Shillong, Iaong 26: Ha ka bynta kaba 133 jong ka Mann Ki Baat, u Myntri Rangbahduh ka ri u Narendra Modi u la ban jur ïa ka jingkylla ha ka kam ba iadei bad ki siej, khamtam ha ka thaiñ shatei lammihngi, da kaba batai ïa ka kum ka nongkyntiew ba kongsan ha ka ïoh kam ïoh jam, ka kam khaii, bad ka jingsaindur thymmai.
Haba kdew ia ka thain shatei lammihngi kum ka “Ashtalakshmi”, u Myntri Rangbahduh u la ong ba kane ka thain ka riewspah ha ka sap ka phong bad ki jingdon jingem ka mariang bad ka la pyni ia ka jingjop kaba khraw ha ka kam ba iadei bad ki siej.
U la ong ba u siej uba la ju khein kum ka jingkit kaba khia, mynta u la plie ki lad ba thymmai. Haba pynkynmaw ia ka ain jong ka por phareng, u la ong ba ia u siej la khein kum u dieng, kaba la wanlam ia ki kyndon kiba pyrkhing bha kiba la pynlong ia ka jingot bad jingkit ia u kaba eh, namar kata suki suki ki briew ki la kynriah noh na ki kam kiba iadei bad ki siej.
U Myntri Rangbahduh u la ong ba kane ka jinglong jingman ka la kylla hadien ba ka Sorkar ka la pynkylla ïa ka aiñ ha u snem 2017 bad ka la weng noh ïa u siej na ka thup jong ki dieng. Hadien kane ka jingpynkylla, ka kam shna tiar na ki siej ka la nang kiew ha kylleng ka thain shatei lammihngi, da kaba nang kiew ka jingsaindur thymmai bad ka jingkyntew ia ki kam.
Haba ban jur ïa ki nuksa ba kyrpang, u la ong ba u Bijoy Sutradhar na Gomati district jong ka Tripura bad u Pradeep Chakraborty na South Tripura, kiba la shim ïa ka teknoloji ban kyntiew ïa ka rukom shna tiar na ki siej.
U la kren ruh shaphang ki Self-Help Group ha Dimapur bad ki jaka ba marjan jong ka Nagaland kiba trei halor ka jingkyntiew ia ki kam kiba iadei bad ki mar ba la shna na ki siej, ryngkat bad ka Khorolo Creative Crafts kaba trei ha ka kam shna tiar iing da ki siej bad ki kam shna kti.
Shuh shuh u la ong ba ha Mamit district jong ka jylla Mizoram, ki kynhun ki dang trei halor ki tissue culture jong u siej bad ka rukom pyniaid ia ki poly-house, katba hajan Gangtok ha Sikkim, ka Lagastal Bamboo Enterprise Team ka dang pynmih ia ki tiar shna kti, ki dieng sma iwbih, ki tiar iing bad ki tiar pynitynnad hapoh iing na ki siej.
U Myntri Rangbahduh u la ong ba kine ki dei tang katto katne ki nuksa napdeng kiba bun ki khana jingjop kiba dang mih ha ka kam ba iadei bad ki siej ha kylleng ka ri. U la ban jur ba ki kynthei khamtam ki longkmie bad ki para kynthei kidei napdeng ki nongïoh jingmyntoi kiba khraw na kane ka jingkylla.
Da kaba kyntu ia ki nongshong shnong ban kyrshan ia kine ki sienjam, u Myntri Rangbahduh u la pynshlur ia ki briew ban thied ia ki tiar ba shna na ki siej na ka thain shatei lammihngi; da kaba bynrap ba kum kine ki tiar lah ruh ban ai kum ki jingai sngewbha.
U la ong ba wat tang ka kam kaba rit ruh kan iarap shibun ha kaba kyrshan bad pynshlur ia ki nongtrei kti kiba trei shitom kiba don ha lyndet jong kine ki tiar.
