Shillong, Iaiong, 19: Ha ka sngi saitjian palat spah ngut ki briew ha ka shnong 
Nongdawah kaba hap hapoh jong ka Mawryngkneng kila pyniasoh sha ka party BJP ha ka jingialam ka kong Priambada Blah kaba dei ka District President ha ka jingdon lang ki nongialam ka party.
Ha kane ka jingialang ba pynrung dkhot sha ka party lang u State Vice President u bah Khrawboklang Basaiawmoit, State Executive Member bah David Kharsati, State Yuva Morcha President u bah Mewaker Lyngdoh, ha ka jingdon lang ki nongkit kam ka party.
Ha ka juh ka por ha kane ka sngi ka District President kala pynkup burom ia u Mandal President u bah Rimanbha Mukhim ba dang shah jied thymmai bad la ai ka jingkit bok hapoh ka jingialam jong u kum president ba thymmai.
Haba kren ha kane jingialang ka Priambada Blah kala kren ia ka jingkiew ka party BJP hapoh kane ka Mawryngkneng konstitwensi kane ka jingkiew ka party ka dei na ki kam pynroi kiba ka party kala trei ha kane ka jylla Meghalaya. Kala ong ba dang don bun ki briew na kane ka konstitwensi kiba kwah rung sha ka party BJP.
Kala ong ba kum ki nongialam jong ka party ki hap ban leit sha ki jaka bapher bapher ban ia kynduh ia ki nongtrei jong ka party bad kane ka dei na ka jingtreishitom ki nongialam ka party bad kane ka jingtrei shitom kan kyntiew ia ka party BJP ha u snem 2028.
