New Delhi, Jymmang 13: Ka Tnad kam ialehkai jong ka sorkar pdeng, lyngba ka MY Bharat, ha ka jingiatreilang bad ka Tnad kam pohiing, ka la sdang ia ka quiz ha ka ri na ka bynta ka Viksit Vibrant Villages Programme (VVVP) 2026 ha ka rynsan MY Bharat [MY Bharat portal]. Kane ka quiz kadei ka bynta ba nyngkong jong ka jingjied na ka bynta ki samla ban ïashim bynta ha ka prokram pynïadei bad ki shnong khappud ba la buh ban pynlong ha u bnai Jylliew 2026.
Ka Viksit Vibrant Villages Prokram 2026 kadei ka sienjam ha ka ri kaba ialam da ki samla kaba thmu ban pynkhlain ia ka jingiashim bynta ha ki shnong, ka jingiatreilang bad ki paidbah, ka jingiasam ia ka kolshor bad ka jingpynsngewthuh ha kaba iadei bad ka jingkyntiew ia ki shnong khappud ha ki thain kiba kongsan kynthup ia ka Leh-Ladakh, Himachal Pradesh, bad Uttarakhand.
Ia kane ka online quiz la pynlong naduh ka 10 tarik Jymmang haduh ka 20 tarik Jymmang 2026 bad la plie na ka bynta ki samla ha kylleng ka ri. Ka sienjam ka ialeh ban kyntiew ia ka jingsngewthuh hapdeng ki nongiashim bynta ha kaba iadei bad ka jingangnud bad ki jingthmu jong ka Viksit Vibrant Villages Program, katba ka pynshlur ia ka jingiashim bynta shitrhem jong ki samla ha ka jingtei ia ka ri bad kyntiew ia ka imlang sahlang ha ki jaka khappud.
Ka quiz kan long kum ka rynsan ban ïakren na ka bynta ki nongïashim bynta ban tip shaphang ka jingkylla ha ki shnong khappud, ka kolshor jong ka thaiñ, ka jingsngewthuh shaphang ka mariang, ki sienjam ba iadei bad ka jingsynshar, ka jingïashim bynta jong ki paidbah, bad ki sienjam jong ka sorkar ban pynkhlain ïa ki thaiñ khappud.
Ki nongiashim bynta kiba leh bha ha ka quiz kin shah bishar bniah ia ka jingioh lad ban iashim bynta bad ka jingbit jingbiang, hadien kane yn jied ia 500 ngut ki volunteer jong ka MY Bharat na kylleng ki Jylla bad ki Union Territory ban iashim bynta ha ka Viksit Vibrant Villages Program kaba shi taiew ka ban long ha u bnai Jylliew 2026.
Ki volunteer kiba shah jied kin iashim bynta ha ki kam bad ka pynsaphriang jingtip sha ki paidbah ha kylleng ki shnong khappud ba la ithuh. Ka prokram kan kynthup ïa ki kam Swachhta, ki prokram ïamir jingmut bad ki samla, ki sienjam ba iadei bad ka mariang, ki kam iasam ia ka kolshor, ki jingpynsngewthuh paidbah, ki jingïalang ai jingmut shaphang ka kam, bad ki lad ioh jinghikai lyngba ka jingpyrshang dalade kiba la peit bniah ia ka roi ka par ha ki jaka nongkyndong bad ka jingïatylli ha ka ri.
Ka sienjam ka pyni ia ka jingangnud jong ka Sorkar ban pynkupbor ia ki samla kum ki nong nohsynniang kiba radbah sha ka Viksit Bharat @2047 bad ban pynkhlain ia ka jingai jinghikai ha kaba iadei bad ka jingdonkam jong ki shnong khappud kiba khlain bad kiba skhem.
