ka jylla, da kaba kin pynlong ka jingsangeh treikam habaroh ki bank sorkar bad kynthup katto katne ki bank jong ki riew shimet hapoh ka jylla bad ka ri India baroh kawei.
U bah Devis Lyngdoh u la ong ba kane ka jing iakhih jong ki, kam dei na ka bynta ki nongtrei bank, hynrei ban dawa ia ka sorkar ban pynrung bun ki nongtrei ha ki bank, namar kum ba long mynta ki nongtrei hapoh ki bank ki duna bha bad haba ki nongtrei ki duna ka jingshakri ia ki paidbah ka duna, u la ong ruh ba ki bank hi ki dei kiba shakri ia baroh khlem da peit shilliang ia ka kiba duk ne ba riewsphah.
