Shillong,Iaiong 26: Wat hapdeng ka jingpynthut ka mariang, pynban kane ka kam shim la khangad lad satia ïa ka mynsiem ki paid ka Seng Khasi bad Seiñ Raij Niamtre Shillong, kiba la mih shakhmat ban ïashim bynta sha ka jingpynkhuid ba shisien shi snem ïa u lum jingthang briew ba don ha Jaïaw, ïa kaba la pynlong ïa ka mynta ka sngi, ka 26 tarik u Ïaiong 2026, da ka Lum Jingthang Komiti ka Seng Khasi Kmie.
Kongsan ba la wan ban don lang bad ban plié ïa kane ka jingpynkhuid paidbah u ong u Rgh Ïarless Pde, President, Seiñ Raij Niamtre, Shillong, ha kaba la don lang u President bad General Secretary Seng Khasi Kmie u Rgh O. Pyngrope bad u Rgh Hainess Marbaniang, ki dkhot ka Jylli Pyrkhat Kam (JPK) Seng Khasi Kmie, ka Seng Kynthei, Seng Samla bad ki parakur parakha kiba la wan ban ïa snoh kti ban pynkhuid pynsuba ïa ki sawdong sawkun jong une u lum kyntang.
La sdang ïa ka jingpynkhuid ha kaba u President Seng Khasi Kmie u Rgh O. Pyngrope, u la shim ïa ka bynta ban kyntiew ïa ka lama jong ka Seng Khasi, hadien kane, ïa kaba la pynbud pat sa ka nguh ka dem kaba la pyndep da u Riewtymmen Riewsan ka Lum Jingthang Komiti u Rgh Skor Jala.
Hadien kane la ïoh pat ïa ka jingkren na u kongsan Rgh Iarless Pde, uba la ai khublei ïa ka Lum Jingthang Komiti ban khot sngewbha ïa u sha kane ka jingïalang, ha kaba u la ong ba ka jingpynbit pynbiang ka Lum Jingthang Komiti, ïa une u lum ka long kaba itynnad namar ka jingshim khia ka jong ka.
Nalor katta u la ong ba dei ruh ban sngewthuh ba ka mei mariang ka long kum ka kmierad kaba peit ïa u khun bynriew, ha kane ka sla pyrthei, ha kaba kane ka meirad kam juh khapnap ba kan bsa ban btiah ïa u khun bynriew.
Kumta u sngewkmen ba un shem ba ki sawdong sawkun jong une u lum jingthang ka long kaba la biang lut nadong shadong haduh ka khuid ka suba ka long ba itynnad ban peit.
Nalor katta ka jingpynlong ïa kum kane ka prokram, ka long kum kawei na ki lad ban ïashem ïa kynduh shi sien shi snem ha une u lum, bad kane hi, ka jingïatrei lang hapdeng ka Seng Khasi bad Seiñ Raij Niam Tre Shillong ka la ïaid naduh ki longshwa manshwa, katno tam lei lei haba ka jingïashim bynta ka Seng Khasi ha ka por ka lehniam Behdeiñkhlam, ha Jowai, la ïoh ïa ka jingïaroh ban wanrah ïa ka jingïatylli bad katno tam lei lei haba la ïoh ban leit ban rah ïa la ki tabut kaba la nang pynphuh pynphieng shuh shuh ïa ka lehniam Behdeiñkhlam, kaba mih paw da ka mynsiem ïa treilang kaba shitrhem.
Hadien ba la dep ban ai ïa ka jingkren, la pynbud pat sa ka jingsdang ban ïa pynkhuid paidbah ïa une u lum, da ka jingïashim bynta ryntih lang shriak naduh ki riew rangbah, ki longkmie, longkpa, ki samla bd ki hep barit.
Ïa ka jingïalang hi baroh kawei la pynïaid ïa ka da u Rgh JSR Syiemlieh ba dei u dkhot ka komiti, uba la ai ruh artad ïa ki kyntien ai khublei haba kut jong ka jingïalang plie pynkhuid paidbah ïa une u lum.
