Shillong, Jymmang 28: Ka Myntri Khynnah jong ka sorkar pdeng ba dei peit ia ka Tnad Youth Affairs & Sports, ka Raksha Khadse, mynta ka sngi ka la leit jngoh ia ka Sports Authority of India (SAI) North Eastern Hill University (NEHU) Centre kaba don ha Shillong, ha kaba ka la iakren bad ki nongialehkai, ki coach bad ki ophisar bad ka la peit bniah ia ki jingdon jingem ba iadei bad ka kam ialehkai bad ka jinglong jingman jong ka jingai jinghikai ha katei ka jaka.
Ha kane ka jingleit, ka Raksha Khadse ka la leit jngoh ïa ki jaka ialehkai bapher bapher bad peit bniah ïa ki kam ai jinghikai kiba dang ïaid shakhmat kiba la sdang na ka bynta ki nongïalehkai ha kylleng ki jait jingïalehkai. Ka la iakren ruh bad ki coach bad ki samla nongïalehkai, da kaba pynshlur ïa ki ban bteng ban pyrshang ban ioh ia ka jingtbit bad ka jinglong ba ryntih, ka jingkut jingmut bad ka jingaiti lut.
Ka Myntri ka la ïashim bynta shitrhem ha ki jingïalehkai bapher bapher ha kane ka jingleit jngoh, kynthup ïa ka jingsiat khnam bad ka jingïalehkai phutbol bad ki nongïalehkai ha kane ka jaka, da kaba ban jur ïa ka jingdonkam jong ka jingïashim bynta ha ki kam ïalehkai bad ka jingiatreilang ha ki jaka nongkyndong.
Ka Raksha Khadse ka la ban jur ba ka jingïalehkai ka don ka bynta kaba wanrah jingkylla ha kaba saindur ïa ki samla kiba skhem jingmut, kiba long ryntih bad kiba iaineh ha ka kam katba ka long ruh kum ka lad kaba khlaiñ na ka bynta ka roi ka par ha ka imlang sahlang bad ka jingkiew shaphrang jong ka ri.
“Ka thain shatei lammihngi ka don kyrhai ki riewdonsap ha ka kam ialehkai bad ka kolshor kaba khlain ha ka jingiashim bynta ha ki kam ialehkai. Ka long kaba kongsan ba ngin iai bteng ban pynkhlain ia ki jingdon jingem, ka jingkyrshan ia ki nongai jinghikai bad ki lad ban kyntiew ia ki nongialehkai khnang ba kin kham bun ki samla nongialehkai na ka thain kin lah ban paw ha ki kyrdan ialehkai ha ka ri bad shabar ri,” ka la ong.
Haba ban jur ïa ki jingmyntoi ba kyrpang jong ka SAI NEHU Shillong centre, ka Raksha Khadse ka la ong ba kane ka jaka pule ka don ka lad kaba khraw ban paw kum ka jaka ai jinghikai kaba biang bha na ka bynta ïa ki nongïalehkai kiba don ha ka kyrdan ba halor tam.
“Kane ka centre ka don ka lad kaba khraw ban ai jinghikai ïa ki nongïalehkai kiba don ha ka kyrdan ba halor tam namar ka jingitynnad jong ka mariang, ka jinglong jai jai bad ka jinglong ka suiñbneng kaba sngewtynnad. Lyngba ka jingïai bteng ban kyntiew bad kyrshan, ka SAI NEHU Shillong ka lah ban long ka jaka ai jinghikai kaba kongsan na ka bynta ki nongïalehkai kiba pynkhreh ia ki jingïalehkai ha ka ri bad kylleng ka pyrthei,” ka la ong.
Ka la ong shuh shuh ba ki jingïalehkai ym tangba ki kyntiew ïa ka jingkoit jingkhiah ha ka met bad ka jinglah ban ïakhun hynrei ka nohsynniang ruh shibun ha kaba tei ïa ki jinglong nongïalam, ka jingïatreilang bad ka jingïadei kaba bha ha ka imlang sahlang hapdeng ki samla.
Kiba iadonlang ha kane ka jingleit jngoh ki long u Rajnish Mishra, Assistant Director, Sports Authority of India; Bah John Kharshing, Working President ka Meghalaya Olympic Association; ryngkat bad kiwei pat ki ophisar, ki coach bad ki nongtrei.
Kane ka jingleit jngoh ka long shi bynta jong ki sienjam ba iaibteng jong ka Tnad ban pynkhlain ïa ki jingdon jingem ba iadei bad ka kam ïalehkai, ki rukom kyrshan ïa ki nongïalehkai bad ka jingkyntiew ïa ki kam ïalehkai ha ki jaka nongkyndong ha kylleng ka thaiñ Shatei Lammihngi.
