Shillong, Nailar 01: Ka kynhun ki nongdie madan harud surok kiba don ha ka shatri ka Meghalaya Greater Shillong Progressive Hawker and Street Vendour Association hynne ka sngi ki la leit tur ha khmat ka ophis Shillong Municipal Board ban pynpaw ia ka jingbym hun jong ki ia ka rukom ai COV.
Ha kane ka jingleit ban tur ha khmat ka khyrdop ka Shillong Municipal Board la ialam da ka nongaibuit ka Meghalaya Greater Shillong Progressive Hawker and Street Vendour Association ha kaba da ki spah ngut ki nongshong die madan harud surok ki la pynlong ka jingrah ia ki jingthoh ba pher ba pher kaba pynpaw ba kim hun ia katei ka rai ba la pynbeit dang ha kine ki khyndiat sngi ba la dep.
Ka kong Angela Ryngat haba ioh ban iakren ka la ong ba ka jing leit tur jongki ha katei ka jaka mynta ka sngi ka long ban pynpaw ka jingbymhun halor ka jingbym ioh COV kiba dei hok ban ioh, ban dawa ruh ba ka Shillong Municipal Board ka dei ban khot pynlong da ka PTVC metting khnang ban ioh iakren pynbeit bad kan shai ka rukom ai COV.
Hadien katto katne por ba ki paitbah nongshong die madan ki la pynlong ka jingshong kyllaiñ mngor ha khmat ka khyrdop ka Shillong Municipal Board ki la ioh ban ia kynduh bad ki bor pyniaid ka Shillong Municipal Board bad ka kong Angela Ryngat ka la pynpaw ba ki la ioh da ka jingthoh ba kular ba ha ka 6 tarik u August yn sa pynlong ia ka PTVC metting.
