Shillong, Jymmang 28: Ha kine ki taïew ba la dep ka la don ka jingkylli na kiba bun ba lang ha kaba ïadei bad ka jingjied jong u Dr. D.R.L. Nonglait ban ïeng kum u kyrtong jong ka NPP ha kane ka MP ilekshon shiteng samoi ha kaba ki la mih ruh wat ki jingkynthoh ha ki kotkhubor bad social media pyrshah ïa ka KAS.
Halor kane, ka Khasi Authors’ Society da ka jingsngewkhia ka pynshai sha ki paidbah ba ka KAS ka dei ka Seng ki Nongthoh kot Khasi kaba kynthup ïa ki dkhot kiba wan na ki jylli bapher bapher.
Ka dei ka seng kaba trei na ka bynta ban pynroi, pynïar bad kyntiew ïa ka ktien, ka kolshor bad litereshor Khasi. Haba pynurlong ïa ki jingthmu, ka seng ka ju pynlong ïa ki prokram bapher bapher kynthup ruh ïa ki jingïalang paidbah ha ki por ba donkam ban ai jingpynshai bad ban pan jingkyrshan haba dawa na ka sorkar na ka bynta ban kyntiew ïa ka ktien Khasi.
Hooid u paidbah u la ai shisha ïa ka jingkyrshan baradbah bad ha ki taïew ba la dep, ka sorkar ka la pynurlong ïa ka jingdawa jong ka jaitbynriew kaba la dawa naduh u snem 2023 ïa kaba la lamkhmat da ka Khasi Authors’ Society; kata ka long “Ka jingpynlong ktien sorkar (official language) ïa ka ktien Khasi ha ka Jylla Meghalaya”.
Ka jingkhublei ka leit sha u paidbah baroh, hapoh ka seng, “ngi don shibun ki dkhot kiba don ha la ki jong ki jong ki seng saiñ pyrthei kiba ki kyrshan bad ïakit ïabah ïa ka kam saiñ pyrthei”.
Don napdeng ki dkhot jong ka seng kiba la long ki MP, MLA, MDC bad kiba la bat ruh ïa ka kyrdan Minister ha ka jylla, Chief Executive Member ha District Council bad bun kiwei de ki kam ba ki bat kum ki nongkitkam ha ka kam saiñ pyrthei.
Kine ki dkhot ki pynrung ïalade sha ka seng halor ka nongrim ba ka seng ka pdiang sngewbha ïa baroh ki nongthoh ban long ki dkhot jong ka shisien ba kila thoh ha ka ktien Khasi bad khamtam haba ki don ka jingkitkhlieh ban pynkhlaiñ ïa ka thoh ka pule Khasi.
Kumta hapoh ka seng, ki don ki dkhot kiba don ha ki seng saiñ pyrthei bapher bapher, ki nongïalam niam na ki kynhun niam bapher bapher, ki nongsynshar hima, nongïalam shnong bad ki nongtrei kam sorkar.
Nangta ki don ruh ki dkhot kiba trei ha ki kam bapher bapher kum ki doktor, ki nongïasaid aiñ, ki nonghikai skul, college, university, ki nongtrei kam lajong bad kiwei.
Ha kaba ïadei bad ka jingpynïaid kam ha ka Seng, kam don kano kano ka jingkhanglad ïa uno uno u dkhot naduh ki nongkitkam haduh kiba dang shu long dkhot ban pynïasoh ne rung sha kano kano ka seng saiñ pyrthei ne kano kano ka kynhun ha ka imlang sahlang.
Kumta ka jingkynthoh pyrshah ïa ka KAS lane ïa ki dkhot da ki katto katne ki ‘riew shim kabu ka long ka kam pynthoh bria ka bym don nongrim bad ki bym tip ruh ïa ka rukom treikam ka seng.
Ka jingpynïasoh u Dr. D.R.L. Nonglait sha ka party NPP bad ka jingthmu ban ïakhun ïa ka MP ilekshon shiteng samoi ka dei ka rai shimet jong u bad kane kam don jingïasnoh eiei bad ka seng.
Namarkata, ka jingjied jong u Dr. D.R.L. Nonglait, President KAS ka dei ka jingjied ba shimet jong u bad ha ka jingpynïaid kam ka seng la kdew shai ba ha ka jingbymdon u President, u Vice President u hap ban pynïaid ïa ki kam seng.
Sa shisien ka seng ka pynpaw ka jingsngewnguh sha baroh ki paidbah, ki sengbhalang bad ki seng trei mon sngewbha kiba la ju ai ka jingkyrshan met bad mynsiem ïa ka seng ha ki por baroh.
Ka KAS ka ïaikhmih lynti ruh ba ki paidbah ka bri u Hynñiewtrep kin ïai kynshan ha ki sngi ki ban dang wan na ka bynta ban kyntiew ïa la ka ktien nongmei nongpa, kane ka long katkum ka kyroh kaba la phah da u Dr. R. P. Kharshiing General Secretary ka KAS.
