Shillong, Jymmang 15: Ka Nongkseh ka la jop da ka said ia ka Rangdajied United FC, katba ka Shillong Lajong FC, ka la jop da kaba suk ia ka Mawlai SC, ha ka jingiakhun ka quarterfinal ka lympung 5th Meghalaya State League, kiba la long mynta ka sngi Thohdieng ha madan jong ka MFA, Third Ground, Polo.
Ka jingiakhun ba nyngkong jong ka sngi kaba dei artad jong ka Group A ka long ba ka Nongkseh ka la jop da 2-1 ia ka Rangdajied, ha kaba u Chesterpaul Lyngdoh (22’) bad Aibiangmame Nongneng (90’+4), ki la long ki arngut ki player ban thep ia ki artylli ki kol na bynta ka Nongkseh bad ia ka shi kol ka Rangdajied United FC la thep ia ka da u Pasborlang Khonglikong (71’).
Ka Rangdajied United ka wan rung sha kane ka jingiakhun kaba ar ka jong ka hadien ba ka la mad ia ka namrem kaba long da 1-0 hakhmat ka SLFC ha ka jingiakhun ba nyngkong.
Haba phai sha ka jingiakhun ba mynta ka sngi ki rang ialehkai ka Rangdajied ba la coach ia ka da u bah Aiborlang Khongjee, na ka por sha ka por, ki la lah ba kin da tynjuh borbah bha ia ka kynhun ialehkai ka Nongkseh, katno tam lei lei haba u bah Aiborlang u la wanrah ia ka jingkylla ha ka kynhun ban bujli ia arngut ki player, kaba hangne lei lei, kam lah ban khlem da pynking baiong hi ngit ia ki rang ialehkai jong ka Nongkseh.
Hynrei ka jingbakla ka Rangdajied ka long ba la shu ai ei palat ia kiba bun tylli ki freekick hajan la ka jong ka kut bad dei lyngba kawei na ki freekick kaba kum kane, ba ka pynlong ia ka Nongkseh ba kan da ioh ba kan thep ia ka kol kaba ar ka jong ka lyngba u Aibiangmame
Haba phai sha ka jingiakhun kaba ar, ki kol ba la thep lyngba u Deibormame Tongper (16′), Riborlang L Lyngkhoi (34′) bad Wilbert Marbaniang (86′) , ka la biang pura ia ka kynhun ka Shillong Lajong FC ba kan pynliem ia ka Mawlai SC da 3-1, ha kaba ia ka shi kol jong ka Mawlai la thep ia ka da u Basuklang Bina (35′).
Kumta ha kaba kut ki ar kylla jong kane ka jingiakhun, ka ka Lajong kan khur mynta 6 point, bud pat sa ka Nongkseh kaba la ioh ban khur 4 point, ka Mawlai 1 point bad ka Rangdied 0, ha kaba tang artylli ki team ba khur bun point kin khreh ban jam sha ka semifinal, hynrei naka bynta ka Mawlai bad Rangdajied ki namrem na ki jingiakhun ba mynta ka sngi kam pat dei kaba kut ia ki, hynrei ba ki dang sah ia ki saw kylla jong ka jingiakhun ia kaba ki lah ruh wat ban khie khlieh ban iaknieh jam sha ka semifinal.
Lashai pat ka sngi, ki jingiakhun kin dei naka bynta ka Group B ban long ha SSA Stadium, ha kaba ka Maram FC kan iakhun pyrshah ia ka Nangkiew Irat ha ka por 2 baje nohphai sngi bad ka Rymbai Shkenshynriah SC kan iakhun pyrshah ia ka Langsning FC ban long ha ka por 6 baje janmiet.
