Shillong, Rymphang 02: Ka Tnad Tourism ha ryngkat ka Office Syiem Hima Nongkhlaw Syiemship, ka Meghalaya State Planning Board, jong ka Sorkar Meghalaya, ki la pynlong ha ka sien nyngkong ia ka Awareness halor ki kam jngoh kai bad shang pyrthei, ha shnong Nongkhlaw, Hima Nongkhlaw Syiemship, West Khasi Hills.
Ia ka awareness la plie da u Paiem Phrester Manik Syiemlieh, Syiem Hima Nongkhlaw, ha ka jingiadon lang ryngkat u Bah John F Kharshiing, Co-Chairman, MSPB, Chairman, The Grand Council of Chiefs of Meghalaya,Dr Eureka L Mawlong, Dy Chairman, MSPB, u Mr K M Momin, Joint Director, Department of Tourism, u Mr M Ahmed, EE, i Kong D Syrem, Information Publicity Officer, u Bah Marc AN Diengdoh, Tourist Officer, Nongstoin, u Bah A Kharbani, Sordar Shnong Nongkhlaw kiba la ai jingkren bad bun ngut ki Sordar bad ki Samla kynthei bad Shynrang na kumba 25 shnong jong ka thain Nongkhlaw Area.
Na ka liang u Bah John F. Kharshiing, Co-Chairman, MSPB, u la pyntip ba kane ka program ka la wan dur hadien ka jingiakynduh ia u Dr Mukul Sangma, Chief Minister, halor ka Tourism, project ba la pynkhreh na ka liang u Paiem Phrester Manik Syiemlieh, Syiem Hima Nongkhlaw, ha ryngkat ka jingiadonlang u Bah John F Kharshiing, Co-Chairman, MSPB, i Kong Bashisha Rani, bad ha ka jingbuddien jong i Dr Eureka L Mawlong, Dy Chairman, MSPB.
U Bah John F Kharshiing, Co-Chairman, MSPB, u la pyntip ba u Dr Mukul Sangma, Chief Minister, um shym lah ban poi namar ki kam kyrkieh, bad u la pyntip ba u Chief Minister ka jylla u da thrang ia ki shnong bad ki samla ka thain Nongkhlaw ban sdang ka jingiasyllok halor ki kam jngoh kai bad shang pyrthei (Tourism), kum shi bynta ban pyrkhat kumno ban kyntiew ia ka roi ka par ka kamai ka jih lyngba kine ki jaka kiba itynad lyngba ki kam jngoh kai (tourism).
U Bah John F Kharshiing, Co-Chairman, MSPB, u la ong ba ka thain Nongkhlaw ka long kaba don bok bad ka don buh ki lad ban pynkiew ia ka Tourism lada ki paidbah kane ka thain ki ia snoh kti lang kawei ka jingmut ban ia treilang ryngkat bad ka sorkar jylla.
U Bah John F Kharshiing, Co-Chairman, MSPB, u la ong ba halor dei kane ka nongrim kaba la pynlong ia ka NEC bad ka Sorkar Jylla ban mang kyrpang ia ka surok, na Mairang –Nongkhlaw – Ranigodown – Azra ha ka jinglut kaba Rs 7.35 Crore. U la ong ba ka donkam ka jingiatreilang jong baroh ki shnong kiba don ha shilynter jong katei ka Highway. Ha ka jingshisha u la ong lada dang don lad lada ki paidbah kane ka thain ki long kiba iohi jngai bad haba peit ia ka lawei jong kane ka thain ki la dei ban wan shakhmat ban dawa da ka fourlane na Mairang sha Nongkhlaw Patharkhmah shaduh Rani.
Ka jingpynheh ia kane ka surok bad ka jingjan ka Guwahati Airport ka pynlong ia ki thain Nongkhlaw Area ban long kiba lah ban khring bun ki kam jngoh kai (tourism) lada nang ban iohi jngai bad pyrkhat lupa. U la ong ba ka Hima Khadsawphra ka don ka hok ban khring ia ki tourist namar kumba ka long mynta jan baroh kumba hynriew Lak Phraphewsan Hajar (6,85,000) shi snem ki nong jngoh kai (tourist) bad jan baroh ki leit tang sha ki thain Sohra.
Shuh shuh u Bah John F Kharshiing, Co-Chairman, MSPB, la ong ba ka long kaba ioh jingkyrmen ba ka Ri India ka la nang kiew ha ki kam jngoh kai (tourism) ha kaba ka la lah ban khring 63 Lak ki foreign tourist bad ka la kamai kumba Rs 83,938 Crore shi snem ha u snem 2012 na ki kam wan jngoh kai na bar ri sha India, katba ka Ri Greece ka la khring 1.64 crore ki tourist bad ka Italy ka la lah ban khring 4.61crore ki tourist shi snem.
U Bah John F Kharshiing, Co-Chairman, MSPB, u bah ka thong kaba dei ban shim ka long hato katno ngut ki tourist ka thain Nongkhlaw Area kan khring ha ki snem kiban wan, u la kyntu ia ki Samla ban ia pyrkhat bha ia kane ka phang. U la kyntu jur ia ki Sordar bad ki Samla ban buh ia ka thong ban ia syllok halor ki lad ban pynneh ia ka jing khuid ha ki
Shnong ki thaw, ban ia kren hapoh Shnong kumno ban long kiba pdiang sngewbha (welcome) ia ki tourist bad dei ban pyntikna ban nym don kino kino ki jingjia kiba sngewsih ban pynbudnam ia ka shnong ka thaw khnang ba kin rah ia ka khubor kiba bha haba ki leit phai sha la ki Shnong.U la ong ba mynta ka Sorkar Jylla ka la buh ia ka thong kumno ban leh katba lah ban khring ia ki tourist sha ka jylla Meghalaya.
U la ong ba ka por ka dawa ia baroh ki tnad bapher bapher ka jylla ban shim ia ka jingkit Khlieh ban khring ia ki kam jngoh kai (tourism), kum ka nuksa ka tnad PWD ka don ka bynta kaba khraw bad kaba ha khmat bha ha kaba ka long kaba donkam ban don ka jingpyrkhat kaba thymmai ha ki rukom thaw surok hapoh ka jylla kum shibynta ban khring ia ki tourist. U Bah John F Kharshiing, Co-Chairman, MSPB, u la ong ba shitom ban khring ia ki tourist haba sniew ki Surok synkien. Na ka liang u Bah John F Kharshiing bad i Dr Eureka L Mawlong ki la ai khublei ia ka tnad Tourism kiba la wan ban pynlong ka awareness program hapoh Shnong Nongkhlaw.
Hadien kane ka awareness program ki bor Shnong ha ryngkat u Syiem Hima Nongkhlaw ki la ialam ia u Bah John F Kharshiing, Co-Chairman, MSPB, bad ki officer Tourism ban leit jngoh ia ki shiphew tylli (10) ki jaka jngoh kai (tourist spot) 1. Viewpoint 2. u Mawbishar 3. Krem Pyrda 4) Jaka leh niam ki Syiem Nongkhlaw, 5) ka Nan Nongkhlaw 6) ka View Point David Scott trail bad Domiit 7 ) View Point – Mawiong & Ri-Bhoi 8) Rock Climbing 9 ) U Mot Shipai Sahep phareng 10) Ki jaka ba lah ban thaw ia ki Golf Course bad kiwei kiwei ki jaka.(SP News)
