Shillong, Risaw, 24: Mynta ka sngi ka 24/Risaw/2026, ka seng nonghikai kaba la tip kyrteng kum ka Meghalaya Unified Teachers’ Association kala pynlong iaka jingialang paidbah ha madan student ha Jaiaw ban iakren bad ban pynskhem iaki nongkit kam kane ka seng ki nonghikai.
Haba kren ha kane ka jingialang paidbah u President ka seng, u bah Aristotle Rymbai u la ong ba ha kine ki por ba la dep ki nonghikai ki don ha la ka jong ka jong ka seng bad haba ki leit ban iakren bad ka sorkar ki iakren beit tang na ka bynta jong ki hynrei mynta kila wan ha kawei ka kynhun bad haba ki kren, ki kren na ka bynta jong baroh.
Ha kane ka sngi u President u la ong ba kane ka skhim Sarvashiksha Abhiyan sa katto katne bnai kan sa kut noh kumta, kim lah ban tip kaei kaban jia dei na kane ka daw ba ki dawa ba iaki nonghikai SSA dei ban pynrung ha kane ka “Structure Pay Framework”, kane ka dei kaba la pdiang da ka cabinet.
Dei hadien ba mih kane ka rukom siew kaba thymmai iaka tulop ki nonghikai ba ki kynhun seng bapher bapher jong ki nonghikai kum ki nongialam kila iakynduh la bun sien bad dei ha u Naitung mynta u snem, ki sa seng ia kane ka seng ki nonghikai, ka MUTA.
Kum ka seng kala dep ban phah iaka jingthoh sha u Myntri Rangbah ka jylla, u Conrad K. Sangma ha kaba kila dawa ba iaki nonghikai kiba la pynhap ha ka SPF dei ban pynrung ha ka 6th State Pay Commission, ka rukom shah ban shim shuti haba ioh khun dei ban long kajuh ia baroh, ka jingsiew haba pang ba shitom na ka bynta ki nonghikai.
Ha ka jingthoh ba kila phah sha u Myntri Rangbah ba ka sorkar ka dei ban plie iaka lad ba kin ioh iaka ram kum ka ram shna iing, thied kali, ka ram ban phah pule skul khun bad iaki nonghikai ba la rangbah ka sorkar ka dei ban ai ka jingiarap pisa kaba shisien, ka jingsiew iaki nonghikai SSA bad RMSA ka dei ban pyllait iaka tulop shisien siew kaba dei jong u bnai ba ki dei ban ioh.
