Shillong, Jymmang 14: Ki dkhot jong ka party BJP ka jylla Meghalaya, ba la lam khmat da u myntri kabinet ka sorkar Meghalaya u bah Sanbor Shullai bad u MLA ka BJP, u bah A. L. Hek, ki la iakynduh ia u myntri khynnah ka sorkar pdeng u Dr. Sukanta Majumdar bad pyntip sha u shaphang ka jinglong jingman ha NEHU.
Kine ki dkhot ka party bad ki Myntri ki la iakren shaphang ka jingdkoh treikam kane ka jaka pule ha kaba iadei bad ka jing bym don u vice chancellor ha kane ka ophis. Ka jing duna ki nongtrei, ka jingduna ki jingdonkam, ka jingduna ha ka ban ialam lynti, ka jing sngewsih ba nang kiew, ha kaba kane baroh ka la ktah bha ia ki samla pule.
Katba ki dkhot kane ka party BJP ka jylla Meghalaya ki la kyrpad ba dei ban shim khia noh da ka tnat treikam pdeng ne Central Ministry khnang ba yn iaid beit iaid ryntih ka jingtreikam ha kane ka jaka pule jong kane ka thain lam mihngi.
Kine ki dkhot ka party ki la ban jur halor ka jingdonkam ban thung noh da u Vice Chancellor ba thymmai uba lah ban sngewthuh shaphang ka kolshor jong kane ka jaka, ka akor bad ki jingdonkam.
U Dr. Majumdar u la pyn thikna ia ki dkhot jong ka party BJP ka Meghalaya ba ia kane ka mat, yn sa iakren noh mar mar bad u myntri ka kabinet ka sorkar pdeng, da kaba buh hakhmat ia ka jingmut ban pyrkhat shaphang ka lawei ki samla pule bad ban pyn thikna ba ka jaka pule ka NEHU kan sa long biang kumba ju long bad sdang ban pyn treikam noh mar mar.
