Shillong, Jymmang 14: Hadien ka jinglah ban khur ia ki 7 sien ki nam jop, ka lynti iaid ka kynhun ialehkai ka Nangkiew Irat ha ka lympung ialehkai ka MSL 5, ka Meghalaya Football Association, ka long ba kan mad ia ka nam rem kaba long da 2-1 hakhmat ka kynhun ialehkai ka Rymbai Shkenshynriah SC, katba ka kynhun ialehkai ka Langsning FC kam shim la shem kano kano ka jingeh ban pynliem da 7-0 pyrshah ia ka Maram FC, ha ka jingakhun ia ka quarterfinal ba dei jong ka Group B kiba la long mynta ka sngi ha madan MFA Turef 3rd Ground, Polo.
Ha ka jingshisha, u Jefferson Pakyntein (39′), u la ai jingkyrmen ia ka Nangkiew Irat da ka jingioh ka jong u ban thep ia ka kol ba nyngkong, ia kaba ka kynhun ialehkai ka Shkenshynriah, ka la dem hi khui ba kan iakhun tyngeh tad haduh ba kan da lah ba kan pynphai kylla pat da ki artylli ki kol kaba la wan tang hapoh ki ar minit lyngba u Skilful Tariang (53′) bad Hesmiki Rymbai (55′) kaba da kylla ka wanrah pat ia ka khubor kylla pongpet jong kane ka lympung iakhun jong ka MSL mynta ka kynti.
Katba ha ka jingiakhun kaba ar jong ka sngi, ka kynhun ialehkai ka Maram FC kam don lad don lynti eiei ba kan lah ba kan khanglad ia ka kynhun ialehkai ka Langsning FC ba kan iai bteng ban jam shakhmat ha kane ka lympung iakhun.
Wat la katta ruh, ka kynhun ialehkai ka Langsning FC ka la sdang ba kan ioh pynkhih ia ka jar da ka kol kaba nyngkong lyngba u Dajiedlang Wanshnong’ (32) bad bynrap pat sa ka kol na u Andy Joey Laloo (37′) bad shwa ba ka jingiakhun kan jam sha ka jingiashong thait ba shipor, u Samuel Phawa (45’+1) u la ioh ban thep ia ka kol kaba lai.
Haba wan ban bteng ia ka kylla miet, sa shisien pat u Samuel Phawa (51) u la ioh ia ka kabu kaba biang ban thep ia ka kol kaba saw, ia kaba hadien kane, ka la dei pat sa ia ka khep jong u Nelson Rymbai ba bat mynta ia ka nam kum u rang ialehkai ba thep bun kol ha kane ka lympung ba un ioh ban thep ia ki artylli ki kol (54 bad 69), kaba pynlong ia u mynta ban ioh thep haduh 17 tylli ki kol ha kane ka kynti ba mynta .
Ia ka kol kaba khatduh pat la ioh ban thep ia ka da u Dajiedlang (80), kaba pynlong ia ka kynhun ka Maram FC ba kan sngewthuh shai ba haduh katno ka long kaba eh bad ba jwat ynda haba la jam pat sa shah kane kawei pat ka kyrdan jong ka jingiakhun, khamtam haba hap ban mih madan ban iakhun pyrshah ia ki klob ne kynhun kiba khlain bad ba la paw ha ka jylla.
Lashai pat ka sngi, ka jingiakhun kan dei biang naka bynta ka Group A ba dha ka por 11 baje mynstep ka Rangdajied United FC kan mih madan ban aireng pyrshah ia ka Nongkseh SSCC bad ban sa bynrap pat da ka jingiakhun hapdeng ka Mawlai SC pyrshah ia ka Shillong Lajong FC kaban long ha ka por 3 baje nohphai sngi., baroh artylli kine ki jingiakhun kin long ha madan jong ka MFA Ground, Polo.
