Shillong, Jymmang 15: Ka party BJP jong ka jylla Meghalaya ba hap hapoh ka jingialam lynti jong u President ka BJP jong kane ka jylla u Rikman G Momin u la pynlong da ka jingialang jingduwai bad u la pan na u Blei ba ia ki mynsiem jong u Revered Vumthang Sitlhou, Reverend Kaigoulun Lhouvum bad Pastor Paogoulen Sitlhou, kin leit suk hapoh ki kjat jong u Blei u trai kynrad.Ia katei ka jingpynlong jingduwai, la lam khmat da u Vice President ka jylla, u bah Khrawboklang Basaiawmoit, uba ia kane ka jingduwai, u la pyn kynmaw ia baroh shaphang ka khubor ba u Jisu u kren shaphang ka jingieid bad jingmap, kaba dei tang kata hi ka jingkoit ba u briew u ioh ha kane ka pyrthei kaba la bteng ban ngop ha ka jingiaumsnam bad jingpyn hiar kput.
U bah Mariahom Kharkrang, u la kyrpad ia man ki dkhot jong ka party BJP ba kin ai por shi minit man ka sngi ban duwai na ka bynta ki paidbah jong ka jylla Manipur kiba la bteng ban shem shitom na ki jingjia ba sngewsih man ka por kaba la pynlong ia ka jingiaumsnam ha Manipur.
Da kaba pynrem ia katei ka jingjia, u la kren da ki kyntien ba khlain tam, u bah Kharkrang u la pyn kynmaw ia baroh ba ka jylla Meghalaya ka dei ka jylla ba shong shngain bad kyrpad ia baroh ba ka jingshong suk kan iai neh katba long.
Da kaei pat ka lynti ba ngin ia sngewthuh iwei ia iwei shaphang ka jing pyrshang ia ka kolshor hynrei da kaba iashim bynta lang ha man ki tamasa jong ngi, u la pyn kynmaw ha katei ka jingialang.
Katba u dang pynrem ia katei ka jingjia kum ka kam sniew pyrshah ia ka jinglong briew, kaba long ruh ka jingkyndit ia baroh ki nong India, ka kong Fenela Lyngdoh Nonglait, ka la duwai na ka bynta ka jylla Manipur ba kan ioh ia ka jingsuk bad jing jai jai.
Ka la pyn mih ia ka jing shlur da kaba ong ba ki nongleh kam sniew kin shah kem bad yn rah sha ka ain ha ka por kaba kloi tam.
