Shillong, Iaiong 26: Ka Academic Council jong ka North Eastern Hill University (NEHU) wat la kala dep ban pyntrei kam ia ka National Education Policy 2020 ha baroh ki College kiba pyniasoh bad kane ka skul bah hynrei haduh mynta kam pat khot ia ka jingialang ban buh ia ki lynong ba pule ki samla pule ki ban sa leit sha ka semester kaba hynniew bad kaba phra.
Ki samla pule ha ki College bapher bapher kiba pyniasoh bad ka NEHU kiba la poi sha ka Semester kaba hynriew kin sa thoh ia ka eksam jong ki ha ba kut jong u bnai Jymmang bad kan kut ha u bnai Jylliew kaba sah mynta ka long sa tang ar bnai ban sa sdang ia ka semester kaba hynniew hynrei kane ka skul bah kam pat lah ban khot ia ka Academic Council ba kin ia kren ia ki lyngong pule ki samla la ka dei ka Art, Commerce, ne Sciance.
Ki thymmei khubor kiba u SP News Agency u la ioh ka long ba kine ki samla pule mynta kiba don ha ka semester kaba hynriew kiba bun kim sngewthuh shuh kin leh kumno la kin leit bteng ne em ia ka semester kaba hynrei namar kam shai namar ka NEHU ha duh mynta kam pat shim ia ka rai namar ka khlem pat lah ban pynlong ia ka jingialang ka Academic Council namar kane ka dei ka kommitte ka ban rai ia ka lynnong pule ki samla pule.
Ki lad khubor ia ki iathuh kila la ioh la sngewthuh ba bun na ki College kin nym pyniaid ia ka semester kaba hynniew na kadaw ba ka NEHU haduh mynta kam pat ai kano kano ka jingbthad kumno ban leh, ka por ka dang stang ar bnai hynrei ka NEHU kam pat lah ban khot ia ka jingialang ban shim ia ka rai.
Ki lad khubor ki iathuh ba ka jingbym don ka NEHU ia u Vice Chansellor kaba pura mynta la palat snem kala ktah ruh ia ka jingtrei kam ka NEHU bad ka jingdon tang ka Vice Chansellor kaba shipor ruh kala pyndkoh ia ka jingtrei kam ha kane ka skul bah bad mynta kala paw shai ba kam pat lah ban khot ia ka jingialang ka Academic Council kaba ktah ia ka iap ka im jong ki samla pule katkum ka NEP 2020 kaba la pyntrei kam ha kane ka skul bah.
