Tura, Jymmang 21: U Myntri Rangbah Conrad K Sangma mynta ka sngi, u la iashim bynta ha ka Skillerate 2026 bala pynlong ha Holly Hock marjan ka Bakdil Training Centre ha Tura, kaba pynskhem ia ka jingkut jingmut jong ka sorkar ban pynkhlain ia ka jingpynroi ia ki sap treikam, thaw ia ki lad iohkam iohjam bad ka lad sengkam seng jam na ka bynta ki samla jong ka Jylla.
Ia kane ka prokram la pynlong da ka tnad Labour, Employment bad Skill Development, ka Sorkar Meghalaya, ha ka jingiatreilang bad ka CM Skill Mission bad ka Meghalaya State Skill Development Society (MSSDS).
Ha kane ka jingialang la wan iashim bynta ruh da u Myntri ka tnad Labour, Employment bad Skill Development, u Bah Methodius Dkhar, uba la shah khot kum u kongsan symbud ha ryngkat u Deputy Commissioner ka West Garo Hills, u Vibhor Aggarwal, ki heh ophisar, ki nonghikai, ki nongioh jingmyntoi, bad ki kynhun ba don bynta ha ki kam pynroi sap treikam.
Haba ai jingkren, u Myntri Rangbah, u Conrad K Sangma ula ong ba kane ka prokram ka pyni ia ka jingiohi jngai kaba iar jong ka CM Connect ka Sorkar, ha kaba ki nongshong shnong ki lah ban pynsngew beit beit iala ki jingeh, ki jingangnud bad ki jingai jingmut sha ka Sorkar.
Ula ong ba kawei na ki jingeh ba iai mih kiba la pynsngew bha da ki samla lyngba ka CM Connect ka dei ka jingdonkam ban don kham bun ki lad ha ka jingpynroi ia ki sap treikam, ka jingsengkam sengjam dalade bad ka jingkyrshan ia ka kamai ka kajih.
U Myntri Rangbah ula ong ba katba ka Meghalaya kala kynshew palat ia ka T.32 klur ha ki prokram pynroi sap treikam bapher bapher kiba la ai jingmyntoi ia ki hajar ngut ki samla, ka Sorkar ka shem ba tang ka jingai jinghikai kam pat biang satia.
“Kiba bun kiba dep ioh jinghikai ki pynpaw sha ngi ba wat hadien ba kila pyndep ia ki jinghikai jongki, kim don pat ia ki tiar ki tar kiba donkam ba kin sdang ban trei hi noh la ka jong. Ki mechanic ki lah ban pyndep pura ia ka jinghikai hynrei khlem ki tiar ban trei, khlem da plie ia ki karkhana shna kali ka long kaba shem jingeh bha” ula ong.
U bynrap ba ka Sorkar namar kata, kala rai ban ai ia ki tiar treikam bad ka jingkyrshan ban sengkam ia ki samla kiba la pyndep ia ki jinghikai khnang ba kin lah ban pynmih kamai mar mar bad trei kam lajong. “Ka prokram kam dei eh tang halor ka jingsam ia ki tiar treikam.
Ka dei halor ka jingpynioh ia ka burom, ka jingshaniah halade bad ka lad kamai kajih na ka bynta ki samla jong ngi” ula kynthoh. Haba kren halor ka jingkiew ka ioh ka kot ka Jylla, u Myntri Rangbah ula ong ba ka Jylla mynta kala ioh ia ka jingithuh kum kawei na kiba kiew sted bha ha ka ioh ka kot hapoh ka Ri. Hynrei, ula ban jur ba ka jingkiew ka dei ban iai long kaba kynthup lang ia baroh bad poi sha ki riew paidbah.
“Ka jingkiew ka ioh ka kot marwei kam pat biang satia lada ki jingmyntoi kim poi sha man ki thliew iing, sha man ki samla, man ki nongrep, man ki nongtrei bad man ki nongsengkam” ula pynpaw.
Ula pynpaw ruh ia ka jingshem ba kawei na ki jinghikai ba kongsan ba ka Sorkar kala ioh ka long ba ki jingai jinghikai halor ka sap khlem ka jingkyrshan kaba dei ka long ka bym pat dep pura.
“Mynshuwa, bun ki prokram ki pynleit jingmut tang haki jinghikai, hynrei ngi sngewthuh ba tang haba don ka jingiakhublei kti, ki tiar treikam, ka jingpynioh ia ki iew, bad ka jingkyrshan ia ka ioh kam, ka jingktah kan iai long da u pud. Ngi la ithuh ia kane kum ka bynta kaba jah bad mynta ki prokram ki thmu ban pyndap noh ia kine ki jingduna” ula ong.
U Myntri Rangbah ula kren ruh halor ka jingiatehlok ka Sorkar bad ki jaka ai jinghikai ba shimet bad ki kynhun ba don bynta ban pynjanai ia ki prokram pynroi sap.
Kat kum ka jingong jong u, kum kine ki jingiatreilang kila kyntiew ia ki jaka ai jinghikai, wanrah ia ki jingai jinghikai kiba long kat kum ki jingtreikam ha ki karkhana, bad nang pynbun ia ki lad ki lynti na ka bynta ki samla ka Jylla.
Haba ai jingkren ha ka jingialang, u Myntri ka Tnad Labour, Employment bad Skill Development, u Bah Methodius Dkhar ula kren halor ka jingkongsan ban pyntbit ia ki samla da ki sap kat kum ki jingtreikam ha ki karkhana, bad pynbun ia ka lad iohkam iohjam lyngba ki prokram ai jinghikai bad pynroi ia ka sap.
“Haba ieng hangne mynta ka sngi ka ai ïa nga ka jingkmen kaba khraw, ka jingsngewtynnad, bad ka jingsarong,” u la ong haba bynrap ba ki jingsngew jong u ki mih na ar tylli ki daw, ka burom ban kren ha ka jingdonlang u Myntri Rangbah ha ka constituency jong u hi, bad ka lad ban ïakren bad ki samla kiba la don sap bad kiba smat ba sting.
Ula bynrap, “Haba nga peit sha phi baroh, Ngam shym iohi ia phi tang kum ki nongshah hikai-nga iohi ia ki nongsengkam ka lawei, ki nongsei ia ki buit treikam ka lawei, ki nongialam ka lawei bad ki nongwanrah jingkylla jong ka lawei ka Meghalaya”.
Ha kane ka prokram, la sam ruh ia 34 tylli ki skhim hapoh ka Skill Meghalaya bad Supporting Human Capital Development ha Meghalaya (SHCDM) na ka bynta ka jingai jinghikai ia ki 4830 ngut ki nongshah hikai, kaba ka dor baroh jong ka skhim ka long T.16,59,56,334 hapoh ka Skill Meghalaya, la sam ia 28 tylli ki skhim ba kynthup ia 3920 ngut ki nongshah hikai, ba kot T. 12,04,35,044, katba hapoh ka SHCDM la sam ia 6 tylli ki skhim ba kynthup ia 900 ngut ki nongshah hikai ba kot T. 4,55,21,290.
Ka jingpynlut na ka bynta shikhlieh ki nongshah hikai ka long T. 30,645 hapoh ka Skill Meghalaay bad T.50,579 hapoh ka SHCDM. La sam ruh ia ki tiar treikam ba shongdor T. 44,72,289 sha ki 798 ngut ki nongioh jingmyntoi kiba trei iaki kam bapher bapher ban kyrshan ia ka jingsengkam lajong.
