Shillong, Jymmang 13: Mynta ka sngi 13/Jymmang/2026 ki paidbah nongshong shnong ka Lapangap ia kaba la synrang lang da ka seng KSU kila leit tur sha Secretariat ban pynsngew sha ka sorkar ia ka jingshah khang lynti ha ki pulit Assam bad ki briew ka Karbi ban leit rep leit riang sha ki lyngkha jong ki ha katei ka thain.
Ka jingialum paidbah kala long hajan u mot u Kiang Nangbah bad nangtei kila tur ban leit sha Secretariat hynrei ynda poi ha ophis jong u Superintendent ki pulit la khang lynti ia ki da ki pulit bad ha kane kala don ka jingiapyrshang ban tur sha khmat hynrei na ka liang jong ki pulit kim shym la ailad.
Haba ia dei bad kane na ka liang ka sorkar kala khot ban ia kren ha kaba la jied 10 ngut ki dkhot na ka KSU ban ia kynduh ia u symbud myntri rangbah ka jylla u bah Prestone Tynsong bad ia ka rai kaba mih na kane ka jingialang la pynsngew ha ki paidbah da u Deputy Commissioner ka West Jaintia Hills.
Ha kane ka jingpynshai la ong ba naduh lashai ka sngi yn buh ia ki pulit SF10 ha Lapangap nalor ba ki pulit kila don lypa bad ia kane yn sa ia kren ha ka sorkar bad lashai na ka liang u Deputy Commissioner bad u Superintendent ki pulit ka West Jaintia Hills kin leit sha Lapangap ban pyntikna ba ka rep ka riang kan sdang biang.
La ong ba ha ki sngi ban wan kan sa shong biang ka “Peace Committee” haba ia dei bad ka jingiakren la ong ba ka sorkar thymmai ha Assam dang shu dep thaw bad u khmih lynti ba ka shongsuk shongsain kan wan biang ha katei ka jaka.
Na ka liang ki dkhot ka KSU ki la ong ba ka sorkar kala ai ka jingkular ban ai ka jingiada bad ba kin rep kumba ju long bad ha kane ka jingkren ba ia ki pulit yn buh kham hajan ka jaka rep bad na ka liang u SP ruh u pynrem ia ki pulit u ong ba kin pyntikna ban ai ka jingiada ban ioh ban rep ban riang bad ka sorkar ruh kala sngap ia ka jingkyrpad bad ka sorkar ruh kala bthah ia ki ia kaei kaba ki dei ban leh.
