Shillong, Jymmang 30: Ka Tnad Youth Affairs, ka Tnad Youth Affairs & Sports, mynta ka sngi ka la sdang ia ka sngi ba nyngkong jong ka Chintan Shivir kaba ar sngi ha Indian Institute of Management (IIM), Shillong, ha kaba la iadonlang ki ophisar jong ka Tnad, ka MY Bharat bad ka National Service Scheme (NSS) na ka bynta ban iamir jingmut halor ka jingpynkhlain ia ka jingiatreilang jong ki samla, kyntiew ia ka jingpynpoi ia ki prokram bad kyntiew ia ka jingthmu jong ka Viksit Bharat lyngba ka roi ka par ba ialam da ki samla.
Ha ka jingialang plie paidbah la iadonlang u Myntri Sorkar Pdeng ba dei peit ia ka Tnad Youth Affairs & Sports, Dr. Mansukh Mandaviya, ka Myntri Khynnah jong ka sorkar pdeng ba dei peit ia ka Tnad Youth Affairs & Sports, ka Raksha Nikhil Khadse, Myntri ka Tnad Sports & Youth Affairs, Sorkar Meghalaya, Bah Wailadmiki Shylla, Secretary, Tnad Youth Affairs, Dr. Pallavi Jain Govil, Additional Secretary, Tnad Youth Affairs, Nitesh Kumar Mishra, Chief Executive Officer, MY Bharat, Dr. Priyanka Shukla, ryngkat bad ki heh ophisar jong ka Tnad, ka MY Bharat, NSS, ki Regional Director, ki District Youth Officer bad ki Youth Officer na kylleng ka ri.
Haba ai jingkren ha ka jingialang, u Dr. Mansukh Mandaviya u la ong, “Mynta, da 2.17 klur ngut ki samla kiba trei mon sngewbha, ka MY Bharat ka la paw kum ka jingïakhih jong ka ri na ka bynta ka Jan Bhagidari. Ka thong jong ngi kalong ban rah ïa ka My Bharat sha man la ki distrik, man la ki block, bad man la ki samla nongshong shnong ban pynthikna ïa ka jingpyniasohlang ia baroh.”
U Myntri u la ban jur ba ki National Youth Volunteer kidei ban long kum ki nongialam ha ka imlang sahlang bad ki nongpynshlur ia ki samla ha ki jaka nongkyndong. U la ban jur ia ka bynta kaba kongsan jong District Youth Officer bad ki NSS Officer ha kaba pynkhlain ia ka jinglong jingman jong ka jingkyntiew ia ki samla bad u la ban jur ia ka jingdonkam ban thew ia ka jingjop lyngba ka jingktah kaba lah ban iohi bad ki jingmih.
U la kyntu ruh ia ka jingiashim bynta shitrhem jong ki samla ha ka campaign pyrshah ia u drok ha ka ri baroh kawei naduh ka 26 tarik u Jylliew haduh ka 15 tarik u Nailar, u la pynbna ia ki prokram ha ki 150 tylli ki jaka pule ban kynmaw burom ia ka jingdap 150 snem ka Vande Mataram, bad u la pynkynmaw biang ia ka jingkut jingmut jong ka Tnad ban sdang ia ki MY Bharat Centre ha baroh 783 tylli ki distrik.
Haba ban jur ia ka jingdonkam jong ka jingioh jingnang jingstad lyngba ka jingiatreilang, u la kyntu ia ki jylla ban iasam ia ki rukom treikam kiba bha tam bad u la kyntu ia ka jingpyniasoh kaba kham bha hapdeng ki samla na ka thain shatei lammihngi ha ki sienjam ban kyntiew ia ka ri.
Ka Myntri Khynnah kaba dei khmih ia ka tnad Youth Affairs & Sports ka Raksha Nikhil Khadse ka la ong, “ka thong jong kane ka Chintan Shivir ka dei ban wanrah lang ia ki ophisar ba kin iamir jingmut, pyni ia ki rukom treikam kiba biang tam bad ki jingshem ha ki jaka treikam khnang ba ngin lah ban iatreilang na ka bynta ka Viksit Bharat 2047 lyngba ka bor jong ki samla jong ngi.”
Haba ïadei bad ka thaiñ shatei lammihngi, ka la kren shaphang ka kam ïalehkai kaba khlain ha ka thaiñ bad ka jingïadei jong ki klob samla bad ka la ban jur ïa ka jingdonkam ban pyndonkam ïa ka sap bad ka bor jong ki samla jong ka.
Ka Myntri ka la pynpaw ruh ïa ka jingdonkam ban pynkhlaiñ ïa ka jingïatreilang bad ki sorkar jylla bad ki bor synshar district, da kaba ong ba ka jingpynbeit ïa ki jingduna ha ka jingïadei ka long kaba kongsan na ka bynta ban pyntreikam hok ïa ki prokram bad ki kam jong ka MY Bharat Portal.
Ka Secretary, ka tnad Youth Affairs, Dr. Pallavi Jain Govil ka la ong, “Ka thong kaba kongsan jong kane ka Chintan Shivir ka dei ban lap ia ki jingeh, pyni ia ki jingshem bad wanrah ia ki kam ba lah ban pyntreikam.”
Ka la ong ba ki bynta ba nyngkong bad ba ar jong ka Chintan Shivir ki la wanrah ia ki jingjop ba kongsan. Ka la pynshlur ruh ia ki nongiashim bynta ban batai shaphang ki rukom treikam kiba biang tam bad ki rukom treikam ba thymmai kiba lah ban pynbud ha ki jylla bad ki prokram bapher bapher.
U Additional Secretary, ka tnad Youth Affairs, Nitesh Kumar Mishra u la ong, “ka Chintan Shivir ka dei ka rynsan na ka bynta ka jingiamir jingmut lang ha kaba ki ophisar ki lah ban ai ia ki jingmut kum kiba don bynta ha kane ka kam bad noh synniang sha ka lawei jong ki sienjam kiba iadei bad ki samla.”
U la ong ba ki jingai jingmut na ki bynta kiba la dep ki la ialam sha ki sienjam kiba lah ban pyntreikam bad ua la ban jur halor ka jingdonkam jong ka National Volunteering Policy ban ithuh bad pyni ia ka jingnoh synniang jong ka MY Bharat bad ki nongtrei mon sngewbha jong NSS kiba trei ha ki kam ban tei ia ka ri.
Hashuwa kane, ka Dr. Priyanka Shukla, CEO, MY Bharat, ka la pdiang burom ia ki nongiashim bynta bad ka la batai shaphang ki kam ba kongsan bad ki rukom pyntreikam hapoh ka Annual Action Plan.
Ha ka sngi ba nyngkong ka la don ki bynta shaphang ka jingkyntiew ia ki nongialam, ka jingpynkhreh kam na ka bynta u snem, ki kam kiba biang tam jong ki kynhun jong ki samla, ki kam digital ban pyniadei bad ki samla lyngba ka rynsan MY Bharat.
Ki prokram kiba pyndonkam ia ki jingpyrshang ba thymmai ban ioh jingnang jingstad, ki lad ban trei mon sngewbha bad ka jingpynkhlain ia ki rukom treikam hapoh ka MY Bharat bad NSS.
Ki nongmihkhmat na Assam, West Bengal, Bihar, Jharkhand bad Manipur ki la batai shaphang ki rukom treikam kiba seisoh bha bad ki jingshem na ki jaka treikam kiba iadei bad ka jingiadei bad ki samla, ka jingpynrung kyrteng hapoh ka rynsan, ki kam trei mon sngewbha bad ka jingiadei bad ka imlang sahlang, ka jingplie lad ia ka jingioh jinghikai lang jong ki nongiashim bynta.
Ki jingiamir jingmut ha ka sngi kaba nyngkong ki la peit ia ka jingpynkhlain ia ki kam kiba iadei bad ka jingiadei bad ki samla, ka jingkyntiew ia ka jingpyniahap jong ki kam jong ki jaka treikam, ka jingkyntiew ia ki jingseisoh jong ki kam bad ka jingwanrah ia ki jingpynbeit ba lah ban pyntreikam na ka bynta ki sienjam kiba iadei bad ki samla ha kylleng ka ri.
