Shillong, Kyllalyngkot 15: Ka Hynniew Trep A.chik National Movement (HANM) Garo Hills Region ka pynrem jur ïa ka jingpynïap bad thang ïa u dkhot ka ACHK NGO, uba la khlad noh u Dilseng M Sangma ha ka 9 tarik u Kyllalyngkot ba la leit ha ka jaka ba la tip kum ka Goalgaon da ki briew na Bangladesh bad ngi kyrpad jur ïa ka Tnad Pulit ka HANM Garo Hills Region ba kan pynlong ka jingtohkit kaba stet ïa kito kiba donkti bad ban pynshitom ïa ki katkum ka aiñ.
Ka seng ka kyrpad jur ïa ka Sorkar Pdeng bad ka Sorkar Jylla ba kan pyntreikam ïa ka Inner Line Permit (ILP) ha ka Jylla Meghalaya ban khanglad ïa ka jingwan rung bad shong shnong be-aiñ jong ki mynder ri. Kaba ngi la dep ban ai ïa ki Memorandum ha u Snem 2019 ha u Myntri Ka Tnad Kam Ïing ha New Delhi ban pyntreikam ïa ka ILP.
Ha u snem 2025 ruh ngi la leit biang sha New Delhi ban ïakynduh bad kyrpad ïa ki nongïalam ka Sorkar Pdeng. Hynrei, haduh mynta ruh, namar ba ym pat pyntreikam ïa ka ILP, kum ka seng ka da kyrpad jur ïa ka Sorkar Pdeng bad ka Sorkar Jylla ba kan pyntreikam kloi ïa ka ILP khnang ba baroh ki briew kiba shong ha ka Ri kin ïoh shong suk bad shngaiñ.
