Shillong, Jymmang 30:Ha ka sienjam kaba kongsan ban pynkhlaiñ ïa ka kam dohkha, ki kam ri jingri jingdup (livestock), ka cold chain bad ka roi ka par ha ki dong ki thain bapher bapher ha Meghalaya, ha ka sngi thohdieng u bnai Jymmang, la plie paidbah ïa ka Cold Storage Facility kaba nyngkong eh na ka bynta ka Dohkha bad ki jingri jingdup ha Mawblei, Shillong.Kane ka jaka buh mar kaba dei haduh 45 metric tonnes chiller bad freezer, ka long ka mawjam kaba kongsan ban thaw ïa ka rukom pyniaid beit ïa ka jinglum, jingbuh bad jingsam ïa ki mar dohkha bad jingri jingdup ha ka jylla baroh kawei.
Ïa kane ka projek la lamkhmat da ka North East Development Initiative (NEDI) hapoh ka jingïalam jong ka ABK Media India Pvt. Ltd., bad ka M/s J. Mawkhiew Enterprises kaba trei kum ka Carrying & Forwarding (C&F) Partner na ka bynta ka jylla Meghalaya. Lyngba kane ka jingïatreilang, la thmu ban tei ïa ka rukom treikam kaba skhem na ka bynta ka jinglum mar, jingbuh, jingsam, jingdie ha ki iew paidbah bad ka jingpynroi ïa ki lad kamai ha ka dong ka thain.
Ka bynta kaba kongsan tam jong ka jingïalang plie paidbah ka long ka jingsoi ïa ka Memorandum of Understanding (MoU) kaba 5 snem bad ka Fisheries Department, Government of Meghalaya, kaba pynskhem ïa ka jingïatreilang bad ka jingkyrshan jong ka sorkar ban tei ïa ka rukom treikam kaba neh na ka bynta ka kam dohkha bad jingri jingdup ha ka jylla.
Ïa kane ka Cold Storage Facility la plie paidbah ha ka jingdonlang jong ki kynrem ki lyndan kiba kynthup ïa u Shri David Khanwanlang, Deputy Director, Fisheries Department; u Shri E.K. Laloo, Assistant Director, Fisheries Department; Dr. A. Chyne, Director, Animal Husbandry & Veterinary Department; u Dr. Hari Prasad Paul, Deputy Director, Animal Husbandry & Veterinary Department; bad ka Kong Jenny Mawkhiew, Proprietor jong ka J. Mawkhiew Enterprises bad C&F Partner jong ka NEDI Meghalaya.
Kane ka jaka buh mar kaba dang shu plie paidbah kam dei tang ka jaka buh mar, hynrei ka long ka jingsdang jong ka jingthmu kaba heh ban thaw ïa ka rukom sam bad pyniaid ïa ki mar dohkha bad jingri jingdup ba sain dur ha Meghalaya, bad ban ioh sam pat sha ki bynta ba shabar jong ka jylla.
Haba kren shaphang ka jingthmu jong kane ka projek, ki nongpyniaid ki la ong ba la tei ïa kane ka cold storage da ka jingthmu ban pynïasoh ïa baroh ki bynta jong ka value chain — naduh ki C&F Partner, ki Distributor, ki Sub-distributor, ki nongdie paidbah, ki nongrep, ki nongtrei kam dohkha bad ki nongïalam kam jingri jingdup.
U Somjit Dutta, Founder Member jong ka NEDI, “Ka jingplie paidbah ïa kane ka Cold Storage Facility kam dei tang ka jingsdang jong ka jingïatrei kam khaïi; hynrei ka dei ka jingïatylli jong ki paidbah Meghalaya ban tei ïa ka rukom treikam kaba long ka jingïoh bynta lang ha ka roi ka par bad ka jingkiew shaphrang.
Ka jingthmu jong ngi kam kut tang ha ka jingtei ïa ka cold storage chain — hynrei ngi dang buh ïa ka nongrim jong ka ecosystem kaba pura kaba pynleit jingmut ha ka lad ai kam ai jam, ka jingkiew jingsan ki samla bad ka jingiatrilang ka imlang sahlang. Lyngba kane ka projek, ngi kwah ban pynlong ïa Meghalaya kum ka jylla kaba hakhmat eh ha ka kam dohkha bad jingri jingdup ha ka ri hi baroh kawei, da kaba thaw ïa ki lad kamai ba neh, pynkhlaiñ ïa ki local value chain bad ai bor ïa ki pateng ba kin don bynta ba kongsan ha ka roi ka par jong ka jylla.
Ha kane ka jingïalang la wan shim bynta da ki heh sorkar, ki stakeholder, ki nongmihkhmat na ki karkhana bad 12 ngut ki distributor na kylleng ka jylla Meghalaya. Nalor kata, la khmih lynti ba kin dang don sa kumba 30–35 ngut ki sub-distributor ban rung ha kane ka thup kaba dang heh, kaba yn pynkhlaiñ shuh shuh ïa ka jingsam mar ha ki distrik, ka jingïoh rung sha ki iew shnong bad ka jingsam mar haduh ki jaka kiba kyndong kynshrot.
La khmih lynti ba kane ka facility kan noh synniang shibun ha ka jingpynheh ïa ka jaka buh mar, ka jingpynduna ïa ka jingjulor hadien ka jingot ne jinglum (post harvest), ka jingpynneh ïa ki mar, ka jingpynjanai ïa ka jingsam mar bad ka jingkyrshan ïa ki paidbah kiba im ja na ka kam dohkha, jingri jingdup bad kiwei pat ki kam jingïadei.
Ha ki por ban wan, ka jingthmu ka long ban seng ïa ka Processing Unit kaba nyngkong eh ha Meghalaya na ka bynta ki mar dohkha bad jingri jingdup, da kaba thaw ïa ka ecosystem kaba pura naduh ka jingbuh mar, ban shna, ban leh branding, ban shna ki packaging bad ban sam (distribution).
