Tura, Jymmang 23: Ka All Garo Hills SSA School Teachers Association (AGHSSASTA-CB) mynta ka sngi ka la pynlong ia ka jingaiburom ia ka jingtrei shitom u Myntri Rangbah ka jylla Meghalaya, u Conrad K. Sangma ban kumtiew ia ki nonghikai SSA bad pynkhlain ia ka pule puthi ha ka jylla.
Ia kane ka jingpynkup burom la pynlong ha Matchakolgre LP School ha Tura bad la ia don lang ki nonghikai, nongpyniaid ka pule puthi, nongialam ka imlang ka sahlang bad ki dkhot jong ki paidbah na kylleng ka Ri Lum Garo.
Kawei ka bynta kaba kongsan tam jong ka prokram ka long ka jingplie ia ki lad jingpynkylla thymmai ha ka liang ka pule puthi bad ka synshar khadar, kiba thmu ban pynbha bad pynkylla thymmai ia ka rukom treikam ka sorkar bad ban kiew ka sap pule u khun samla ha baroh ka jylla.
Ha kane ka jingialang la wanrah ia ka Chief Minister’s Leadership in Education and Development (CM LEAD) Fellowship, ha kaba kane ka mut ka sorkar ka thong ban kyntiew ïa ka pule puthi da kaba punrung ïa ki samla pule ha baroh 12 tylli ki district jong ka jylla Meghalaya.
Ka CM LEAD Fellowship ka thmu ban khot ia ki samla ialam kiba tyngeh ka jingsngew, kiba lah ban wanrah ia ki pyrkhat thymmai bad ka bor ha kaba pynkylla ia ka rukom pule jong ki khynnah kiba don ha kumba 8,000 tylli ki skul sorkar bad ki skul ba ioh jingiarap na ka sorkar hapoh ka jylla baroh kawei.
Ki nongkyndong kin iatreilang bad ka tnat pule puthi ha ka nongrim ban pynkhlaiñ ia ka jingpyntrei-kam, ka jingsynshar pyniaid bad ki rukom pynpoi ia ka jinghikai. Ha kane ka sngi la pynlait paidbah ruh ia ki 27 tylli kali ban pyndon kam ki ophisar ka tnad pule.
Ha kane ka jingialang u Conrad u la ai khublei ia ka tnat pule puthi bad baroh ki nongia don bynta lang na ka bynta ka jingtrei shitom bad kyrpad ia ki nonghikai ba kin bteng ka jingkyrshan jong ki ia ka sorkar ha ki bynta ba kongsan kum ka khana samari ban pynkhlain ia ka jylla. La pynkut ia katei ka prokram da ka jingai khublei da u Nilloy G. Momin, nongai jingmut jong ka AGHSSASTA-CB.
