Shillong, Iaiong 15: Mynta ka sngi 15/Iaiong/2026 ka Seng Hynniewtrep Achik National Movement HANM jong ka Ri Bhoi District kala leit ban ia kynduh ia u Superintendent ka tnad Excise jong ka Ri Bhoi District u bah R.C. Lyngdoh ha kaba ia dei bad ka jingdon ki dukan kyiad ha 13 Mer Ri Bhoi District kiba plie ia ki dukan kyiad wat ha ka sngi u Blei.
Ia kane ka jingleit ia kynduh la ialam da u president ba shipor ka seng HANM ka Ri Bhoi District u bah Justine Marsharing bad ki dkhot jong ka seng kila iadon lang kane ka jingiakynduh ka long ban pan ia ka kaiphod hato ka ophis ka la leh aiu ia ki dukan kyiad kiba plie ha ka sngi u Blei.
U bah Masharing u la ong ba ha kane ka jingiakynduh u superintendent ka tnad Excise jong ka Ri Bhoi District u la pynsngew sha ki dkhot ka seng ba u la pyndep ia ka jingtohkit na ka liang jong u bad mynta u dang pynkhreh ia ka kaiphod ynda la dep pynkhreh ia ka kaiphod u la ong ba un sa khot biang ia ka jingiakren ia ki dkhot jong ka HANM.
U nongialam ka seng u la ong ba ka seng kan nym shong kli kti bad ban buddien ia kane ka kam ban pyntikna ba kan nym don ka jingdie kyiad ha ka sngi u Blei bad lada kane ka tnad Excise kan nym lah ban leh ei ka seng kan nym shong kli kti ha kajuh ka por u la ong ba kin sa leit sha District Council ban dawa ban pynduh ia ka Labour License.
