Shillong, Jymmang 21: Ia ka jingialang jong ka North East Students’ Organisation (NESO), la pynlong ha ka 20 tarik Jymmang 2026 ha Guwahati, Assam bad la pyniaid da ka All Assam Students’ Union (AASU), halor ka jingbteng ka jingia kynad hapdeng ki jaitbynriew Kuki bad ki Naga ha ka jylla Manipur.
Ha katei ka jingialang, la pynpaw ka jingsngewsih halor ka jingbteng ki jingjia jong ka jingthombor kynsan, ka jingshah pyniap, ka jingshah rahbor bad ka jingpyntieng ia ki riew paidbah ki ba lui lui, kaba la pynlong ia ka imlang ka sahlang ba kin shong syier bad ka jingbym shong shngain ha kylleng kane ka jylla.
Hadien jong ka kane ka jingialang, ka NESO ka la pynmih da ki jing rai, ka jingpynrem ia ka jingthombor pyrshah ia ki mynsiem ba lui lui: ka NESO ka la pynrem jur ia ka jingiai bteng jong ka jingpyniap bad jingthombor ia ki paidbah ba lui lui, kynthup ia ka jingshah pyniap ki nongialam niam. Ka jingthombor pyrshah ia ki paidbah bym don pop bad kiba lui lui kiba la don ha ka mishon jingsuk ym lah ban pynksan satia.
Ka jingkyrpad na ka bynta ka jing pyllait noh ia kiba shah rong bor: ka NESO ka la kyrpad jur ban pyllait noh ia baroh kiba shah rong bor bad ym dei ban pynmynsaw eiei ia ki.
Ka rai jingpynrem bad ka jingkylli ia ka bynta ba kongsan jong ka sorkar pdeng: ka NESO ka la pynpaw ka jingpynrem ba jur bad kylli jingkylli ia ka bynta kaba ka sorkar India ka la leh na ka bynta katei ka jingiakynad ba iai bteng, kaba la pynlong ban pyn mynsaw bad poi sha ka jingiap jong ki mynsiem ba lui lui bad ka la pynthut bha ia katei ka jylla.
Naduh ba sdang jong kane ka jingiakynad, la don katto katne ngut ki briew kiba la jah rngai bad ym lap shuh ia ki. Ka NESO ka dawa na ka sorkar ba kan pyndonkam ia ki lad ki lynti baroh kiba biang ban pynthikna ia ka jingjah rngai ka jong ki.
Ka jingkyrpad ban ioh jingsuk bad shong shngain kumba ju long: ka NESO ka la kyrpad ia baroh ki shnong ki thaw bad ki nongioh bynta ba kin kyntait ia ka jingiakynad bad ka jingpynshitom bein bad ha ka jaka katei, dei ban iatreilang ban ioh shong suk shong sain, ban ioh ia ka hok bad ka jingpynphai biang ia ka jinglong kaba thikna ha ka jylla Manipur.
Ha kane ka jingialang kila shim ia ka rai ban pynthikna ban bteng ka jing kyrshan na ka bynta ka jingsuk, ka jingioh biang ia ka shong shngain hapoh katei ka jylla bad ka hok jong kiba lui lui kiba la shah ktah ha katei ka jingiakynad.
Ha kane ka jingialang, la iadon lang ka ka All Manipur Students’ Union (AMSU), All Assam Students’ Union (AASU), All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU), bad ka Naga Students’ Federation (NSF).
