Shillong, Jymmang 28: Ka Joint Action Committee, kaba kynthup ia ka East Jaintia Hills Truck Owner and Transporter Association (EJHTOTA) bad ka Jaintia Hills Truck Owners’ Association (JHTOA), ha u kyrwoh khubor ba la pyllait mynta ka sngi, ka la pynpaw ia ka jingkmen bad ka jingsngewnguh kaba khraw haduh katta katta ia ka Sorkar Jylla halor ka jingsngap bad jingmap noh jong ka, ia ki khajna kali trok bym lah shuh ban siew dep da ki trai kali tad haduh kine ki sngi ba mynta.
Kum ban shu pynkynmaw halor kane, ha u bnai Rymphang, 10 tarik, mynta u snem ka JAC, ka la leit ia kynduh markhmat, ia u Symbud Myntri Rangbah Duh ka Meghalaya, u Ma Sniawbhalang Dhar, ha ryngkat ka dorkhast ban kyrpad ia ka Sorkar ba kan sngewbha ban map noh ia baroh ki khajna ba dang sahteng jong ki kali trok, kaba la sah naduh ki por ba wan ka khlam COVID -19 bad haduh mynta mynne.
Ha kaba ym shym la lah shuh ban siew da ki trai trok namar ka jinghiar palat ka kamai kajih naduh katei ka por bad haduh mynta, ha kaba utei u Symbud Myntri Rangbah Duh ruh, u la kular ban shim khia ia katei ka jingeh jong ki trai trok, da kaba yn rah ia katei ka mat ha khmat jong ka sorkar.
Shuh shuh, namar ka jingban palat katei ka jingsohsat ia ki trai trok, ka JAC, ha ka 8 tarik, mynta u bnai, ka la leit ia kynduh biang sa shisien, ia utei u Symbud Myntri Rangbah Duh, ban pynkynmaw bad ruh kyrpad biang ia u, ba un sngewbha ban shim khia ia katei ka jingeh jong ki trai trok, bad ruh ban iarap kloi noh katba lah ei ia ki.
Da kaba map noh ia katai ka khajna kali jong ki kaba la buh ia ki ha ka jingeh kaba khraw tad haduh kine ki sngi, ha kaba, utei u Symbud Myntri Rangbah Duh ruh, u la kular biang ia ka JAC, ba shen shen un sa iakren ia kane ha ka jingialang jong ka Cabinet jong Sorkar Jylla na ka bynta ban leh ia kaba donkam na ka bynta ka bha ka miat jong ki trai trok ka jylla.
Hadien katei ka jingiakynduh ba ar jong ka ka JAC ia utei u Symbud Myntri Rangbah duh, ka Sorkar Jylla, mynnhynin ka sngi, ha ka jingialang jong ka Cabinet jong ka, ka la shim ia ka rai bad ruh pynbna paidbah syndon ba ka la map noh ia katei ka khajna ki kali trok, kata, 90% ia ka Fitness Certificates bad ruh 80% ia ka MV Tax bad ka Goods bad Passenger Tax, bad ba, ia ka sngi ban siew dep ia kaba dei ban siew la buh hapoh jong ka 31 tarik u Nailar mynta u snem.
U Ma Deolangki Dkhar, Assistt. Secretary ka JAC, ha ba kren halor kane bynta, u la ong “Na ka liang ka JAC, ngi, pynpaw ia jingsngewnguh kaba khraw haduh katta katta ia u Symbud Myntri Rangbah Duh, ba don burom, ka Jylla, u Ma Sniawbhalang Dhar, halor ka jingshim khia jong u, ia kane ka jingkyrpad jong ki.
Halor kane ka jingeh jong ngi ki trai truck, da kaba wanrah ia katei ka mat, ha ka Cabinet Meeting jong ka Sorkar Jylla, bad ruh ha kaba, ka Sorkar ka la map ia ki khajna kali truck jong ngi.
Kane ka jingiarap jong ka sorkar ia ngi ki trai truck, ka long ka jingkyrkhu kaba khraw bha kyrpang ia ngi kum ka JAC bad ruh ia baroh kiwei pat ha ka jylla kiba ia la kynduh ia kane ka juh ka jingjynjar, bad ba iane, ngin iai pyrto na ka por sha ka por.
U bah Biangshwa Shylla, shnongknor ka JAC, ha ba bynrap halor kane ka phang, u la ong, “Ngi pynpaw ruh, ia ka jingsngewnguh haduh katta katta, ia u Myntri Rangbah Duh, ba don burom, ka Jylla, u Conrad M Sangma, halor ka jingsngap jong ka Sorkar ia ka jingeh jong ngi kum ki trai trok, da kaba map noh ia katei ka khajna kali trok jong ngi. Kane ka jingleh bha jong ka Sorkar ia ngi, ka long ka jingkyrkhu kaba khraw bha ia ngi, kyllum lang baroh ha ka Jylla, kiba buh trok na ka bynta ban kamai jakpoh, bad ba, ia kane ngin iai pyrto lynter ki sngi.”
Kumta, ha ka jingiadei bad kane, ka JAC, ka kyntu ia baroh ki dkhot jong ka, ba kin shim ia kane kum ka kabu kaba bha tam, ban ialeh ban siew dep noh hapoh jong katei ka por ba la buh da ka Sorkar, ia baroh ki khajna kali jong ki kiba dang dei ban siew dep noh.
Hadien ba lah dep ot noh na katei ka persenteij ba la map da ka sorkar jylla ia baroh ki trai trok, la pynkut u kyrwoh na ka JAC, ia kaba la soi da u Bah Deolangki Dkhar bad u bah Biangshwa Shylla shongknor ka JAC.
