Shillong, Jymmang 14: Ka kynhun jong ka International Fund for Agricultural Development (IFAD) ka la sdang ban leit jngoh ia ki jaka ban pyntreikam ba hap hapoh ka skhim haduh ar sngi hapoh ka Meghalaya Livelihoods and Access to Markets Project (Megha-LAMP) jong ka sorkar Meghalaya ha kylleng ka Ri Bhoi Distrik myn ha ka sngi balang.
Katei ka kynhun ka don ia ki nongialam ba kongsan jong ka (IFAD), kynthup ia u Dr. Donal Brown, Associate Vice-President; ka Reehana Raza, Regional Director for the Asia and the Pacific Region; bad u James Mach Dsousa Shield, Country Director for IFAD India.
Ia kane ka kynhun ba ka pynbeit da ka Meghalaya Basin Management Agency (MBMA), ha katei ka jingleit khmih ka pyni ia ka jingthmu ban don ka imlang ka sahlang ba ialam khmat, ka kynhun nongrep, ka unit treikam bad ka lad jingkyrshan kamai hapoh ka Megha-LAMP.
Haba kren shaphang kane, u Dr. Donal Brown, Associate Vice President, IFAD, u la ong ba katba ka jylla Meghalaya ka dei ka jylla ba jngai, hynrei ka don bun ki mar rep mar riang, kaba la pynlong ban lah pyntreikam lyngba ka IFAD na ka bynta ban kyrshan ia ki nongrep ba trei ki kam barit baria.
Da kaba ai jing iaroh ia ka jingtrei shitom jong ki nongshong shnong katei ka shnong kiba la iatreilang, u la ban jur halor ka jing don jong ki mar tynrai kum u shynrai , sohmarit, soh kwai ne cashews bad ki sohtrun.
U la ban jur ruh ba lem bad ka jingdon bun jong kine ki mar rep, kane ka pyni ruh ia ka mat ba kongsan jong ka jinglah ban khaii ia kine ki mar rep shabar ka Ri India sha ki iew ki hat.
Da kaba iaroh ia ka jingdon lypa kine ki mar rep hapoh kane ka jylla, u la ong, “Lada phi kwah ban khaii ia kine ki mar rep sha kiwei pat ki ri jong ka India, sha ki jaka nongkyndong kum ka Delhi, lane khaii sha ki iew ki hat kum sha ki ri mihngi pdeng ne Middle East lane Europe, ym dei tang ka jingbha jong kine ki mar rep, hynrei ka jingpawnam bad ka rukom song ia ki.
Ka dei ban long kaba itynnad bad khring bad phi don ia ki mar rep ba pawnam. Nga peit ia ka rukom song bad nga mutdur, ‘kane ka pyn itynnad bad khring bha,’ wat hashwa ruh ba nga lah dep mad ia une u mar rep.
Ha ka sngi ba nyngkong jong kane ka jingleit jngoh, ka kynhun ka la pyn leit jingmut halor ka jingtei ia ki jaka ban rep bad ka jingtreilang ka imlang ka sahlang hapoh ka Ri Bhoi Distrik.
Ha Umwang, ki heh sorkar ki la dep iakynduh ia ka Integrated Village Cooperative Society (IVCS) bad Collective Marketing Centre (CMC), da kaba shim ia ka lad ban iakren beit beit bad ki dkhot kane ka imlang ka sahlang bad sdang da ka kren shaphang ka PRIME Hub initiatives hapoh kane ka distrik.
Hadien kane, katei ka kynhun ka la iaid shakhmat sha Bhoirymbong ban leit jurip sa ia ka Organic Spice Unit- ba dang shen ban sdang kaba dei ka karkhana jong ka unit treikam baheh ha kane ka thain lam mihngi bad ban pyn trei shitom na ka liang kane ka kynhun.
Ia katei ka sngi la pyn kut noh da ka jing peit biang ki heh ba dei peit ba halor, ha kaba la don ka jingiakren bad u Project Director jong ka LAMP bad ka kynhun jong kane ka projek, kaba bud da ka jingialang ba kongsan bad u Myntri Rangbah ka jylla Meghalaya, u Conrad K. Sangma, bad u Dr. Shakil P. Ahammed, Chief Secretary ka sorkar Meghalaya.
Katba ka Reehana Raza, kaba dei ka Regional Director for the Asia and the Pacific Region, IFAD, ka la kren shaphang ka jingskhem bad jingjop jong ka jingiatreilang ba la slem kaba la neh haduh 20 snem bad ka sorkar Meghalaya.
Ka la kren ruh shaphang ka jingjop jong ka jingpyn treikam ia ka projek (LAMP) bad kiwei kiwei ki jingpyn treikam ba dang sdang, ha kaba ka ka ban jur ba kum kine ki jingpyn treikam ba bteng, ka jingiatreilang kaba neh slem ka long kaba donkam na ka bynta ka jing bei tyngka ia kine ki mar rep kaba lah ban ai jingiarap ia ki nongrep ba trei kam barit baria.
Ka la pyn paw ia ka jingsngew kmen halor ka jingkiew kaba dang iai bteng da kane ka imlang ka sahlang jong ka shnong ha kylleng ki jaka pyntreikam lyngba kane ka projek, da kaba iaroh ia ka jing bha mynsiem jong ki paidbah ka jylla Meghalaya ha kaba iadei bad ka jingpdiang sngewbha ia ki.
Katba ha ka sngi ba bud jong kane ka prokram, ki heh sorkar jong ka IFAD ki la leit sha Jirang kaba don ha Ri Bhoi Distrik, kynthup ia ka Pineapple Processing Unit, Jirang PRIME Hub, ka jaka rep jaka riang, bad ka Jirang Organic Agro Farmers Producer Company Limited, ha kaba la don ka jingiakren bad ki nongrep, ki seng nongpyn mih bad ki nongseng kam lajong.
Kane ka projek kaba la ai jingiarap bha ka Megha-LAMP, kaba la pyntreikam da ka MBMA lem bad ka jingkyrshan na ka IFAD, ka la pyn leit jingmut ban pyrkhat halor ka lad ban kamai na ka bynta ki paidbah, ka jingpyn skhem ia ka imlang ka sahlang, pyniaid iew ha kaban pyn kiew dor ia kine ki mar bad ban ai ka jingpynbha ia ka jingioh iew na ka bynta ki nongrep bad ki nongpyn mih mar rep ha kylleng kane ka jylla.
