New Delhi, Jylliew 06: U Myntri Sorkar Pdeng ba dei khmih ia ka Tnad Youth Affairs and Sports Dr. Mansukh Mandaviya, ryngkat bad ka Myntri Rangbah jong ka Delhi ka Rekha Gupta ki la ai jingkren ha ka ‘Youth for Viksit Bharat: MY Bharat Youth Convention’ ha Thyagaraj Sports Complex ha ka nongbah jong ka ri mynta ka sngi.
Ka jingialang ka la wanrah lang ia palat 6,000 ngut ki samla kiba iashim bynta na kylleng ka ri, kiba mihkhmat na ki jaitbynriew bapher bapher kynthup ia ki samla pule, ki samla riewshemphang, ki samla kynthei, ki nongseng kam seng jam, ki nongpynmih prokram, ki nongsaindur thymmai, ki nongialam kiba dang sdang paw bad ki nongjop.
Ka la pyni ia ka bynta ba wanrah jingkylla jong ki samla ha ka jingtei ia ka ri bad ka jingiaid lynti jong ka India ban long ka ri kaba la kiew shuwa u snem 2047.
Ki riew pawkhmat ba kynthup ia ka MLA bad ka nongrwai ka Maithili Thakur, u aktor Vikrant Massey, u nongseng kam seng jam u Aman Gupta, bad u nongïalehkai kriket ka ri India u Jitesh Sharma ki la ïakren bad ki nongtrei mon sngewbha jong ka MY Bharat NSS bad ïasam ïa ki jingshem jong ki, da kaba pynshlur ïa ki samla ba kin beh ïa ka jingtbit bad ban noh synniang kaba don jingmut sha ka roi ka par jong ka ri.
Ka Youth Convention, kaba la sakhi ia ka jingiashim bynta jong palat 6,000 ngut ki samla, ka la pyni ia ki sienjam ba kongsan ba la shim ban iatreilang bad ki samla ha kylleng ka ri.
Ha ka jingai jingkren jong u, u Myntri Sorkar Pdeng ba dei khmih ia ka Tnad Youth Affairs and Sports u Dr.Mandaviya u la ban jur ba ki samla jong ka India ki dei ka bor ba khraw tam jong ka ri bad ki long ki bynta pdeng ban pynurlong ïa ka jingthmu jong ka Viksit Bharat, da kaba ban jur ia ka jingmyntoi jong ka India ha ka liang ka jingbun briew, ha kaba jan 65 per cent na ki nongshong shnong jong ka kidei kiba hapoh ka rta kaba 35 snem.
“Ki samla kidei ka bor jong ngi, ka jingsarong jong ngi, ka jingkut jingmut jong ngi bad ka lawei jong ngi. Hapoh ka jingïalam jong u Myntri Rangbahduh ka ri u Narendra Modi, la plie ïa ki lad ki lynti ki bym pat ju don mynno mynno na ka bynta ki samla jong ka ri ban saindur thymmai, ban leh bha bad ban noh synñiang sha ka jingtei ïa ka ri. La ka long ha ki startup, ki kam ïalehkai, ki kam shakri paidbah, ka jingseng kam seng kam ne ki kam saindur, ki samla jong ka ri ki pyni ia ki sap jong ki bad kyntiew ia ka kyrdan jong ka ri ha ka pyrthei,” u la ong.
U Dr. Mandaviya u la kren ruh shaphang ki sienjam jong ka MY Bharat, ban kyntiew bad ialam lynti ia ka sap jong ki samla sha ka jingtei ia ka ri.
U Myntri u la ïaroh ruh ïa ka jingjop ba dang shen jong ka MY Bharat ha ka Guinness World Record bad u la kyntu ïa ki samla ba kin ïashim bynta shitrhem ha ki prokram jong ka rynsan, ki lad trei mon sngewbha bad ki sienjam ban tei ïa ka ri.
Haba kyntu ia ki samla ban ithuh ia la ka jong ka sap bad ban trei borbah ban long kiba tbit, u Dr. Mandaviya u la ong, “Ka por kadei jong ki samla. U Myntri Rangbahduh u Narendra Modi u la iohi ia ka Viksit Bharat kaba la pynwandur da ki jingmut jingpyrkhat, ki jingsaindur thymmai bad ki jingangnud jong ki samla jong ka ri. Baroh, ngi dei ban tei ia ka India kaba lah ban iakhun, kaba sngewskhem bad kaba lah ban kyrshan hi dalade kaba pynurlong ïa ki jingangnud jong ki 140 klur ngut ki nongshong shnong.”
Haba ai jingkren ha kane ka jingialang, ka Myntri Rangbah jong ka Delhi ka Rekha Gupta ka la ong ba ki samla jong ka India ki long kiba la pynkhreh ban ialam ia ka ri sha ki kyrdan kiba kham heh lyngba ka sap, ka jingkut jingmut, bad ka jingtrei shitom jong ki.
Haba ban jur ïa ka bynta ba kongsan jong ki samla ha kaba tei ïa ka ri, ka la ong ba ki samla jong ka ri kilong kiba trei shitom, kiba ïohi jngai, kiba saindur thymmai, bad kiba shlur, bad ba man la ka jingjop jong ki samla jong ka ri ka pynkhlain ïa ka jingïaid jong ka ri sha ka Viksit Bharat.
Ka la iohi ba ka jingtbit ha kano kano ka bynta ka long kaba la tei halor ka jingtrei shitom, ka jinglong ryntih, bad ka jingaiti lut, bad ka la iaroh ia ki jingjop jong ki samla jong ka ri ha ki kam ialehkai, ka kam seng kam seng jam, ka jingpynmih prokram, ki kam saindur, bad ka jingshakri paidbah.
Ha ka Youth Convention, u aktor Vikrant Massey u la ban jur ïa ka jingkiew kaba kongsan jong ka ïoh ka kot kaba wan na ki nongpynmih prokram jong ka India hapoh ka jingïalam jong u Myntri Rangbahduh ba donburom u Narendra Modi, da kaba ban jur ïa ki lad ki lynti kiba la wanrah lyngba ka jingpynkupbor ha ki kam digital bad ka jingsaindur thymmai.
U nongseng kam seng jam u Aman Gupta u la ïasam ïa ki jingmut halor ki sienjam jong ka Sorkar ban buh ïa ka India kum ka nongbah jong ki startup jong ka pyrthei da kaba kyntiew ïa ka jingseng kam seng jam, ka jingsaindur thymmai, bad ka jinglong jingman kaba biang ha ka kam khaii pateng.
Ka jingialang ka la rakhe ruh ia ka jingtbit ha ka kam ialehkai lyngba ka jingpynkup burom ia ki nongialehkai ba pawkhmat na ka bynta ki jingjop bad ki jingnoh synniang jong ki sha ki kam ialehkai jong ka India.
Shuh shuh, u nongïalehkai kriket u Jitesh Sharma u la ïathuh ïa ki jingshem jong u halor ka phang “Play in India, Play for India”, kaba ai mynsiem ïa ki samla ïalehkai ban wad ïa ka jingtbit bad ban noh synñiang sha ki jingthmu jong ka ri kiba iadei bad ki kam ialehkai.
Ia ka jingialang la plie paidbah da ka Pallavi Jain Govil, Secretary, Tnad Youth Affairs, kaba la ban jur ia ka jingdonkam jong ka jingïashim bynta jong ki samla ha ka jingtei ïa ka ri bad ka jingkut jingmut ba iaibteng jong ka Sorkar ban pynkupbor ïa ki samla nongïalam.
Ïa ka My Bharat Youth Convention la pynkut da ka Viksit Bharat Sankalp, kaba pynskhem biang ïa ka jingkut jingmut jong ki samla nongshong shnong ban noh synñiang shitrhem sha ka jingtei ïa ka Ri India kaba kiew, kaba lah ban kyrshan dalade bad kaba kynthup ïa baroh shuwa ka jingdap shispah snem ka jingioh jinglaitluid ha u snem 2047.
